銀行股 股票 投資組合 龔成信箱

90後高位買入6隻股票 重組投資組合可以咁做|銀行股|龔成信箱

投資

廣告

【銀行股】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括投資回報率、收息股、月供股票、內銀股、潛力股,以及樓市等提問。

撰文:龔成 |圖片:新傳媒資料庫、unsplash

1.銀行股

龔成老師你好,我今年26歲, 平均每月收入17k, 大部分儲蓄都用作股票投資, 大部分都於高位買入, 時左還有30萬儲蓄, 想請教老師,現時股市前景不明朗的環境下該如何應對?

應否放手止蝕, 還是可長線持有? 另外應該如何運用30萬儲蓄去增加資產?現在買入銀行股是否好時機?

現時持有股票如下:
2858 易鑫集團 買入價: 7.7
0297 中化化肥 買入價: 1.12
1363 中滔環保 買入價: 1.55
1282 中國金洋 買入價: 0.72

0700 騰訊控股 買入價: 380
1818 招金礦業 買入價: 7.79

龔成老師:

我地持有一隻股票與否,最重要是企業的質素、前景,自己的買入價只是心理因素,而股市前景不明亦不是因素。

易鑫集團(2858)未有盈利,只有概念價值,雖然業務有增長潛力,但這類股不能大注。如持有太多,首先減持。

中化化肥(0297)企業經常虧損,無投資價值,賣出較好。

中滔環保(1363)如果你有睇年報,會見到2017年出的年報,核數師持「保留意見」,即是佢盤數有D問題,這類股不能投資。

中國金洋(1282)質素一般,你暫時可以持有。

騰訊(0700)有質素,可以持有。

招金礦業(1818)都算有質素,但業務較被動,產品價格自力弱,都算可以持有。

至於你手上的現金,可以投資其他優質股(記得是優質股),不要再集中在上述的股。以現時的市況,大致處合理水平,可動力一部分投資,但要分注,同埋要剩下一定的現金。

(對照龔成信箱:Q7996)

2.高回報投資

成哥,又想請教你,如果我現時有23萬現金,有咩方法可以令23萬4年內變成一百萬,有冇可能?

龔成老師:

4年的確有點急,因為要將23萬增加4倍成100萬,在4年時間要回報好高先做到。以一般的投資較難做到,但如果你願意冒多點風險,都有機會的。

首先,你要集中找尋潛力股,目標是一些市場未發現,同時現時估值低估的股票,這要有一定的技巧,你唔單止要有選股的能力,同時要懂得企業估值,計算出現價處平處貴。

同時間,你不要心急投資,要懂得把握投資時機,睇到好準先出手,目標是等平宜價時才投資。這方法可以令你大幅提高回報,有機會完成到4年$100萬的目標,但就要有一定的技巧。

(對照龔成信箱:Q7993)

3.恆指

我想了解下 點解咁睇好2800
係咪長線來說 佢股價一定會升

 

龔成老師:

可以咁講。

盈富(2800)追蹤恆生指數,當中的企業是中國及香港,而這些經濟體都是長期增長的,這就會帶動恆指上升。

不過,中短期一定會有上落,但長遠來說,特別是10年以上,都是向上的。當中除了因為經濟成長,亦由於我地的貨幣不斷貶值,加上當中企業有質素,自身價值不斷成長,這都帶動盈富長期向上。

(對照龔成信箱:Q7994)

4.樓市

成哥想打攪下,現在有冇咩投資產品或股票係可以同樓市做直接對沖。

因為如果樓市明顯下行(小弟當然不想,持有2層共1000萬左右)可買少少作對沖,直致過左3年禁售期或減輕自己壓力。謝回復

 

龔成老師:

香港好少這類產品,因為你想反向投資樓市。但如果較為接近,可以投資領展(0823)的認沽證。

假設樓市長期下跌,領展的股價都會有所下跌,若果投資了佢的認沽證,你就能因此而獲利,從而對沖了樓市下跌的損失。

不過我不太建議,因為這些認沽證年期一般都只有一年,你要好似轉另一隻咁,不停轉先有連接的效果。另外,這些工具的潛在成本相常高,你牌面上已經處於不利。同埋,這些工具一般都是短炒的,基本上唔應該咁樣長線投資。

其實只要你「供得起」,基本上就算價格下跌,你的問題都不大。

(對照龔成信箱:Q7995)

5.合和實業(0054)

你好,想問合和實業o唔ok
同埋騰訊我$217時候買,我係咪可以持有住先?

龔成老師:

合和實業(0054)有質素的,雖然不能是高增長的股票,但平穩增長無問題,當中的資產其實都不差。有投資價值。

至於騰訊(0700),這股有質素的,你在較平宜的價位買入,其實可以長線投資,雖然中短期股價會波動,但長期仍然正面,佢長線仍然正面,但增長力就比過往減弱。你可持有。

(對照龔成信箱:Q7997)

6.福壽園(1448)

想問下福壽園計佢果個存貨周轉日,個數好大,有冇問題?

同時想問問590,2015年個現金流量表,點解佢經營現金流果到 要扣咁多稅仲多過2014年果陣時營業額高峰?
Thanks

龔成老師:

福壽園(1448)的存貨周轉日個數,其實個數唔算大,因為佢唔係做一般的零售,賣貨一定唔會太快,只要你比較佢5年,無乜好明顯的變化就得,我見佢變化唔大。

至於現金流量表,好難用一般的角度去解釋,因為經常因為入賬方法、日子,而令數字出現你較難理解的數,因為往往會將數字搬搬後,所以會有你提出的現象,你唔可能計到一年的數要對整。現金流量表,大概睇就得,因為當中有好多會計在其中,而我地唔洗知得太清楚的。

(對照龔成信箱:Q7998)

7.信義玻璃(0868)

你好,之前見你提到,信義破璃有風險因素,是什麼?謝謝你!

龔成老師:

信義玻璃(0868)本質無問題,但行業增長的確減慢了,雖然你睇佢財務數據,見佢近年的盈利都有不錯增長,但其實行業的增長比過往減慢,而佢近年的增長,來自售價的提升,因為環保問題,中國政府減慢了行業增加生產線,令玻璃價格上升,因此帶動佢盈利升。

佢因為咁樣,佢無法在中國增生產線,在馬來西亞增設廠,這當然有利佢整體產能,長遠都正面,但中短期行業有可能增長減慢,佢有可能會現略有風險的情況。因為汽車業的增長減慢、中國建築業雖然增長理想,但都有逆轉風險,而這些都會影響佢的玻璃生意。

這就是中短期的風險,其實不算大。因此,用長遠眼光分析這股就得。

(對照龔成信箱:Q7999)

8.盈富(2800)

你好 龔成!你所講既月供盈富,係每月都加注買入單方既持續上升既股票嗎?定還是應該跟據你先前所講分散買入持穩股?

另外,基金方面因為聽講外面既傳言多間基金公司供完之後都發現拎唔翻筆錢,所以你有冇建議比我邊間係可信

龔成老師:

月供盈富(2800)的意思,就是每月投入相同金額,例如每月$5000,不斷買入盈富,例如你到銀行定好呢個月供計劃,佢每月就會扣你錢,按當天的股價,睇下可以掃多少貨。每月如此,不斷進行。你只要長期進行就得,由於這是一個50隻股票的組合,所以本身已有分散風險的作用。

香港的監管不錯的,近年都無聽過基金欏唔翻錢的事情,如果你真的擔心,就投資較大型的基金公司咁就得。

(對照龔成信箱:Q8000)

9.內銀股

你好龔sir,本人42歲,正職月入約三萬鬆,兼職就每月大概有六、七千蚊,不需供老強。

現持有股票市值約三十萬,分別係939、1398、700,而最近開始月供$5000 3號仔。另外亦有月供兩份基金合共每月$4000已經多年及每月儲$2000現金。

手持內地一個現值約一百萬人民幣的物業(2013年購入一次性付)因清水樓且出租金額不吸引所以現空置中,有數隻所謂名表市值約一百萬鬆d,持有現金約$15萬,每月還p loan約萬二蚊仲有三年先還清。住公屋,已離婚育一女兒剛上中學。

龔sir,本人現時生活雖不至於懮柴懮米,但打算2020年送個女去英國留學,亦希望改善生活品質。由於本人最快可以50歲退休,眼見好多同齡同收入人士所累積的財富都比我成功好多,所以想請教龔sir我應如何理財令自己在供養女兒上及自己生活上有所改善?

龔成老師:

股票方面,持有的質素不差,但就太集中在內銀,同時這都只是收息股,增長力有限,最好做少少組合上的調整。以你的年齡,其實財富仍有增長力,最簡單是將部分轉到平穩增長類的股票,如盈富(2800)裡。這能令你的組合更高增長力。

至於你現時月供股票及基金,可以繼續,能助你長期累積財富的。

至於內地物業,要小心分析當中的質素,除左該物業本身的質素,以及當區的發展外,作為投資者,我地好睇重現金流的,一定會想方法產生現金流。如長期無法產生,就要轉換成另一資產,以得到更好的現金流。說到尾,一個資產的價值,源於佢長期產生的現金流計算。

物業的價值說多不多,說少不少,如果能有效運用這筆資金,能提高你整個財富的增長力及現金流。

至於名錶,這不是我的強項,所以我不能比太多意見。你最重要是計算佢長遠的增長力,如果增長只是一般,就不如投資其他資產,起碼有現金流產生。

手持的現金,可以將3分1投資股市,現時可投資平穩增值類股,分注買入就得。至於餘下的就暫時持有現金,等有明顯機會先再出手,同時要小心選股,你最好先強化投資知識,這樣可以更有效運用資金。

只要根著上述方向進行,雖不至於令你財富急增,但長遠都已經能有效率使用財富,提升增長力。

(對照龔成信箱:Q8001)

10.佐丹奴國際(0709)

你好,龔成先生。我最近開始買股票,但個市跌左好多,個心有點唔定,當中左丹奴由3.99跌到3.4。

金沙由平均價36.45跌到30.5,健行又由6.78跌到6.2
因金沙跌近兩成有點驚

我想問之後我部署應如何,因現在股票佔我儲蓄50%,我應要不要動用餘下儲蓄再入溝貨?

或是不要再買,靜待股價回上。
請給點意見,感謝回答,靜候回覆。

龔成老師:

我地投資股票,其實是買入企業,我地應著重企業的本質,中短期股價不用理會。

所以,當企業質素無變,只是中短期股價回落時,我地應該冷靜面對,耐心持有就得,(我地從來唔會因股價跌得多而驚,只要因企業質素轉差而擔心)。

佐丹奴國際(0709)是不錯的收息股,但增長方面則較弱。

你睇翻佢的財務數據,可以見到佢近幾年的生意幾乎無增長,雖然盈利有上升,但不多,只是一些基本的增值。同埋,佢的派息比率好高,作為收息當然不錯,但你可以見到,管理層將大部分所賺到的盈利,都用作派息,保留盈餘好少。

即是管理層都無乜心想發展,只想守住原有的地盤就算。所以,這股的增長力有限。所以如果只是收息,佢可以的。因此,持有與否要睇你的投資目標。

至於金沙(1928),優質股,不用懷疑,現價合理,長線持有就得。

建行(0939)是不錯的收息股,但增長力有限,集中收息可以。

(對照龔成信箱:Q8002)

免責聲明:本專頁刊載的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。

延伸閱讀:

想行穩健路線每年收10厘回報 靠增值類資產 財富累積夠快