經一專欄 診所職場事 寶豬趣聞 食不完的抗生素 珍寶豬

【經一專欄】診所職場事 【寶豬趣聞】食不完的抗生素 |珍寶豬

職場

廣告

經一專欄診所職場事】有日一位男士嚟到診所。

佢一嘢飛個膠袋埋嚟我度:「你咩料呀?」
呢句對白應該係我講啊。
我:「請問有咩事呢先生?」
佢:「啲藥唔work喎!」

撰文:珍寶豬
我喺袋入面拎啲藥出嚟望望:「先生,你呢藥已經幾個月前啦喎?同埋…抗生素仲有剩嘅?」
佢:「咩嘢抗生素呀?你噏乜呀?」
我拎起一包藥:「呢隻呀,我哋有寫明需要食晒喎~」
佢:「你哋都冇講,我點知啫」
你對耳少用都算啦,你連對眼都唔多用嘅話,冇人幫到㗎喎?
我:「我哋嗰時一定有同你講㗎,可能你唔記得啫。藥袋上面都有寫明㗎~」
佢:「我唔可以唔食㗎咩?」
我:「醫生開得抗生素俾你梗係有原因嘅,如果當時你覺得自己唔需要食,你應該同醫生講,而唔係食咗啲又唔食啲~你咁樣食嘅,好易有抗藥性。」

佢:「你哋係醫生先知咋嘛,我唔係醫生我知鬼呀?」
所以我哋咪叫你哋一定要食晒囉!到有事嗰時又要賴人~
我:「你而家啲藥都隔咗咁耐,不如同你登記啦,你睇醫生啦」
佢:「我個病同之前完全一樣囉,唔駛睇㗎喎」
我:「你啲藥都咁耐,你又話啲藥冇效,俾醫生睇睇好啲~」
佢:「係咪唔駛再俾錢呀?我上次俾咗啦喎,我係食完你哋啲藥咁耐都冇好過喎」
你當全世界都好似你咁笨呀?呃自己呃到以為可以呃埋人?
我:「我哋啲藥係預你七日食完,而唔係過咗咁多個月仲食緊嘅」
佢:「我嗰七日食得耐啲咋喎,有咩問題啊?」
冇,你話冇問題咪冇問題囉,你大晒啦~

我:「總之而家再睇醫生嘅都係要俾錢嘅啦,唔會當你係配藥㗎啦~」
佢拎返啲藥,手指指離開診所:「我自己唔識出藥房配咩!」
不如去藥房試吓叫人唔收你錢呀?