【網民熱話】出嚟做嘢後學識6個職場法則 無謂人講無謂嘢唔使上心

撰文：麗爾｜圖片：電視截圖

職場法則 1.見到唔熟嘅人 都要打招呼

人前要有禮貌，唔好怕誇張，講早晨講唔該係基本。

唔好輕看任何人，因為清潔姨姨都隨時有機會救你一命。

職場法則 2.返工唔好當人地係朋友

網民有提到唔好太易信人講嘢，尤其係你直屬上司。

返工最緊要信自己，唔好信同事 ，特別多野講果啲。就算點friend嘅同事都會喺你背後講你壞話。對同事好係可以，但唔好要求返人地對你一樣好亦唔好太易真心對人講嘢、私人嘢、對同事睇法等等，因為往往蝕底都係自己。

要知道同事就係同事，朋友就是朋友。想同現職同事做朋友無問題，離咗職先。

另外千祈唔好同朋友一齊返工，佢唔做野，你話佢又唔係， 唔話佢又唔係。多數做耐咗就會分化，嗌交，因為大家個工作態度唔同。

如果咁好彩同朋友一齊返工，記得朋友歸朋友，介紹得你入公司一齊做就唔好當朋友，要公私分明，利益行先，因為大禍臨頭只會各自飛。

職場法則 3.識人好過識字

職場上永遠都係：

做得好=博上位
做得差=無責任心垃圾
做得啱啱好=乜都斤斤計較怕蝕底

單喺努力做嘢喺無用，前提要有人賞識你。唔好同份工講感情，唔得人歡心唔識氹上司，幾努力都冇人見到。

記得嘢喺做俾人睇，做完嘢補封Email係常識。做到嘢要比人知，但要「不經意」地俾人知。

職場法則 4.是非唔洗擺上心

工作得耐就知道頭髮亂少少都可以俾人做話題講一日，而是非係公司唔洗半日就通天，所以辦公室是非精講任何嘢都唔洗放上心。

要知道： 事不關己，己不勞心。

職場法則 5. 返工唯一目的係出糧 

份工陪唔到你成世，但身體就肯定跟你一世，好好保重身體。亦有不少人提到，返工教識自己原來返工唔係主要經濟來源，炒股炒樓先係。轉工就是上位同加薪嘅最好方法，公務員除外。

職場法則 6.該沉默時沉默

唔出聲冇人當你啞，唔好自己走去惹麻煩。

唔好上司知道你「好得閒」。

有啲時候應該沉默扮傻仔扮咩都唔知，一味衝出嚟一定出事。

其他叫你幫佢做佢自己嘅duties千奇咪應承，因為之後就變咗你負責。工作有得拖就盡量拖，責任可以避就盡量避，因為有可能工作同責任會隨時間自動消失。

另外，就算唔鍾意，就算自己有快啲嘅方法，都一定要跟阿頭嘅較慢方法去做。