診所職場事 【寶豬趣聞】診所經理 ｜珍寶豬
我：「好呀～」
我登登吓記，佢問我：「得未呀？」
我啱啱開始入資料咋喎，你平時快開㗎？
撰文：珍寶豬
我繼續入資料：「就得～你等多等啊，或者坐坐先？」
佢：「你經理喺邊？」
登個記都要搵經理，你做咩啫～
我：「請問有咩事呢先生？」
佢：「你唔笑呀，我同你講嘢你頭先都冇望住我講呀，你知唔知咩叫尊重禮貌呀？」
頭先篤住電話放低身分證嗌我登記嗰個係你嗎？
我：「真係唔好意思啦先生，我會留意㗎啦，我頭先掛住幫你登記，所以先冇望到你啫」
佢：「你係完全冇笑容呀，你喺度送殯㗎？」
送你殯嗎？
我：「我戴住個口罩你咁都睇到？」
佢停一停諗一諗：「口罩出面都冇笑容啦」
醫生，我哋不如換過批口罩？換啲有圖案嘅？咩嘢烈焰紅唇哈哈笑嗰啲呀？
我：「先生我登記好㗎啦，你未睇過嘅，麻煩你提供埋你嘅住址同電話號碼俾我入返資料呀～」
佢：「你搵你經理出嚟同我講」
我：「先生我哋冇診所經理嘅，我哋之上就係醫生嚟㗎啦」
佢：「好！你咁講就得啦！我入去見到醫生㗎嘛？」
你個問題好有趣，入醫生房唔係見到醫生，唔通見到十八羅漢呀？
我：「嗯，係呀，你一陣就見到醫生㗎啦，你俾咗住址同電話號碼我先呀～登記好先有得入房」
佢：「紙！筆！」
人嚟，快備文房四寶！
佢大筆一揮寫好資料俾我，好啦，送佢入房啦～
入到房，我聽到佢大叫『你搵你經理出嚟呀！出面嗰個又唔笑，講嘢唔望人！入面呢個又係咁！你唔好解釋，搵個話事嘅嚟呀！你唔好再望住部電腦講嘢呀！我喺度呀！』
話事嘅會係包租公嗎？醫生，我要唔要Call包租公嚟？
延伸閱讀：
診所職場事 【寶豬趣聞】 從中生利
【診所職場事】電話響起～
我：「你好，乜乜診所」
對方係一位女士：「喂？診所呀？可唔可以問你少少嘢呀？」
我：「請問咩事啊？」
佢：「我開完刀個傷口唔知係咪有事呀」
撰文：珍寶豬
我：「你要過嚟俾醫生睇㗎」
佢：「但係我坐緊月喎」
我：「你係咪住附近㗎？係嘅話包得實啲過嚟呀，因為電話講都唔知你個傷口係點～」
佢：「係呀我知電話講唔到呀，我叫我個陪月阿姨睇佢又唔肯喎，話傷口唔係俾佢睇喎，佢話陪月淨係負責換尿片餵吓奶」
我：「你有冇其他屋企人陪你過嚟俾醫生睇睇呀？我哋而家都冇咩病人啊」
佢：「有呀我阿媽囉」
我：「你行唔行到㗎？」
佢：「行到嘅」
我：「你唔好夾硬嚟呀，真係行唔到嘅好痛嘅記得要出聲搵人幫呀」
佢：「我個陪月就係唔肯幫呀，我有時起身都起唔到，扯住痛，我阿媽又唔係咁好力」
我：「你住邊㗎？」
佢：「就你哋診所對面咋嘛」
我：「你一係叫媽媽過嚟先呀，我借架輪椅俾你～你媽媽推你過嚟，大家都舒服啲」
佢：「好呀！」
借完輪椅，隔咗陣，佢哋兩母女嚟到。
佢登記後揭起衫俾我睇：「姑娘，你望吓係咪發炎呀？」
我：「你入到房再俾醫生睇呀～醫生會幫你㗎啦，我同你探咗熱先啊」
探熱後，我：「你知唔知自己發緊燒㗎？」
【診所職場事】有日一位小姐嚟到診所。
佢快步行埋嚟登記處同我講：「你睇實呀」
我雙眼定位了：「嗯？咩事啊小姐？」
佢拎出一張應該係屬於我哋診所嘅覆診卡，即場撕爛咗，之後仙女散花咁向天拋屍骸。
我：「請問咩事呢小姐？」
撰文：珍寶豬
佢：「我唔會再嚟睇你哋㗎啦！」
你咁神心專登嚟到診所話我知呀？呢啲仲唔係愛？
我唔知可以俾咩反應好：「嗯…」
佢：「哈？就咁咋？」
唔係你想點呀？我捉住你褲腳叫你唔好走？
我：「其實我有咩幫到你呢小姐？」
佢：「哈？你問我？你應該問你哋自己點樣幫自己呀！唔係問我呀！」
我成日都問自己點解越減越肥，我都覺得自己好唔幫得手～
我：「係咪有咩事呀？不如你直接講啦」
佢：「我唔會再嚟睇你哋㗎啦」
我：「冇問題，呢個係你嘅選擇～」
佢：「我幾病都好我唔會再嚟睇你哋呢啲診所㗎啦！你哋完全冇人性㗎！」
我深呼吸：「點解會係冇人性呢？」
佢：「我啱啱先返到嚟香港，我去咗法國呀！」
哦。咁點呀？
我：「嗯，你繼續講～我聽緊」
佢：「我唔舒服嗰時我有上網搵過你哋診所email！」
我哋診所有email嘅咩？我唔知嘅？
我：「我哋冇email㗎喎？」
佢：「係呀！我知你哋冇呀！我搵過晒啦！我喺法國唔舒服到就嚟死呀！你哋有冇幫過我？」
我：「你應該喺當地搵醫生幫你…」
佢：「我唔係跟團去㗎！」
跟團就有醫生的嗎？
佢繼續講：「我連流鼻水英文都唔識呀！發燒係咪hot呀？」
…你可以用自己一套方法演繹嘅～
我：「有…google翻譯㗎嘛～或者可以搵個識嘅幫你溝通啊」
佢衝上前拍枱：「我唔舒服到就嚟死呀！」
你而家咪又生勾勾好好中氣～
我：「冇事啦，而家冇事就好啦，你返到嚟仲有冇唔舒服呀？」
佢退後兩步，揮揮食指，邊講邊退出診所：「我唔會再嚟睇你哋㗎啦！」
嗯～放開啲睇開啲～東家唔睇睇西家～仲有…你撕爛嗰張係車行經紀卡片…
