家庭月入中位數得3.5萬 但後生仔好捨得使錢 個個買車買樓食好嘢?網民:分別在於有無父幹 窮人永遠係用最多錢?

家庭月入中位數得3.5萬 但後生仔好捨得使錢 個個買車買樓食好嘢?網民:分別在於有無父幹 窮人永遠係用最多錢?

在香港,究竟要月入多少才能應付生活所需?這問題並沒有標準答案。事實上,每個打工仔的消費心態不同,有人習慣應使則使,又有人提倡應活在當下,想使就使。日前,有人就家庭月入中位數於討論區發文,指香港家庭月入中位數僅3.5萬,惟不少後生仔十分揮霍,彷彿有無限金錢一樣。

撰文:經一編輯部  | 圖片:Unsplash

樓主:後生仔好捨得使錢

日前,有人於連登討論區以「明明香港地家庭月入中位數得3萬5,但好似個個都無限金錢咁」為題發文,指20歲、30歲的後生仔好捨得使錢,質疑他們的收入來源,又同時表達羨慕。

尤其係20幾、30幾歲嘅後生好捨得使錢,個個都買車買樓,又旅行、錶、相機、玩具、露營行山,個個星期都去食好嘢。究竟啲錢邊度嚟?好羨慕。

網民:家庭月入中位數得3.5萬 但後生仔個個買車買樓 有父幹無後顧之憂?但有人話捨得使同有錢係兩回事
樓主直言,好多後生仔都好捨得使錢。(圖片:Unsplash)

屋企本身有樓 家庭月入3.5萬夠用?

帖文一出,有不少網民踴躍回覆。有人表示在香港只要有屋企人支持,不用顧慮首期的話,家庭月入3.5萬絕對夠用。

  • 「只要無諗過儲錢買樓,同唔介意同屋企住/住劏房,根本大多數香港人都無財政壓力。」
  • 「因為屋企有物業,唔使供樓 ,3萬至4萬好好使 (無壓力)。如果你又要供樓、養父母同仔女、供保險、養車,揾5萬至6萬都得個「捱」字 (有壓力)。呢個世界有父幹,就無苦幹。人哋就真係叫生活 ,無家底只係生存。」
  • 「其實你當一個後生仔搵兩萬, 喺屋企住,唔急買樓,一個月3,000基本飲食、3,000家用、1,000交通、3,000儲,仲有1萬用。」

有父幹無後顧之憂?

又有不少網民表示,部分90後有父幹,自然沒有財政壓力。

  • 「父幹!好多都有屋企人畀首期或有幾層樓揸手,仔女大咗就畀佢哋結婚之後住。」
  • 「香港係以父幹為主,仲focus月入幾多真係無意思。」

90後本身屋企最易好景。你諗下佢父母生性嘅,都識為迎接佢哋出世買樓,公屋轉私樓,嗰時搵得多嘅買私樓,搵得少嘅買居屋夾屋。由嗰時幾十萬升到𠵱家千幾萬,加埋屋企投資。除非住公屋,或者97時炒樓炒到破產,大部分90後自己本身家底好穩健,無後顧之憂。

網民:家庭月入中位數得3.5萬 但後生仔個個買車買樓 有父幹無後顧之憂?但有人話捨得使同有錢係兩回事
有網民坦言不少90後都有「父幹」。(圖片:Unsplash)

有人話應活在當下 老咗有錢都無力使

亦有不少人認為應該活在當下,想使就使,想買就買,否則到4、50歲有錢時亦無能力消費。

  • 「當你辛辛苦苦,死慳死抵,到你30歲、40歲買樓,發現青春逝去,無瘋狂過。」
  • 「到你40歲、50歲,有錢都有心無力。畀架靚跑車,你都唔夠20歲仔揸錢7(舊車)咁開心。」
  • 「其實如果唔打算生小朋友,有時死慳死抵買樓都唔知為乜,咁不如拎啲錢去滿足自己好過。𠵱家唔去旅行,唔通等到七老八十,身體機能退化先去?而家唔食好啲,唔通等到味覺衰退或者年紀大,樣樣唔食得先去食咩。」
  • 「搵錢都係為生活,死儲錢爛儲錢,之後步入中年,人生就這樣完了。」
網民:家庭月入中位數得3.5萬 但後生仔個個買車買樓 有父幹無後顧之憂?但有人話捨得使同有錢係兩回事
有網民認為,現在不去旅行,難道要等七老八十,身體機能退化再去?(圖片:Unsplash)

網民:家庭月入得3.5萬其實好少

不過,不少網民亦批評樓主的觀點,指在香港家庭月入3.5萬,只能應付基本生活所需。

  • 「有無諗過家庭月入得3萬5,已經係全香港最差嘅一班人,出面普遍家庭都有6萬以上。」
  • 「一個人3萬5都叫窮啦,點解仲會有人搵萬幾蚊。」
  • 「呢啲係基本生活,同埋咁嘅生活唔係用好多錢。好多都係一次過畀咗有排用,仲要畀家用報答父母,我身邊朋友個個都得,你唔得就真係要反省。」

捨得使同有錢是兩回事 網民:炫耀唔到嘅嘢 根本唔會放上社交平台

有網民指出,樓主不應單憑身邊朋友的社交平台判斷一個人有錢與否,因為捨得使錢、放上社交平台「Show off」與有錢是兩回事。

  • 「捨得使錢同佢本身有無錢無關係,做文員搵1.2萬一個月,都可以個個月使1.2萬。」
  • 「唔係佢哋好有錢,係佢哋捨得使,你都可以不過你唔捨得。睇一個人有無錢,係睇佢資產有幾多,唔係買嘢有幾多,買返嚟嗰啲都係債。」
  • 「每個人用錢,都有唔同嘅方法,睇IG根本無意思。表面上你覺得人哋揸㗎跑車好威,但背後好可能人哋真係死慳死抵,又或者人哋真係投資有道,又有可能人哋平時月入2萬,但年尾出20萬分紅,夠錢一次過買車。又或者你見到人哋去旅行好似好捨得使錢,但係分分鐘平日為咗慳兩蚊而飲熱飲。」
  • 「因為show off唔到嘅嘢,根本唔會放上FB、IG。你會唔會平時搭巴士、食大快活、買759放上去share?」
網民:家庭月入中位數得3.5萬 但後生仔個個買車買樓 有父幹無後顧之憂?但有人話捨得使同有錢係兩回事
網民指,每個人用錢的方法不同,單憑IG決定一個人是否有錢根本無意思。(圖片:Unsplash)

比較月入無意思 月入不等於收入

有網民勸樓主不應比較每個人的月入,因為就算月入3.5萬不等於收入只有3.5萬,對方或有其他收入途徑。至於使用奢侈品,亦不等於一個人富有,因為可以透過分期付款等方法購入。

  • 「表面月入三萬,但人哋個個有樓放緊租。」
  • 「唔明有咩好比較,要比較大把人一個月十萬廿萬啦。」
  • 「月入三萬五唔代表收入得三萬五,勞有得分期供,加借錢容易。好景時單靠奢移品好難睇穿一個人係咪真有錢,潮退仲見到隻勞先算。」

又有網民直言,只有窮人才會出現「月光」的情況。

窮人永遠係用最多錢,一係唔知,錢要投資唔係亂使,一係就太清楚知道揾幾多錢都唔夠, 使晒佢。

網民:家庭月入中位數得3.5萬 但後生仔個個買車買樓 有父幹無後顧之憂?但有人話捨得使同有錢係兩回事
有網民指,勞力士有得分期供,加上借錢容易,用奢侈品依不等於有錢。(圖片:Unsplash)

第三季家庭住戶每月入息中位數為2.65萬元

事實上,據政府統計處去年底最新公布的第三季與就業相關的統計數字,香港家庭住戶每月入息中位數僅2.65萬元,其中3人住戶的入息中位數則為3.04萬元,4人住戶的中位數則為4.05萬元,而打工仔每月收入中位數則為1.75萬元。網民所引述的3.5萬元與最新數據存在偏差。

延伸閱讀:30歲身家應有幾多錢?調查顯示港人平均月儲7,000元 教你計算各年紀儲錢標準 附5大儲錢貼士|吳柏筇