工聯會另類進修班 只係聽個名已經精神哂

熱話

正所謂活到老學到老,做人無時無刻都要keep住成日增值自己,以提升競爭力,小編呢日突然醒覺太耐無增值自己,於是就上咗工聯會睇吓有咩課程啱讀,咁啱又見到以下呢幾個好似幾有趣又實用咁,就同各位讀者一齊開心SHARE~

撰文:JOEY

1. 「腦袋如何轉快些」班
香港人都係比較實際,小編都唔例外地主攻一啲可以有利自己仕途發展嘅課程。咦?原來個腦轉得慢係有得後天補救架!小編未報讀已經長知識了!

我諗上完個轉腦袋班,小編嘅能力一定不容置疑地大大提升,無時無刻都可以表演魯芬… 吖唔係,腦筋急轉彎。不過古語有云:「識人好過識字」,自己有才但唔識人,下場可能係要報讀早一兩年極一時嘅「懷才不遇自救法」班。

2. 「超級無敵人際學」班
自從工聯會取消咗「懷才不遇自救法」班,小編都好擔心無人再救救懷才不遇嘅小編呀!不過原來鬼鬼馬馬創意無限嘅工聯會,已經為一眾懷才不遇嘅你推出咗呢個「超級無敵人際學」班,包你上完堂人緣好過掌門人志偉哥咁話喎!真係好貼心呀(心心眼)!

3. 「條氣唔順」班
當你有才能又有人脈嘅時候,你以為呢個世界就無嘢難到你喇咩?錯哂喇!只要你一日都仲係打工,你都要聽你老細嘅話;就算你係做老闆,你都要聽你啲客嘅話… 喺呢啲情況下,好多時就會出現你「條氣唔順」嘅情況,而貼心嘅工聯會已經為你準備咗一個課程教你認識吓自己嘅情況,及早就醫!

4. 「前世記憶講座」
有腦有人脈、又識自行調理自己啲條氣唔嘅情況,仲有啲咩輸人?又正所謂「一命二運三風水」,有時運氣會成為結局嘅決定性關鍵。有啲人含住金鎖匙出世,我哋通常會話佢前世一定係大好人-成日幫阿婆執橙嗰啲。依家工聯會話你知,呢度有個課程可以畀你從科學嘅方法窺探自己嘅前世做咗啲咩好事壞事!乜原來講前世今生都有得咁科學架!小編又長知識了!

5. 「活得更精彩」班
任你掌握天時地利人和都未必活得精彩,工聯會呢度有個150分鐘嘅課程,包你上完可以學識提升你嘅心靈智能… 雖然小編唔太清楚咩係心靈智能,但總之賣點就係學識就可以活得更精彩啦!做幾十年人去幾十個旅行都係想活得精彩箒,依家工聯會竟然有個雞精班喎!你唔係唔試呀?

睇完5個咁有意義嘅班,小編真係好想趕做人生勝利組嘅組員呀!

伸延閱讀:
【高官親身演繹 打工仔求生必備「職場卸膊操」】
http://www.edigest.hk/Vip/detail?id=4861
【一世友誼值24萬?】
http://www.edigest.hk/Vip/detail?id=3895
【定下20分鐘計劃 擺脫渾噩生活】
http://www.edigest.hk/Vip/detail?id=4709