診所職場事 【寶豬趣聞】煮死佢｜珍寶豬｜經一專欄

撰文：珍寶豬

診所職場事 【寶豬趣聞】煮死佢

我唔敢打開個盒，多年工作心理陰影凝住佢一定係屎：「ER…請問先生咩事呀？呢盒咩嚟？」
佢重覆：「同我煮死佢呀！」
唔好意思，本診所並不提供任何煮食服務，自攜食材一律當屎。

我：「唔好意思呀先生，我哋…診所嚟」
佢：「你白痴定我白痴呀而家」
一定係你。

同我煮死佢先！

我：「如果你要睇醫生嘅，我同你登記啦」
佢：「你都要同我煮死佢先！」
頂你個肺，呢盒乜鬼嘢講到咁生猛係都要人煮死佢呀，我真係想一手拎起掉死你呀！

我：「呢盒係咩嚟㗎？」
佢：「粟米斑腩飯呀！」
我：「咁佢死晒啦，冇得再死啦～」
佢：「我係嗌你煮死呢間嘢呀！」
唏，話要講清楚嘛～

我啱啱一食，臭㗎

我：「哦？你食完唔舒服呀？」
佢：「係呀！我今日晏晝買㗎！」
我望望鐘，我都就收工，即係已經就快八點鐘：「食完肚屙？作嘔？」

佢：「我啱啱一食，臭㗎！」
你晏晝買咁夜先食，先生你真係一個大忙人啊，舊斑腩等你吔佢等到臭都好正常呀。

我：「你擺喺室溫呀？」
佢：「唔通擺喺冰箱呀？我都即刻食啦，仲雪乜呀？」
…你係咪有幾個鐘時間俾外星人吸咗走呀？晏晝買夜晚食都叫即刻呀？

我：「ER…你俾身分證我，我同你登記咗先呀」
佢：「咁盒嘢點呀？你要煮死佢㗎」
我：「交俾醫生，呢啲醫生處理…」
佢：「佢係曉煮至好呀！」
我成功登記了，醫生我冇趕走個客係咪好叻豬先？
最後，醫生做咗趕客嗰個…