大灣區秒殺筍盤 50萬人仔買800呎兩房單位

戰友： 「最近有咩筍盤？」

前輩： 「啱啱出咗深圳，羅湖揸車去個零鐘，有個盤好筍。」

同學： 「係咩？點筍法？」

前輩： 「之前賣9,000幾元（人民幣・下同）／米，最後一期賣6,000幾元／米。」

文：1%Anthony

筆者： 「即係600元/呎？平咁多？即是大概幾錢？」

前輩： 「兩房單位大約800幾呎，大約50萬，即賺！」

同學： 「質素得唔得？發展商信唔信得過？」

前輩： 「萬科新盤，你話呢？」

同學： 「抵喎！星期六得唔得閒帶我去睇吓？」

前輩： 「仲星期六？聽朝9點開盤啦！」

筆者： 「聽日行唔開添，最遲幾時要上去？」

前輩： 「幾時？今晚要上去啦！聽朝一早要去排隊。」

筆者： 「預計賣到幾時？」

前輩： 「你估係香港咩？呢啲筍盤，一、兩個鐘就賣晒啦！」

同學： 「嘩！會唔會買唔到架？」

前輩： 「我同個老總好熟，叫佢留幾個都得嘅。」

同學： 「咁行啦！依家上去！」

大約兩年前的事，同學已經收樓，並且已經租出了。

以月租2,000元，樓價50萬元計，租金回報接近5%。隨着大灣區概念打得火熱，區內同級數的新樓，已超過2萬元／米，短短兩年已經翻了3倍，50萬元的單位，市值已經160萬元了！

啟發一）真正筍盤，很少送到咀邊，多數要自己發掘，自己搶！

當日筆者有事行唔開，睇住前輩與幾位同學執到筍盤，勁揼心！內地人買樓就是這樣瘋狂，日光！秒殺！

幾百個單位眨吓眼就賣晒。經常有網友問盤，市場上有不少國內樓盤有展銷會、有睇樓團，不能一概而論，但正如前輩所說：「如果真係好筍，自己都唔夠賣啦，使乜攞嚟香港賣？」都係跟前輩去搶信心大啲，哈哈！

啟發二）點解突然平咁多？…原來跟調控政策有關！

香港有調控，全世界都有，大陸亦不例外，其中一個調控政策稱為限價，即是某個地區，或某個樓盤的均價，不可以超出某個水平，據樓盤老總說，在商言商，他們都不想平賣，一、兩個鐘就賣光，可想而知開價是開平了！

那為甚麼要平賣，還要一劈就是三成？因為這個樓盤之前幾期，搶得太熱烈，賣貴了，上頭責難，於是唯有最後一期賣平啲，拉勻價錢勉強唔超標，上頭才能跟政府交待。

啟發三）點先捕捉到這些機會？…到內地闖識人好過識字！

大陸地大物博，幾百個城市幾千個樓盤，點睇到咁多？於是向前輩請教，前輩從事物流業，算是第一代上大陸買樓投資的香港人，炒炒賣賣已經30多年。一般香港人的目光，局限於珠江三角洲、大灣區。

然而前輩的投資團隊，放眼全國，筆者之前跟他到不同城市考察，眼界大開，再加上過去幾十年跟各有關單位打交道，人脈網絡廣闊，以這個盤為例，唔係識得老總又點會收到風？除了機會，大陸買樓投資亦有很多陷阱，遇上法律問題、糾紛如何處理等等，一句講晒，識人好過識字。仲有冇機會？大陸咁大點會冇？