診所職場事 經一專欄 寶豬趣聞 Call的士 珍寶豬

【經一專欄】診所職場事 【寶豬趣聞】Call的士|珍寶豬

職場

廣告

經一專欄診所職場事】有日一位小姐急急腳嚟到診所。

佢行埋嚟同我講:「我call咗的士呀」
我個位似的士站嗎?
我:「吓?」
佢再重覆:「我話我call咗的士呀」

撰文:珍寶豬
我:「請問你call咗的士同我哋診所有咩關係呀?我哋冇的士喺度呀~」
佢:「即係我趕時間囉,白痴,架的士就到啦,我要即刻睇呀」
我望望出面等緊睇醫生嘅病人,再同小姐講:「我可以同你登記,不過都一樣要等㗎,你前面仲有四個人~」
佢望望嗰四位病人,再擰轉頭同我講:「佢哋睇遲陣都唔會死㗎啦,我睇先啦」
你睇遲陣會即刻死呀?好嚴重嘅病呀!不如叫的士司機直接車你去醫院啦~
我:「睇醫生要排隊㗎,個個都一樣係唔舒服嘅~」

佢『嘖』咗一聲之後,拎出身分證:「耐唔耐㗎?我架的士就到㗎啦」
我:「都應該要至少廿分鐘至半個鐘嘅,你叫司機預返時間啦~」
佢:「真係麻煩」

登記後,佢安靜地坐喺度等嗌名~
佢電話響起:「喂?唔係我唔想即刻嚟呀,係個姑娘唔俾我睇先咋,佢嗌你慢慢等呀」
做咩又入我數呀,我明明叫你通知司機預返時間㗎喎。
佢再講:「我點知等幾耐啫,又唔係我唔想睇先,係姑娘唔俾咋嘛,佢都話知你死,你唔好走呀,我一陣行出去唔見你架車我port到你以後的士都唔駛揸呀!」
佢:「喂?喂?喂?死人的士佬呀,cut我線?」
佢抬頭見到我望住佢,佢同我講:「望咩呀?port埋你呀!」

好呀,我都好想知你用咩理由port我~係咪我令你錯失咗地球上最後一架的士呀?