要把握一個買樓黃金時間 錯過會好後悔 | 樓市入門
筆者： 「而家係買樓好時機喎。」
朋友： 「唔買住啦，樓價咁貴！」
筆者： 「調整咗唔少啦，租金回報隨時4、5厘，唔貴啦！」
朋友： 「2、3百萬買豆潤咁細，咪搞！可能遲啲再跌呢！」
筆者： 「我同同學買嗰啲，租金回報成5厘，唔跌得好多啦！」
朋友： 「唔啦，我都未有需要，同屋企人住得幾開心丫。」
筆者： 「始終都要成家嘛。」
朋友： 「到時先算啦。」
撰文：1％ Anthony
4、5年後的今日，朋友Ｋ年過40，奉子成婚，皺晒眉頭…
朋友： 「早幾年你帶我睇嗰啲豆潤單位，而家賣400萬！」
筆者： 「係呀，呢幾年樓價升咗好多。」
朋友： 「有老婆、有仔，起碼兩房先夠喎。」
筆者： 「300幾呎，有番咁上下空間，預450萬穩陣。」
朋友： 「早知嗰陣聽你講啦，300鬆啲萬就買到。」
筆者： 「其實2016年都有機會嘅，不過你又未有需要。」
朋友： 「450萬借唔到9成喎，借8成，首期咪成球嘢！」
筆者： 「買細啲、買舊啲囉，400萬兩房都有嘅，幫你搵啦。」
朋友： 「麻煩你，早知當年聽你講啦，好慘呀！」
很多朋友問：「應該幾多歲買樓？幾時係黃金時間？」
先撇除樓價升升跌跌，假設唔升唔跌先，純粹從個人出發…
又撇除有父幹母幹先，如果屋企俾，一攞身份証就去買樓啦！
假設20出頭大學畢業投身社會，最初幾年可能仍在摸索階段，在職場上仲未上力，收入唔多，再加上要還Grant Loan卡數，要儲首期買樓的確唔容易，就算俾你儲到首期，人工都未必夠過壓力測試。這幾年就專心發展事業、努力賺錢吧！
除了工作以外，還要好好培養自己的理財觀念。
例如要懂得量入為出，唔好衝動搬出去住，筆者明白私人空間好重要，但一濶三大，搬咗出去就好難再儲到錢！
又例如要好好學習投資，年青人吸收能力特別強，例如股票、基金、數字貨幣等，都是可以小試牛刀的投資工具。
當然最重要是開始學習買樓知識，要知道樓價水平、按揭等，定好自己的目標與計劃。
30歲出頭，是買樓的黃金時間！
如果做好之前的步驟，事業上應該有點成績，有點積蓄，借盡按揭應該可以勉強買到一個上車盤。可能你仍然未有需要…萬萬不可以因此而逃避！正如朋友Ｋ…甚麼時候有需要？結婚生仔！當你有需要的時候，已經要兩房其至更大的空間，你會發覺…很遙遠！
先從一個細單位起步，幾年之後，本金累積多了，樓價也升了，賣出單位隨時可以取回逾100萬再樓換樓，例如帶朋友Ｋ睇的單位，後來另一位同學以320萬買了，今天約450萬，升幅連本金就有近150萬，就有足夠的本錢換大一點，又或者變兩間了。
假設每4~5年走一轉，到了40歲出頭，已有一定資產。
40歲出頭…是錢搵錢的黃金時間！
以過往同學們的經驗，當時沒有15%辣稅，10年時間大約都可以變到3、4層樓，做包租公了。
今天有辣稅，要多花點心思，除了一間自住樓，另外幾個單位可能是大陸樓、工廈等，變化很多，難度雖然高了，但仍然有機會可以倍增資產。這時候你已累積一定經驗，可以再將資產慢慢壯大，逐漸步向財務自由了。
相反如果這段時間才買第一層樓，絕不是好事！
事業發展順利還好，如果不順利，遇上中年危機，壓力就很大了。不過買到總好過買唔到，這是買樓的最後機會了！
不然到了50歲，如果工作不順利，借按揭都唔容易，想買都未必買到了。
