18歲跟林作搵食3個鐘賺2萬 IG曬雪茄茅台私人會所室內吸煙 網民：你好正
「只要肯做 的確搵到錢 搵到大錢」
該網民＠mulatracy_在自己IG帳號以「18歲 你會係邊 做梗咩？」為題發表公開貼文：
（編按：原文全篇沒有標點符號，為方便讀者閱讀，小編忍唔住加返，但申利：啲斷句係跟足原文所示；文中標註的人物，除林作以外其他以ＸＸＸ代替，粗口已加馬賽克。）
「呢個問題，唔同人會有唔同答案，但我肯定離唔開玩同埋錢，18歲嘅我，都係貪玩，想搵大錢，但係空口說白話冇意思，我曾經貪黑起早，番跟車，番貨倉，以勞力同努力換金錢，但係以時間換金錢 大概係一樣最蠢嘅事。」
「係sem break嘅時候，有一刻我係貨車上面，受夠付出同收入唔對等嘅生活，而我見到@jolaminsurance internship program，可能唔少人對保險有負面嘅睇法，但我覺得，保險點都比做咕喱好吧。」
「由第一日面試到入職，我唔想講任何虛情假意嘅說話，但我上線ＸＸＸ（編按：馬賽克）同林作 @jolamchok 的確幫做（咗）我好多，一方面明白到保險係有原則，唔係用上一代壞手勢嘅方法去做，另一方面，裝備好自己，好好打拼自己嘅一番成就。」
「好好彩，最後我用三日，得到左20k 嘅收入，唔算好多，但無可否認，只要肯做，的確搵到錢，搵到大錢，唔係時薪$50 $100，而係三日，三個客，total3個鐘嘅meeting，我得到20k(~$6500/hour) That’s what I call MONEY FUＸＸING MULA。」
「冇諗過可以室內吸煙」
「所以我決意努力做好自己嘅保險業務，以上只係搵大錢，加入ＸＸＸ嘅團隊，令我體驗到我18歲發夢都夢唔到嘅生活，當我努力過後，as a team 食一餐好嘅絕對唔會少，但以下嘅體驗，係同我以往嘅經歷係兩個次元。」
「K11 大部分人唔會陌生嘅商場，但18歲嘅我唔知8樓members only 嘅Gentry Club 我可以踏入，我手上唔再係$62蚊嘅香煙，而係$7000蚊起跳嘅San Cristóbal de la Habana 嘅雪茄(最簡單我冇諗過可以室內吸煙lol)，食飯飲嘅唔係幾十蚊嘅藍妹，而係$6000蚊嘅茅台，而呢一切都係我揀左保險，揀左努力，我可以，個個都可以。」
「而食飯未能滿足我地team嘅風氣，Ｘ生再帶我到Rosewood 55樓嘅Carley&Co.，當係55樓望出去，我耳邊聽到嘅係「努力d 俾心機 有一日你可以打拼你嘅天地。」呢一下我明白到，我揀保險，的確有錢，有得玩，而今次，我真係付出幾多得到幾高，唔只係錢，但有地位，權勢，而且保險唔係打工，WE ARE THE FＸＸKING BOSS UNLIKE THOSE WORKER.」
「18歲 我享受梗3日$20k
18歲 我享受梗private club嘅快樂
18歲 我享受梗55樓俯視香港
我可以好自豪嘅講 我係林作保險一分子
最後有任何關於保險 無謂個人疑問 定加入我地 無任歡迎
@jolamchok
@jolaminsurance」
網民：最好每3日都搵到3個客啦
除了上述勵志潮文之外，樓主又貼上團隊合照及雪茄、茅台、私人會所等照片，文中更公然透露可以在室內吸煙，文章被網民轉載到連登討論區後，引起廣泛討論：
- 「3日先兩萬蚊，有冇窮到咁，尋晚SQQQ炒波幅都執多過你」
- 「最好每3日都搵到3個客啦」
- 「留名等睇一年後轉行做返咕哩」
- 「著短褲波鞋T-SHIRT邊個同你買保險」
- 「果3個客，係咪阿媽，阿爸，同一個好蠢嘅朋友」
- 「永遠都係讀唔成書既人吹自己搵幾多錢」
「另外佢都係有人帶先入到Gentry club 講到個membership係佢俾錢咁，雪茄錢同矛台錢咪又係人哋比到你再俾錢個陣先岀post la」
- 「本身番跟車番貨倉字都唔識得多隻，點解要搵你買保險？」
- 「得幾個行業會咁露骨講自己搵幾多幾多錢，保險，同埋層壓式推銷」
亦有好心網民真心指，「(我當係真無作嘢先)，做保險開頭一定搵你既親朋戚友買，呃自己人點都易過呃外人，所以開頭賺多錢一點係不意外，但當親朋戚友都呃完後，仲有可觀收入嗎？」
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
