劏房多客退租、賓館生意大減 租務市場唯獨一個客戶群影響較少|1%Anthony

劏房多客退租、賓館生意大減 租務市場唯獨一個客戶群影響較少|1%Anthony

朋友: 最近好多租客退租。
筆者: 係?通常係咩租客?

朋友: 單身租客又有,兩個人的租客又有。
筆者: 點解呢?唔使住咩?
朋友: 就係唔使,啱啱噚日有個後生仔,話搬番屋企住。
筆者: 咁又係,對佢哋嚟講,居住並唔係必需品。
朋友: 咁點算?
筆者: 平啲租囉,或者執執裝修,提供多啲增值服務。
朋友: 例如呢?
筆者: 傢俬電器、免費寬頻等等。
朋友: 都可以試吓喎。

撰文:1%Anthony| 圖片:中新社、新傳媒資料室

租舖、租樓受經濟下行影響

經濟下行,租務市場都受到影響。首當其衝的當然是商舖市場,大家都見,社會事件發生之後,零售氣氛差咗好多,外國遊客少咗,內地旅客更是斷崖式下跌,很多國內朋友,聽埋聽埋好多負面消息,覺得香港好混亂,如冇必要唔嚟香港。

除了遊客之外,之前幾個月的街頭衝突,本地消費意慾都明顯下跌,很多商舖結業,很多傳統旺區,例如尖沙咀、旺角等滿街吉舖,雖然最近氣氛稍為緩和,但投資者似乎未有信心回歸。事實上自由行的高峰期已過,再加上經濟轉營,網購越來越盛行,商舖市場短期內似乎難以重拾早幾年的風光。

租舖 經濟下行 影響
圖片:新傳媒資料室

住宅市場亦受到影響。身邊不少收租業主都有講起,家庭客市場影響比較細,一些兩房、三房單位的租務尚算穩定,只要減些少租還是可以租出去,一房單位有輕微壓力,因為不少公司都裁減人手,不過影響未算好大,只要減些少租,又會有一些生力軍,例如小情侶、小夫妻接力。

延伸閱讀:樓市回顧2019!三件大事影響你置業上車

劏房、賓館業務 生意大減

反而壓力比較大的,是開放式單位及分間單位,或稱劏房。據好幾位一直做分間單位做得很不錯的資深投資者朋友所講,一來近年做分間的人比較多,供應多了很多,二來經濟下行,很多租客都唔想花錢,就搬走了。例如很多上班族,一些剛出來工作不久的年青人,之前好境的時候,賺到點錢,就搬出來過獨立生活。

尤其是一些居住地方與工作地方很遠的上班族,例如家住元朗,但每天要到鰂魚涌上班,一東一西,一來一回,隨時要花兩小時的車程,車費也很貴,倒不如在公司附近租一個套房,多付幾千元,一來可以有獨立的生活空間,二來可以多兩小時睡覺,也不錯,於是就在工作地點附近租一個套房。後來經濟下行,賺錢少了,似乎沒有必要花這幾千元,不如搬回老家住,於是就退租了。以前放出街一、兩日就租得出,現在可能幾個星期都未必能租到出去。

至於有朋友經營賓館,情況就更為嚴重。訪港旅客數字急跌,很多三、四星的酒店都大幅割價,平日甚至低至兩、三百元就可以住一晚,質素、配套差幾皮的賓館,一直以來都是靠比酒店平而生存,現在又點會捱得住呢?如果租一、兩百元一晚,甚至成本都唔夠,如果唔租蝕得仲勁,於是有些就轉型做月租套房,有些單位是租回來的,甚至止蝕離場。當然亦有做學生生意的業主,不少大陸學生都提早返回大陸退租,相信情況都要維持一段時間,直至社會運動平息,經濟重拾正軌才會改善。

延伸閱讀:納米樓未來走勢絕對無運行?樓換樓「入場券」對年輕買家具吸引力