診所職場事 【寶豬趣聞】Miss乜 | 珍寶豬 | 經一專欄

拎藥後，佢望望張病假紙：「喂」
我抬頭問：「有咩事？」
佢指指張病假紙：「呢度唔係咁啱喎」

撰文：珍寶豬｜圖片：電視截圖、unsplash

「寫miss乜就得啦」

我望望佢指住自己個名：「你個名寫錯咗？你俾俾你身分證我對一對呀」
佢：「錯就冇錯呀，唔係咁啱咋」
你知唔知自己講緊咩呀？
我：「即係邊度唔啱呀？」
佢：「我覺得唔應該寫晒我成個名出嚟，寫miss乜就得啦」
我：「吓？病假紙唔可以㗎，要寫全名㗎～」

寫全名好冇禮貌喎

佢：「我公司得我一個姓乜㗎咋，啲垃圾細公司嚟咋嘛」
我：「係我哋出病假紙一定要寫病人全名～」
佢：「點解呀？寫全名好冇禮貌喎」

我：「因為呢張係一個證明，一定要寫清楚嘅」
佢望望張病假紙：「寫我個名寫到打風咁，清咩楚呀？」
咁係醫生手字問題，我會同你反映返呢個問題㗎啦～
我：「但係都係全名嘛，都睇到你叫咩名嘅」
佢：「你同我寫返miss乜啦，我唔要成個全名喺張紙度呀，個名咁樣衰點見人呀」
咁如果個樣衰呢？

我：「呢張你淨係交俾公司相關嘅同事處理啫，唔會貼大字報咁㗎嘛，小姐你真係唔駛咁擔心喎」
佢：「你俾枝筆我！」
我望望佢旁邊就正正插住堆筆喺度：「呢度咪有好多筆囉？」
佢是但拎起一枝，手起筆落向住自己個名大大力刪：「你唔做我做囉！」

我：「…你返到去嘅話，公司係會唔受呢張病假紙㗎，到時你又要再嚟㗎咋～」
佢：「我係miss乜呀，喺公司地位數一數二㗎！」
小姐滿懷壯志咁離開診所。
三日後，佢返嚟：「你寫過張假紙俾我呀」
啊～數一數二呀嘛？