26歲初接觸投資 月儲$4,000 宜買盈富港鐵比亞迪｜龔成信箱｜經一專欄
1.投資
老師你好，本人26歲
岩岩開始接觸投資 扣除儲蓄及使費 每月都有大約4-5千剩
睇左你本書及網上資訊 覺得月供股票計劃比較適合現時我的投資方案
2800 盈富$2000
0066港鐵$1000
2388中銀$1000
或
2800 $2000
0066 $1000
1211 $1000
邊個組合較好？持股年期希望都可5年或以上
麻煩老師了
龔成老師：
以你的年齡，財富仍有一定的增長能力，你投資平穩增值股+潛力股，是比較適合的，而月供股票是一個很好的累積財富方法，你保持進行就得。
盈富（2800）$2000
港鐵（0066）$1000
比亞迪（1211） $1000
這個組合會比較適合你的。你唔需要理中短期的股價波動，長期進行月供就得。
（對照龔成信箱：Q8738）
2.盈富（2800）
你好，我30歲，月供66、857、2800、939，適合嗎？
龔成老師：
你30歲，仍然好年輕，其實可以投資增值力較強的股票，盈富（2800）有平穩增值的能力，無問題，適合你的。
建行（0939）本質不差，但這只是收息股，增長力不強，不要對股價有太大期望，如果你想令組合增長力較強，可考慮轉其他股。
港鐵（0066）有平穩增值的能力，加上是很優質的股票，適合你月供的。
中石油（0857）都算有質素，但這始終是商品企業，產品沒有差異性，只能賺取合理的利潤，佢會比較受油價影響，自主能力不強，油價長期仍會向上，而中短期可以較波動。長遠增長力只屬中等，如果想強化組合，可考慮其他更優質的股票。
另外，如果你想增值力強少少，可以加少少潛力股去月供。
（對照龔成信箱：Q8737）
3.強積金
你好！！龔成老師
想請教一下你關於強積金問題
我之前驚強積金會輸晒 所以只系揀左兩隻低風險保本基金
東X（行業計劃）均衡基金 40%
東X（行業計劃）強積金保守基金60%
但我覺得你所講既野好合理 年輕可以進取d
所以想將強積金 轉為
東X（行業計劃）香港股票基金50%
東X香港追蹤指數基金 50%
1.其實供強積金系唔系我每月所供既錢 東亞銀行幫我做月供去供呢兩隻基金？
2.同埋我見東X香港追蹤指數基金系99.8%買盈富基金 如果禁樣既話 仲有無需要再額外系出面月供盈富基金？
3.我個人想買一d 有唔錯息率 但又有增長力股票 暫時睇左老師d書 ..比較想買 2388.66.16.1928
其實823我都想買 但系長期都唔平 我個人推測佢既合理價只系$62左右
希望指教一下！唔該晒 thx
龔成老師：
對呀，年輕時你可以進取少少，太保守會浪費左複息增長的能力，特別是你年輕，所以，強積金只需簡單配置，因年輕而慢慢調低風險就得。
1）基本上係，但具體上，因為佢地有佢地的運作方法，所以有可能正式買賣會差少少，但原理上，你當是如同月供就得。
2）出面都可以月供，強積金你在65歲前都取唔到，而出面的資金你可以自己運用、配置，所以出面照供盈富（2800），是無問題的。
3）這幾隻都是有平穩增長，同埋股息不差的股票，基本上你可以分注投資。至於領展（0823）的確長期處略貴水平，你比較佢同其他房託的息率就知，但領展的確優質，所以又有少少貴得有道理，所以，要等做回到較合理水平，唔知等唔等到，這類股，都可以考慮做月供，但就不會現價大手入。
（對照龔成信箱：Q8739）
4.恆生（0011）
請問11同2388，兩者買入價現在算平嗎
中銀pe較低，所以揀中銀好d？
龔成老師：
恆生（0011）同中銀（2388）都是有質素的股票，都可長線投資。我地唔可以單睇市盈率去比較平貴，因為這只是以「上年的盈利」作為基礎去計算，同時，每間企業都有自身的合理市盈率。
兩隻都處合理水平，但唔算平，中銀這刻的會吸引少少。
（對照龔成信箱：Q8740）
5.儲蓄保險
老師，呢排有朋友sell 儲蓄保險，每年5萬，連續供5年，回報率(保證 + 非保證) ∼6%，我睇過fulfillment rate，呢幾年大概有85% ~ 90%到，要綁30年，請問老師
1. 如果只睇回報，我是否應該將每年5萬做作月供股票，回報好似都理想，但要綁30年，liquidity 係 0 …
一日未到30年後，都唔知有冇 6%回報，我怕30年後通脹已經超過 6%…
2. 好多保險公司都有不同?儲蓄保險plan，究竟儲蓄保險plan適合咩人買呢?
3. 老師你自己有買儲蓄保險plan嗎?
4. 如果真係買，買應該佔人工多少比例才算合理? (10% / 20% / 30%?)
5. 好多人都話買保險就買純保險，不要買儲蓄保險兩頭唔到岸，是真的嗎？純保險相對地可以買到更好? cover ….
不好意思，問題有點多。謝謝老師
龔成老師：
1）係呀，所以這類產品有好有壞，但不是無存在價值，如果在財富組合中，分配少少在這類產品（只是好少），都可以的，因為可以作為，長年期配置中，防守的部分，但就無流動性，如同強積金一樣。
2）我地理財，是一個攻守兼備的過程，當中可以包括不同的產品，而這類風險較低的產品，會適合一些不懂投資，本身怕風險，又想有長期財富增值的人。
3）我只有簡單買保險，但儲蓄性、投資性的，可以話無。因為這是防守性產品，我只要有足夠的現金及其他低風險投資，已可以平衡當中的風險。
4）10%已可。你應放多少少錢去投資增長力較強的項目。
5）各有各的利弊，要睇你自己本身的理財能力。就我自己來說，其他地方的儲蓄、投資已做好，根本不用靠這些產品，所以不會買。但我自己無可能做到保險上的風險轉移，所以就一定會買保險。
（對照龔成信箱：Q8741）
6.港鐵（0066）
阿sir我係你學生, 有些關於66地鐵估值問題想請教你
如果當佢的合理市盈率：12-15
有代表性EPS：$2.37
估計合理價：$28-$42
有代表性EPS(減除物業估值收益）：$1.74
估計合理價：$20-$31
1. 我們做估值應該用來自基本盈利EPS或是所有盈利EPS計算？唔同行業會否不同？
2. 66正確合理價範圍應該係幾多？
龔成老師：
港鐵（0066）的估值有點複雜，因為佢每年都會有物業重估，影響盈利數字唔少，所以最正統的做法，是將當中的數字扣除，然後得到一個較有代表性的每股盈利。
另外，過往的市盈率數字都要調整，因為過往市盈率，會用過往的盈利作計算，但當中盈利會包括物業重估，所以要先扣除盈利，再調整市盈率，重個估值才最正確，但就最複雜。
1）每個行業都會有少少唔同，但大致上，你用「正常經營業務」而得的盈利，去推算，是最正確的。
2）我地會以扣除物業的盈利去計算，所以你計出的$1.74是有參考價值的，不過，因為你市盈率無調整，所以你計出的「$20-$31」是錯誤的，如果以20倍市盈率作初步推算，就會計算出大約是$35。
（對照龔成信箱：Q8742）
7.平穩增值股
如果我有四十萬儲蓄，我應該如何分佈我的投資，我三十五歲了，應該怎樣增加財富？
龔成老師：
你35歲，財富仍有一定的增長能力，你可以集中投資平穩增值類股票，加少少潛力股。
以現時市況的平貴水平，你可以將其中$20萬投資股票，餘下的持有現金，等大市下跌時的機會才買入。現時動用的$20萬股票，不要一次過動用，可以分做多注，慢慢投入，例如將資金分一年慢慢入市，令買入價平均。
大部分可集中投資盈富（2800）、中銀（2388）、長建（1038）、港鐵（0066）、金沙（1928）等之類的平穩增值股，少少投資比亞迪（1211）等這些潛力股，建立一個平衡組合。
（對照龔成信箱：Q8743）
8.止蝕
龔成老師，多謝你的回覆，看過您的回覆及問答信箱後，有意將組合止蝕換馬。我想請教老師，如何可以重整我的投資組合可讓我跑贏大市：
個人背景 – 月入3萬，每月供樓約$12,000，有一BB
個人投資：
800股 5@55 （股票紙）
2000股 [email protected] （股票紙）
1000股 [email protected]
500股 [email protected]
12000股 939@平均價7.45
3000股 127@14
6000股 [email protected]
另之前老師建議我賣出的股份如下（正看機會隨時賣出）
12000股 [email protected]
30000股 [email protected]
160000股 947@平均價1.2
另持有1000澳幣定期（7.6買入）
除了賣出947、784和494，請問我應如何處理手上的帳面負數（本人沒有餘錢再買入股票），以換入2800、3、66和823呢？請問老師有其他換馬建議嗎？
我希望能每月把一半工資儲起，總資產每年有最少十萬至十五萬蚊的增長（本人每月個人和家庭使費約$8,000-12,000）
另外，我地也為小朋友的教育設立聯名戶口，兩公婆每月供1,000蚊，希望能幫補下一部分小朋友將來讀私立幼稚園和小學的費用，但暫時只儲到$20,000左右，請問在不增加每月供款的情況下，有甚麼方法可使這筆錢能有更大增長呢？
龔成老師：
之前建議你賣出的股票，你可按當中的質素，而決定是否要急於賣出，但長遠都是賣出較好的。
至於你現時持有的股票，我地決定如何轉變成更好的組合，並不是睇你的買入價、賺蝕數。而是睇這企業的質素，前景，這點才是最重要。
你持有的股票，不是無質素的，但有些增長力不算強，同時集中在某類，例如銀行股同時持有3隻，而都是增長力不強的企業，收息可以，但增長力不強，長遠對你的財富增長一定不明顯。
所以，如果你想組合有更強的增長力，除了將之前同你講，質素不好的股票賣出外，有些你持有的股票，如果質素不算好強，增長力不算高，都可以換成增長力較好的股，你不用著重買入價，因這只是一個心理因素。你可自行決定換那些股票，可以是重覆類別的、增長力較慢的、質素較弱的。
同時，你每月的可儲蓄部分，可以做月供股，這些月供股可以進取少少，因為你本身組合都是平穩增值類股，而就算你打算換入的，都是風險不高的股票。而月供股部分，則可以承受少少風險，因為本身月供的買入價平均，已有平衡風險的效果，所以，月供可以供平穩增值股+潛力股。
小朋友部分，因為你打算佢讀書時用，離現時的時間不算好長，最好就是以平穩增值來進行，保持儲$1000，月供盈富（2800），已是較平衡的笨略。
（對照龔成信箱：Q8744）
9.中銀香港（2388）
呀Sir你好，我是你學生。想問下中銀上面果個資產負債表上面，股東資金＝股東權益（係錢黎）但睇返上面分拆有兩項，一個叫儲備，另一個叫股本但以我所以股本係數目黎，唔係錢，但點解加埋儲備又可以變左做股東資金？
另外想問下你之前做銀行業點解見有啲Post話做銀行都禁止佢地買股？我依家都係初初入行做緊銀行怕如果要審批先買股，咁咪封左我一道致富門？
龔成老師：
中銀香港（2388）這類銀行企業的報表，其實是較難分析的。
佢「股本」的意思，不是股數，而是指股東的資本，佢在股東權益分左兩部分，分別是「股本」同「儲備」，股本你可以簡單理解，是這企業最初成立時，股東最初投入的資金（實質上未必是），而儲備就是多年來賺得的資金儲起的部分（實質上未必是），你大約可以這樣理解，所以，股東權益就是屬於股東的部分。
唔同銀行有唔同的做法，大部分銀行都比員工買股票，但就有限制。
例如我過往做的銀行，每次買賣股票都要申報，同埋買入後，約2星期都唔可以賣出，即是唔比我地短炒。這兩個限制對當時的我來說，都無問題，所以我仍然可以在當中，以萬元月薪累積到數百萬，所以，你的致富路仍在，不用擔心。
（對照龔成信箱：Q8745）
10.中國外運（0598）
成老師你好，00598點睇？
最近留意緊
龔成老師：
中國外運（0598）本質不算差，但行業好受貿易等因素影響，因而在業務上有一定的波動性，股價波動亦較大。
以現時的市值約$60億計算，的確不貴，存有一定的投資值博率，股價已反映了當中的風險。長期唔敢話佢好正面，只可以話佢現時估值不高，所以都有投資價值，如果能承受中短期股價波動風險，長期持有，咁基本上可投資，但未必值得太大注，始終質素未去到好高。
（對照龔成信箱：Q8746）
