分享至

    情侶去到某個年紀 總會為將來鬧交

    一對情侶去到某個年紀,總會為將來而鬧交,想法既出入,生活既步伐,同最重要,對未來既計劃同憧憬。男孩大多數都係遲緩,女生總係焦急,猶其生於香港,大部份人都要用兩個珍貴既十年,再加唔食唔飲,唔著唔瞓、唔痾唔嘔,先有機會擁有一個430尺、屬於自己既空間,婚期就會演變成分歧。

    文章授權:逆行@電視汁撈飯

    因為住屋問題,我同女朋友呀敏爭啲分手,但係因為一位恩人,我依家仲可以同佢一齊睇住TVB,望住班禍中亂港既泛民議員瘋狂指責政府,望住佢地面目猙獰既咀臉,我就諗起兩個星期前喺譚仔呀敏對我既指責。

    「Steven,不如…我地…分開下..」

    從呀敏吞吞吐吐既語氣,加上由「BB」轉做叫我「Steven」,我感受到佢比胡師傅更掙扎。

    「點解呀?!」

    「我唔想再咁辛苦啦..」

    「你講咩呀..我唔明喎」

    我自問對呀敏從一而終,真心真意,管接管送,日日個幾鐘頭車都送佢返屋企,睇愛情動作片永遠搵返個似佢既主角,諗住一儲夠錢就同佢買樓結婚生仔,廝守終生。

    「你唔明!你唔明!你明唔明我唔想日日逼地鐵然後延誤成個鐘,我唔想結婚都要租樓住,我唔想再食譚仔呀!!!」

    呀敏突然提高語調,果個「譚仔呀!!」差不多算是聲嘶力竭,連譚仔姐姐都忍唔住望哂過黎,呢一刻,我覺得自己有啲似廣告入面既馬明。

    「你驚譚仔俾人收購左個味會唔同?唔會架傻豬,馬明都話唔會!」

    「唔係馬唔馬明呀!你明唔明,係我地幾時先買到樓結到婚呀?我唔想再同屋企住啦!」

    「嗯..我..明啦..」

    「算啦Steven,我睇唔到我地既將來,我啲friend都講緊結婚,我地呢?」

    「我有儲錢架」

    「要儲幾耐呀?依家有幾多人買樓唔係靠父母俾首期架?」

    「咁我都有申請公屋丫」

    「等4.6年呀,不如等中六合彩啦!」

    「我都有買六合彩架!」

    「講極你都唔明!係我感受唔你為左我地將來既決心呀!我唔係要啲咩好高級既生活,平平淡淡得架啦,我辛苦啲都唔介意…只要…」

    「咁你又個個星期落蘭桂坊,使成幾舊水飲杯唔知有無酒既雜果繽治,日日買野post IG唔儲錢..」

    當然,呢番肺腑之言我都係心諗。

    「或者我地冷靜下..」

    望住呀敏既背影,我知佢真係好嬲,因為連佢最鐘意既土匪都無食。

    「一係買凶宅丫..應該平啲呀」喺冷戰左三個鐘頭零八分鐘之後,我鼓起勇氣send呢個message,雖然我唔敢奢望有回應。

    「都得既..但好似有啲恐怖..」但估唔到呀敏竟然認真考慮…

    「又係你話要有決心!」同樣地,我都將呢一番話放進心裏,但今次唔係因為淆底,而係我發現,409尺既凶宅都賣448萬,我一樣買唔起。其實究竟凶宅係點計既呢?係每單咁平啲定係一個lump sum?

    「你俾多少少時間我丫,我就夠錢架啦」唔知點解,我覺得自己好似借左大耳窿,拍拖拍到爭人錢咁,究竟係邊個既錯?我好想問湯怡,康業係咪真係可以幫我解決所有問題,可惜,我既問題係無樓,而康業要幫人解決問題首先你要有樓。

    「你咁想出黎住,一係我地住劏房先丫」

    「得果百幾尺!點住呀」

    「但係依家住親既都係專業人士黎架!」

    然後,就再沒然後。

    「喂,周生呀」又係呢個經紀陳。

    「都話凶宅買唔起,劏房又太細咯」

    「唔係呀,有個新盤好岩你!都係劏房,但成五百幾尺,正呀!」

    「邊有劏房咁大呀,實好貴啦!」

    「就係平先益你!」

    「但當然有啲條件,就係個業主有少少問題,唔可以張揚..不過無事既無事既..」

    「下..」

    「即係唔係好見得光,不過無事既」

    「咁呀..都無乜所謂既」

    「同埋遠左少少,不過都無事既」

    「哦..我都慣架啦」

    「咁無問題,我聽日帶你上去,喺屯門大欖架」

    「喂,呢度全部都別墅黎喎,點會有劏房呀」

    「有既有既!」

    然後高山低谷,再兜多幾兜,經過一條隧道咁既走廊,終於到達目的地。

    「咦..地底點解有間房既…仲好似喺新聞見過..」

    「無事既無事既,係有少少麻煩,但封左上面個出口就得架啦,出入行遠少少囉」

    「得唔得架!」

    「無事既,那,如果到時有問題,你就話你唔知係發生咩事,話太忙,唔覺眼,喺你租既時候,個情況就已經係咁,你諗下喎,你可以同人講你住別墅,仲有日式設計,band房,隔音又好,做乜都唔怕啦!」

    「係姐,咁如果真係有事呢」

    「咁你就要同人講俾啲耐性、包容,跟進緊,係奇怪啲,但啲人好快唔記得架啦!」

    「我感受唔到你既決心呀!」呀敏既聲音喺耳邊響起,「好,就呢度啦!」

    然後,我呢個廢青就同女朋友一齊搬左入去間幾千萬既別墅既下面。

    「呀敏,鐘唔鐘意呀?」

    「鐘意呀!點解有錢租呢度既?係咪好貴架」

    「你唔使擔心啦,你睇下,仲係你最鐘意既日式設計呀!

    「多謝你呀BB!終於可以搬出黎啦!」

    「呀敏係咪夠哂大呢!」

    「係呀!」

    呢一秒我竟然諗起呀敏其實一啲都唔大,不過唔緊要,至少佢無僭建,全部真材實料。

    「但BB,咁幾時真係買樓呀?」

    「我跟進緊架啦,都委託左專業人士,要做既都做緊」

    原來呢個答覆真係好有用,呀敏都好滿意,雖然唔知係因為我既真誠,定係呢個成5百尺既私人空間。

    驊姐,

    全靠你,我先可以三十未夠就住向海別墅,

    因為你,我先能夠挽回呢段差點失落既感情,

    多謝你,令我明白,跟進緊,則無敵。

    延伸閱讀:

    勉勵20歲30歲年青人 7句說話終生受用

    20至30歲後生仔 10件一定要做的事


    關鍵詞
    情侶熱話