【經一專欄】23歲月儲$4,000 想進取的話 可揀盈富+比亞迪|龔成信箱

【經一專欄】23歲月儲$4,000 想進取的話 可揀盈富+比亞迪|龔成信箱

經一專欄・盈富】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括優質股、PMI、月供股票、止蝕、公用股,以及人民幣等提問。

撰文:龔成|圖片:新傳媒資料庫、unsplash、中新社

1.盈富

你好龔成老師,一直都有留意開你的粉絲專頁,想問問你關於投資儲蓄的建議。

小女子現時將23歲,月入HKD16,000,每月可儲HKD4,000左右,手持700一手。

打算25歲前有20萬現金,可以如何作打算。謝謝解答。
(本來是打算4,000 一半是用來做月供,一半淨放在銀行儲蓄)

 

龔成老師:

以現時的大市平貴情況,你可以將$3000做月供股票,餘下的就儲現金。以你現時的年齡,其實可以進取少少,當然,你都要睇翻你自己的風險承受能力。

如果可以承受風險的話,就供盈富(2800)$2000,比亞迪(1211)$1000,如果唔想承受太多風險,就集中供盈富$3000。你就這樣保持進行,至於餘下每月$1000,就儲現金,除非出現好大的跌市,否則不要動用。

至於現時持有的騰訊(0700),可以持有,但不要心急增持。

(對照龔成信箱:Q8260)

2.PMI 

龔sir,

1.請問PMI係代表咩?

2.有指PMI 指數是經濟景氣的指標,咁係PMI 越低時,即景氣較差時買入港股,是不是較好?

3.有指根據以往恆指的數據,在恆指市盈率7,8倍以下及股息率在4%以上,股市是安全地低,值得買入,你認同嗎?

謝謝!

 

龔成老師:

1)PMI即是採購經理人指數,Purchasing Managers’ Index,係一個衡量製造業的指標。分析翻係生產、新訂單、商品價格、存貨等狀況。從而反映製造方面的情況。

2)PMI低,經濟即是較差,中短期股市不利,但以長遠角度計,優質股可能處平的狀態,因此這是有可能是入市時機。

3)恆指在10倍以下,可以理解是進入平宜區,如果去到8倍,當然是買入時機。但要記住,恆指只是整個大市的初步分析,我地仍然要買別企業分析。

(對照龔成信箱:Q8252)

3.恆指ETF(2833)

月供恆指 etf 2833 覺得可以嗎?

 

龔成老師:

恆指ETF(2833)的投資目標,就是追蹤恆生指數之表現,即是追蹤當中的50隻成份股。

你可以長期月供這基金,其實投資這個與投資盈富(2800)一樣。由於盈富的成交額較多,所以股價會較緊貼資產淨值,買賣差價亦會較少。

(對照龔成信箱:Q8253)

4.優質股

老師,我依家手持大約9萬流動現金,見最近個大市回落左d,一直好想入貨,但又驚太急買貴曬,請問龔sir你認為我應該要再等待真係大跌時機嗎?

另外請問你點睇512遠大藥業?

我留意到佢其實過去幾年業績盈利不斷增加,但從來不派息,一直在不斷收購擴充業務,請問呢潛力大嗎?

謝謝!

 

龔成老師:

無人知道之後的大市升跌的,亦無人知幾時見底,我地只可以從平貴方面去分析。現時大市處於合理水平,雖然未到平宜區,但已經可以分注買入,只要投資的是優質股,長線進行就得。

因此,你現時已可分注買入優質股,只要同時留有現金就得。

遠大醫藥(0512)不過不失的,但佢的流動負債較多,而獨立核數師都對當中有些項目,表示有關注。佢業務是無問題,但財務數據則有少少風險,潛力都有的,但就不能太大注。

(對照龔成信箱:Q8254)

5.人民幣

龔成老師, 想請教#405現時有7%息, 但現在正處於加息周期和預期人民幣將會跌穿7算, 請問會如何影響#405表現?

因為#405資產是用人民幣計價關係, 他的股價會否跟人仔走勢而跌?跌穿$5, 下一步你估計會調整到什麼水平才值得買入長期持貨收息呢?謝謝

 

龔成老師:

越秀房產信託基金(0405)是房託,是不錯的收息資產,但當中的物業資產是中國物業,因此一定同人民幣有問關。當人民幣下跌時,佢都一定會下跌。

至於加息週期,雖然有可能令收息資產受壓,但只要這資產的股息有長遠增加的能力,就不用擔心,而越秀有這能力的。

其實,現時這股的股息率去到7%,已反映了當中的風險,人民幣不會永遠下跌,你只要用分注投資模式進行,長期收息就可以。

(對照龔成信箱:Q8255)

 經一專欄 盈富 比亞迪 龔成信箱
人民幣不會永遠下跌,你只要用分注投資模式進行,長期收息就可以。

6.新天綠色能源(0956)

老師你好
請問956點睇,質素如何,可長期持有嗎?

 

龔成老師:

新天綠色能源(0956)有潛力的,佢主要從事新能源和清潔能源的開發與利用,旗下擁有兩大業務板塊:風電業務和天然氣業務。

佢係河北、山西、新疆、山東、雲南、內蒙古等地區擁有風電項目,佢係河北省擁有運營天然氣輸配設施,並通過天然氣分銷渠道銷售天然氣。

雖然整體的質素不算強,但這企業近年的增長理想,加上前景不差,同時營運效率正提高,都是當中的利好因素。

另外,這企業的市場估值一向處較低水平,投資這股有穩中求勝的作用。

估值低反映市場認為這企業的賺錢能力不高,增長力不強,隨著風力的效率提高,相信這企業的質素會慢慢改善,股本回報率亦會由現時的較低水平,慢慢上升至更理想的水平,到時將帶動股價上升,因此這企業都有值博率,但在投資注碼上就不宜太大。

(對照龔成信箱:Q8256)

7.公用股

老師,我上完你的堂,岩岩做完2638 分析,有啲問題想請教下你(附上企業評估表)。

企業的流動比率5年只有2年太過100%,而流動負債大過流動資產,我可以解釋為企業因為依賴一d的廠房設備來增加收入,是長線發展的企業,加上有正現金流,因此不用太擔心流動負債情況?

另外,我同時睇過再上一年的年報,呢兩年都係講差唔多的野,主要都係講環保設施,是否因為呢類的公共股業務單一,所以冇乜野好講?

另外,2638的只找到2017 的市盈率,因此我參考了同行
的市盈率,咁做可行?

最後,想問下你覺得我的分析仲有咩改善的地方?使唔使再上多次你的堂?請指教

 

龔成老師:

睇左你的分析表,其實做得幾好,無乜大問題,企業評分我自己都係比到大約這數,但財務穩健方面,只屬中等,所以這裡只有半分。

至於後面幾頁的分析,你都講出了重點,港燈(2638)是較容易分析的企業,所以如果是其他其實,可能要再寫得詳細少少。

估值方面,你計出的數大致無問題,我自己都是咁上下,唔會差大遠。這類企業的業務穩定,估值上唔會有太大的變化,作為入門分析是很好的。

至於你話佢流動比率的問題,對,的確有這問題,所以我先會在財務穩健項目中扣分。其實,港燈的業務好穩健,現金流十分強勁,因此風險好低,但佢就會低住自己有這優勢,而在負債上進取少少(其實都只是少少),所以在整體上,財務仍是不錯,但我會扣少少分。這方面未到令人擔心的水平。

至於佢年報無乜野講,正常的,佢業務太穩定,年年都係咁上下,企業又唔會發展,所以好正常。

市盈率你可以用翻公用股,作為分析。另外,由於佢全派息,因此可以利用股息率,比較其他收息股,作為平貴分析的輔助指標。

整體來說,你的評估表做得幾好,之後多分析其他企業就得,因為港燈是最入門的類別。你多分析,不斷睇年報,不斷填評估表,咁投資能力會大幅進步,同時亦會找到一些潛力好股。

所以,暫時唔洗上多次我的股票班,除非我日後出進階班先啦。當然,你都可以應用課堂方法半年,之後如果上加強知識,到時先上多次我原本的股票班啦。

(對照龔成信箱:Q8257)

8.樓市

老師,我想問,如果而家留啲錢,等入市買樓租出去好嗎?

 

龔成老師:

現時香港樓處略貴水平,但由於本身供應唔夠,因此長期樓價仍會向上。不過,中短期有唔少風險因素,有可能令樓價調整,這就可能是你的買入時機。

所以,你這刻可以留有資金,等樓市有回落時出手,然後持有收租,這時機有可能會在中期出現。

(對照龔成信箱:Q8258)

9.港鐵(0066)

請問66定6號月供比較好?

 

龔成老師:

雖然兩隻都有質素,但港鐵(0066)是較優質的,佢獨有的地位,運輸+地產方面的優勢,都反映港鐵有相當的投資價值,月供是一個很好累積這股的方法。

(對照龔成信箱:Q8259)

10.止蝕

龔成老師你好呀! 一直想完成課程才仔細執手上的股票, 但現在帳面已損失十多萬, 有些還是幫家人托管的, 所以不知現在如何處理, 請老師幫忙指教.

1 . 4 九倉 因在17年分拆了九置出來, 在課堂上學的以幾年的數值計算看來已不適用, 現在變得不夠數據計算.

本想待股價升些小便賣出, 但一直創低位. 去到$20,PE2.82 每股賬面淨值46.754, 請問每股賬面淨值是否反影公司股價?

如需要止蝕, 請問什麼價位止蝕好點?

2 175吉利, 見老師課堂多數講1211, 請問老師對175有什麼睇法? 是否175前景不及1211? 應該轉去1211嗎?

3 2388中銀 / 3 煤氣 / 12 恒基 這3隻打算持有5-10年, 請問在貿戰和加息期的時候, 認為直得持有嗎?還是應該轉去其他股票?

 

龔成老師:

1)因為九倉(0004)將資產拆到九龍倉置業(1997),所以數據變晒,較難分析的,要睇得好仔細先計到條數。

由於較優質的資產都去左九龍倉置業果邊,所以長遠賣出或轉過去會較好,但九倉並不是無質素,如果你持有的注碼不過量,暫時持有先都無問題。

2)吉利(0175)都有質素的,但潛力一定不及比亞迪(1211)。吉利在中國都有一定的品牌,近年的增長理想,產品受歡迎,同時有可能加強發展國外市場,前景正面。

不過電動車技術,一定不及比亞迪,而這是一個新的藍海市場,所以我睇好。

如果你持有吉利,其實都可長線持有。不過可同時買翻少少比亞迪。

3)可以持有。這些企業本質受貿易戰好少,所以完全唔洗擔心,當然,股價會在當中波動,但這只是中短期的事。因此,可以長線持有。

(對照龔成信箱:Q8261)