上市 投資有道 牛仔褲 招股 美股 市場 證券交易所 投資有道

90後揸$120萬現金 想買港股 可揀中銀港鐵恒基長建|龔成信箱|經一專欄

投資

廣告

經一專欄・中銀】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括房託、優質股 、月供股票、平穩增值股  、潛力股,以及財務自由等提問。

撰文:龔成|圖片:新傳媒資料庫、unsplash

1.月供股票

Hi,Sir,講下background先,我29歲,大約有120萬cash + 100萬在股票上,但以前投機心態強,買左好多唔係咁好的股,宜家想整理下個倉 + 月供股票。我目標希望40歲可以財務自由,宜家月入3-4萬(sales job 唔太穩定)

我有d問題想問:

1. 我股票好主要有2007,183, 222, 460, 498, 598, 700, 1382, 3378, 388,296 等等
邊d可以keep, 邊d應該cut loss算數?

2. 如果月供股票,有無咩建議?(本身有每月供緊3,000保險公司啲基金)唔該曬,萬分感謝

 

龔成老師:

1)我地決定繼續持有一隻股票與否,最重要是企業的質素、前景,你的買入價不是關鍵位,買入價、賺蝕,都只是一些心理因素。

所以,你要按企業的質素、前景,去決定邊啲持有,邊啲賣出。你要建立一個「優質股組合」,這樣對你長遠財富有最大的正面影響。

碧桂園(2007)都算有質素,但有風險,不宜持有太多。

閩信集團(0222)、廈門港務(3378),算是不過不失,可持有,但不要太大注。

宏輝集團(0183)質素中等,可暫時持有,等有較大反彈時賣出。

四環醫藥(0460)、保華集團(0498)、無乜質素,最好賣出。

中國外運(0598)英皇娛樂酒店(0296)算是不過不失,可持有。

騰訊控股(0700)、互太紡織(1382)、香港交易所(0388)有質素,可持有。

2)你最好供翻啲優質股,你組合好散,同時持有股票質素唔算高,你可以供盈富(2800)、金沙(1928)、中銀(2388)、港鐵(0066)、恆基(0012)、長建(1038)等。你增加翻啲優質股,長線持有,咁會比較好。

(對照龔成信箱:Q8759)

中銀 90後 港股 港鐵 恒基 長建 龔成信箱 經一專欄
【經一專欄・中銀】圖片:unsplash

2.潛力股

你好成哥,我想問下每個月流動資金得$1萬,有無可能可以係4,5年內賺取$200萬

 

龔成老師:

每月儲$1萬,5年本金為$60萬,要滾存到$200萬,比較困難,因為較合理的回報是滾存到$100萬。當然,難不是不可能。

你可以在投資上進取少少,例如集中投資潛力股,只要在選股、企業估值、投資時機這些技巧上把握得好,要在5年裡,財富滾存到$200萬,我相信是有可能,但你就一定要付出。

首先是多學習,令自己有上述所講的技巧,你要盡最大努力學習,這些技巧決定你能否早市場一步找到潛力股,之後就是不斷分析股票,選股。我相信要滾到$200萬是有可能的,但要睇你願意付出的程度。

(對照龔成信箱:Q8757)

3.房託

請問地產、房託, 是否同一行業?
因sir話每行業不宜超過組合之30%

請問 548 177 邊只較佳?

 

龔成老師:

其實是同類的,只是性質有少少不同,一個是收租,一個是做買賣,所以是同類。

深圳高速公路(0548)、江蘇寧滬高速(0177)都是有質素的股票,長期收息不錯,但都不要對股價有太大的期望。質素真係好近,前者可能好少少。

(對照龔成信箱:Q8758)

4.瑞年國際(2010)

早晨,sir 最近發現隻老千2010瑞年國際 2015年前一切數據 業績都好美好 毛利極高 負債極少,之後比人踢爆佢做數 我留意到佢2015開始會計師樓由德勤用開元信德係佢轉壞警號

請問除左依樣 仲有冇地方可以睇到佢轉壞?我怕有機會買到依類股
Thanks sir!

 

龔成老師:

瑞年國際(2010)現時已經停左牌。其實當佢轉核數師,已經是一個極大的訊號,另外,我地亦可以睇現金流量表,你會見到佢近年的現金流情況,比過往差左,不過佢早幾年未見有這問題,所以當時都好難見到。

呢啲情況真係要好仔細咁睇,同埋最後都唔易睇到,當你見到3個報表的數字,有D唔協調的地方,就會對這企業有戒心。

另外,一些市值較少的公司,都要小心啲,之前唔少出事的公司,一般都市值唔大的。

(對照龔成信箱:Q8760)

5.財務自由

老師你好,我係你股票班學生。

現每月扣除供樓支出外,可儲$20,000, 會分注買入#3, #1928, #2388, #1211, 希望10年後有不錯回報及長遠達到財務自由。多謝你! 期待上你嘅股票中級班!

 

龔成老師:

其實我過去面對的,都是一般香港人面對的情況,所以我好明你的情況,同埋應該點去合理地將財富增值。

同埋,我亦相信我做到的,根本其他年輕人都可以做到,所以你見我課堂不斷鼓勵大家,同埋會盡量令課程適合初階投資者,等你掌握得到。

有心唔怕遲,我相信你只要保持現時的一團火,之後都可以儲到相當的財富。

你現時每月儲$20,000不錯,記得堅持,如果可以的話,加上盈富(2800)去月供,組合會更平衡。

同埋,要預留現金,因為當大跌市時把握到機會,財富就會有明顯增長,記得在這段時間內,好好選股、多睇年報、多用課堂的「企業評估表」去分析。加油!祝你早日財務自由!

我希望年中開到進階班。

(對照龔成信箱:Q8761)

6.優質股

龔sir,我係較早前我買左你本股票聖經黎睇。書中都有教到買股票最根本原理,同埋買股要選一些優質股,企業質素沒有變壞,核心價值還在,就可以長期持有。

在上年大牛市恒指最高點33000, 係個時候我知道金沙股價去到49蚊(股價高於企業內在價值,已高估),當時我持有2手金沙,當中差價有利潤可以獲利,不過在當時我沒有沽出。

現在大市回到合理區,有部分優質股回到合理區。 想指教一下在大牛市況中,沒有賣出股票從中獲利,在這個買賣股票過程中係咪正確?

因為我都知道龔sir你持有金沙,會不會在大牛市狂熱期時候考慮賣出優質股,等待優質股返回合理價再買回

 

龔成老師:

明白你所講的方法。

首先,我地一定要投資優質股,長線持有,這是不變的,我自己都有投資金沙(1928),在之前高位,我都無賣出。

原則來說,長線持有是最好的,但如果股價處於嚴重高估水平,都可以賣出的,但這不容易做到。

賣出後等佢跌再買入,當然有最大的得益,但除非你好肯定你賣出後會下跌,否則,你賣出後如果一直升,就變相放棄了一隻優質股(事後孔明你當然覺得當時要賣,但當你身在其中,情況就不一樣,所以要理性分析,自己是否真正能做到)。

我之前做銀行,見到唔少人在$2X已賣出港交所(0388),之後升左10倍,無佢份。

長線持有優質股是最賺錢的,如果大急於中間賣出,永遠都賺唔到大錢,所以,我地一定以長線投資為基礎,但中間都可以有買賣,不過就要分析得好準,好確認當時股價已貴,並分析到當賣出時的獲利,足以抵償放棄了優質股的潛力機會成會成本損失。

(對照龔成信箱:Q8762)

7.月供股票

你好龔sir, 本人就黎25歲, 一年半工作經驗,從事測量行業, 每月薪金扣埋強積金每月約17k, 呢兩年內好關鍵, 因為如果考到牌薪金可以跳至30k左右

想問兩個問題:

1. 作為股場新手,剛開了中銀同匯豐嘅投資戶口,想問下站係”月供股票”立場,邊間銀行收費划算? (持有多種股票買賣嘅收費, 存倉費,手續費, 以股代息收費等等)

2. 扣除所有開支, 每月有$4,000流動資金 (平常開支, 政府學債同家用合共為$13,000), 假如我想30歲前儲到100萬, 未來呢5年應該採取乜野策略?

 

龔成老師:

1)聽網友講,匯豐同南洋商業銀行,月供方面較平宜,但你都可以多比較先進行。

2)因為這刻每月可儲到的資金不多,所以只能盡力運用,但如果你日後收入能提升到$30,000,相信成功機會十分大。

這刻只有盡力做,當中將$2,000去做月供股票,盈富(2800)$2,000,盡量幫你財富有一定的增值。然後每月餘下的,就儲現金,這部分有點重要,你唔好心急投資。

你先努力提升投資知識,在選股、企業估值、投資時機上學習,同時等大市回落,只要你能把握到這機會,財富就有較大的上升。

到你日後收入增加時,會立刻加大儲蓄及投資,要完成目標是可以的。

(對照龔成信箱:Q8763)

8.香港樓

我想問樓價真的會大跌嗎,有點擔心

 

龔成老師:

香港樓一直處貴的情況,所以中短期受各種消息影響而出現回落,是正常的,無人知中短期會跌多少,但回落的機會不少,同時會比較波動。

不過,香港樓始終是供應唔夠,所以長期來說,仍處於向上的水平,所以又唔洗太擔心。就算中短期下跌,好某一個,已經有支持,因為需求一定存在,問題時在現時處略貴樓價的情況下,需求不明顯,但當到達平衡點,需求就會出現。

同埋,如果你用「財富分配」、「持有資產」的角度去持有物業資產,其實唔需要擔心樓價格,因為這只是一個「價格」,唔會影響到當中的價值,你持有物業,有持續現金流,咁就得。

(對照龔成信箱:Q8764)

9.金沙(1928)

龔成老師,我用金沙2017年報計算,佢淨負債比率 (銀行貸款及其他貸款-現金 / 權益總額 ) 約69.7%,對比銀如無淨負債比率,金沙會否存在風險?

就算不對比銀如,淨負債比率高於60%也屬甚高。我是想買此股作收息,但佢流動借貸愈來愈高,還完款再加派息,又會削弱股東權益,請問你如何分析呢?

佢會否支持不到會每派HKD1.99呢? 謝謝

 

龔成老師:

金沙(1928)的負債比率的確有少少高,但只是少少,如果你有上過我的股票班,就知佢超過了指標少少,不過,班中亦同時教有其他指標同時分析,這樣先得到立體的企業風險與價值。

例如其中一項就是現金流,金沙的現金流相當強勁,這足以抵消負債上的風險,同時,現金流強勁可以確保股息上的穩定性。

所以,整體上佢仍是好優質,不影響派息,但負債比率高左,的確會令風險度提高左少少,企業會因此而扣左少少分。

(對照龔成信箱:Q8767)

10.比亞迪(1211)

龔sir 你睇1211 合理價個範圍係幾多左右 同埋 1177 你又認為合理價個範圍係幾多左右?2隻我都未持有。只不過等跌市才買入

 

龔成老師:

比亞迪(1211)在$4X-6X都合理,這是一個可以買入的區域,但要留意,這股比較波動,同埋中短期未必得,所以買入時最好分注,唔好心急入,同埋這是潛力股,是有風險有回報的類別,因此,唔可以太大注。

至於中生製藥(1177),這都是潛力股,之前處貴的水平,現時處合理水平,但仍未算平,這股都要分注小注咁慢慢入,唔好急。

兩隻現價都可入,但你要明白佢股價波動,所以要分注,同埋唔能夠太大注。

(對照龔成信箱:Q8766)