Netflix投資190億美元推70部新電影 卻未必夠Disney+鬥?|我做Marketing

Netflix投資190億美元推70部新電影 卻未必夠Disney+鬥?|我做Marketing

2020年初受疫情影響,大部份公司嘅生意都大幅下跌,唯獨內需、網購、網上娛樂/學習工具等,有不錯嘅利潤,當中Netflix亦係係疫情期間較賺錢嘅公司之一。

撰文:我做Marketing |圖片:Unsplash、Netflix 網頁

Netflix 將推70多部新電影 投資額高達190億美元

過去一年Netflix付費會員訂閱數目急速上升,一年內新增多達約二千多萬會員。Netflix計劃再下一城,早前更發佈將於2021年推出70多部新電影,並承諾每星期都會有新電影上架。

除此之外,更搵來眾多巨星坐陣,當中包括Dwayne Johnson、Gal Gadot、Leonardo DiCaprio等等。多位巨星片酬以千萬美元計,據估計單單今年於新電影嘅投資金額約高達190億美元(約1,472億美元)。Netflix今年高額投資,究竟回唔回到本呢?

解構Netflix商機 將推70多部新電影 投資額達190億美元 能否做到「高投資、高回報」?|我做Marketing
圖片:Netflix 網頁

Netflix收入來源單一 料Disney+將成主要對手

Netflix係一間收入來源較為單一嘅公司,主要收入來源來自會員收費,佔總收入約九成多,其次係DVD業務,估計亦有部份收入來自品牌/ 產品贊助等。業務十分簡單直接,多會員,多收入。雖然2020年其收入大增,新增會員至今仍不續上升,但對比去年Q1同 Q3嘅數據,新增會員已經開始放緩,如果業務上並無太大轉變,相信今年新增會員亦未必能如去年一樣急增。

加上今年投資額甚高,對於過份依賴單一產品/ 服務作收入來源嘅Netflix嚟講,風險相對大大提升。另一方面,新對手Disney+ 亦急速冒起,雖然2019年尾只於歐美巿場推出,但至今已有約8,000萬會員,加上其強大嘅電影庫如Marvel系列、Star Wars系列、Disney系列等,將成為Disney+利潤強大引擎。

解構Netflix商機 將推70多部新電影 投資額達190億美元 能否做到「高投資、高回報」?|我做Marketing
圖片:Unsplash

旅遊業復甦將對Netflix造成打擊?

其實一間公司以單一產品/ 服務作收入主要來源有好有壞,如果其業務強大、巿場需求高,公司發展可能會好快。但從另一角度看,單一產品會令公司過份依賴,抗壓能力隨之而變弱,如果外在環境出現少許變化,都可能對公司造成重大打擊。而且新增會員難以有持續而爆發性升幅,一旦出現持續性放緩,公司利潤增長就會減慢。

因疫情而帶動生意增長,亦有可能會因為疫情過後而流失生意。大眾留喺家中抗疫多時,唔能夠外出同旅遊,只要疫後旅行業回復正常,必定對Netflix做成一定打擊。

曾經一度負現金流嘅Netflix,去年收入大增收復失地。但究竟今年能否喺疫情下有「高投資、高回報」嘅成績,繼而進一步發展其他業務/ 產品,為長線增長舖路,大家拭目以待。

解構Netflix商機 將推70多部新電影 投資額達190億美元 能否做到「高投資、高回報」?|我做Marketing
圖片:Unsplash

延伸閱讀:Netflix業績出爐 用戶數歷來最多突破2億 上年最多人睇嘅劇集係邊套?

延伸閱讀:Netflix業績出爐 上半年付費人數增加2,500萬 惟估計增長將放緩 盤後急跌近一成

免責聲明:本專頁刊載的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。