診所職場事【寶豬趣聞】廁所長 ｜珍寶豬｜經一專欄

撰文：珍寶豬｜圖片：電視截圖

診所個廁所暖㗎喎！

好快佢出返行埋嚟登記處同我講：「個廁所暖㗎喎！」
我唔知點答好：「哦？係呀？」
佢：「你哦咩呀？係咩呀？喂，個廁所暖㗎，上手邊個用過呀？」
我：「唔好意思呀太太，我唔清楚呀，我冇留意個洗手間邊個用過」
佢：「你唔係守廁所㗎咩？咩人去你唔知㗎咩？」
…我頂你呀。

邊個咁冇公德心坐喺度屙

我：「我係登記嘅」
佢：「我唔理你啲咩登記啦，你可唔可以去搞搞個廁所先呀？頭先我一坐落去暖嘅嚇死我呀，邊個咁冇公德心坐喺度屙呀？坐到暖晒好核突呀！」
你囉，如果你唔係坐你點知個廁所係暖。
我：「嗯，或者太太你等陣再去過啦」
佢：「我就係想去廁所呀」
我：「或者你出去出面嘅洗手間啊～出面都有㗎」
佢飛快地離開診所，睇嚟佢應該急到爆～

「你什麼都不是呀」

過咗陣，佢比頭先更嬲咁返嚟，佢都未行到埋嚟已經開口：「出面嗰個要排隊呀！你咁都叫我出去？我仲未去到呀！」
我：「我哋個洗手間而家應該冇人用緊，你可以去咗先呀」
佢又飛快地衝入診所洗手間。
到佢完事後，佢又行埋嚟：「我同你講呀阿妹，以前我去親啲廁所我見人服務好我會俾貼士㗎，我俾貼士都唔手軟㗎，但係對住你我真係俾唔落手呀，一蚊都唔會俾㗎啦，你去人哋啲高級廁所望吓人哋係點做啦，阿妹你有排學呀！」
我：「我係登記嘅」
佢：「你什麼都不是呀」
你是二等的屎，你會唔會係屙屙吓屎屙爆咗個腦呀？