月入4萬有100萬首期 大呻買樓難 「你想買個車位都未夠班啦」｜網民熱話

100萬首期月入4萬難買樓

樓主以「有一佰（百）萬，月入四萬都買唔到樓！？」為題出帖，表示有朋友有100萬首期，想喺「大西北買個兩房全新樓，居然都搵唔到」。

又問究竟係樓價貴，還是一百萬「比得首期來多唔夠比厘（釐）印同律師費，真係悲哀！！」

此帖一出，引起大量網民回應。

買唔到係正常！

不少網民都表示，樓價近年的確升咗好多，樓主朋友只有以上條件買唔到樓係正常！

有網民就話：「月入四皮今日只係蛋散一名，祈（期）望過高喇！」

「你『朋友』唔係諗住宜家既（嘅）一百萬係好多錢呀嘛？！」、「你想買個車位都未夠班啦」

更有網民回覆樓主：「100萬美金就可以係香港買到220尺，100萬港紙只夠買22尺！」

買二手樓好過

有唔少網民勸樓主買二手樓，「有100萬首期在大西北買二手根本仲大把選擇，你係都要買新樓，當然買唔到啦」

有網民覺得以呢位朋友嘅條件買新樓太離地：「買二首（手）ok喎。首期小（少），人工又唔高，點解仲咁離地要新樓呢？」

「點解一定要全新？有心買嘅話，二手有乜問題？」

更有網民表示有朋友有類似情況，他表示在2014年700萬可以買新界東三房時，朋友冇買，寧可出25,000元去租個三房，直到今日新界東三房已經過千萬。

「佢已經租咗第六個年度，計佢未加租已經貢獻比業主180萬嘞！年紀仲已經登陸添!」

有網民就很中肯的表示，「入息4萬話多唔多，話少又唔少，但供樓加生活開支的確有點辛勞。」

見到各位網民嘅回覆，樓主都回應話覺得好諷刺！

「昨晚和朋友研究過，原來大西北一房都已經買唔到，新少少二手兩房都唔得，首期加厘（釐）印都要佰（百）鬆d萬，又要買傢俬，又要比什費，仲未計裝修。」

「百萬富翁？呢刻覺得，真係諷刺！！！」

樓主最後補充，「如果我係佢，咩兩房都買住先，一鳥在手，總好過百鳥在林。」

擁有百萬已不算富翁

事實上，今時今日，你擁有百萬，已經不算是富翁了！

有網民指：「百萬富翁已經係20年前嘅事。依家係百萬起跳」

其他網民精警留言：

「通常有d錢既人，都會覺自己買不到樓，我有朋友做老師，又有朋友做核數師，無乜興趣又有積蓄，都話自己買不到樓，因佢地太有要求」

「唔關樓價事，心頭高儲幾多錢都唔會上到。依家D後生一入市就又要新樓，又要會所，又要市區/鐵路上蓋，又要附近方便購物。嘈買唔到樓喎？食蕉啦」