名補習社聘功夫導師 月薪5萬

再有筍工出沒,只要你有呢「一技」就可以每月穩賺5萬蚊。本地著名補習社All-StarEducation(即星河教育中心)近日貼出招聘廣告,有意聘請一名全職功夫導師,月入50,000元。

撰文:CM LO

哦,即係請人教打功夫!食過「夜粥」都可以做功夫阿頭,月賺「5皮」?少年你太年輕了,唔係咁簡單嘅……

補習社要求應徵者須持有大學學位或以上學歷,仲要操流利英語同普通話,另外要有中國武術段位一段或以上,或持有北弗吉尼亞大學發出的功夫文憑證書。

嘩!至少要大學學歷,要識講兩文三語,仲要有一定功夫水平,好高要求喎!究竟依個功夫導師實際要做乜?

據招聘廣告顯示,功夫導師需負責課程設計,例如不同年齡的學員要按不同程度設定教授方式、內容及評核制度。此外,導師需要以全英語教授女子詠春班。平日都要處理行政工作,如聯絡學員、買教具及武術用品。如果有比賽,導師都要帶隊往返內地練習及參加比賽,亦不時要回內地參與武術交流會等。

薪酬就真係幾吸引,但有咁多入職要求同埋工作,大家又覺得係咪筍呢?

星河教育對於香港學生一啲都唔陌生,主要提供中學階段的補習班,最出名的補習老師有英文科的范浩揚(K.OTen)及中文科的張欣欣等等。不過今次聘請常規科目以外的活動導師係相當少見,唔通經濟唔好,要會開拓埋興趣班市場?