打工仔搵著伏工要裸辭 「cv寫去咗working holiday 算」|網民熱話

【裸辭.網民熱話】搵工難,但搵到工又唔代表係一份好工!搵到伏工隨時花CV ,令你之後條路仲難行,難轉工、難加人工!

撰文:麗爾|圖片:電視截圖、unsplash

遇伏工即裸辭

一班打工仔分享佢哋搵工挫敗經驗,有人提到自己上個月開始搵工,搵到,但點知伏黎嘅。現時只打算早走早著,再搵過工。有同經驗者現時工作就做滿3個月,但表示伏味重,又未搵到新工,打算下星期裸辭,讀住course 搵新工。

另有蚊型公司員工請唔到假見工,準備聽日開口講裸辭,但亦怕之後搵唔返。有網民回應:「一定搵到 差在想唔想做」同樣是蚊型公司打工仔,上個禮拜已經扮病請過一日去in過某間大公司,結果in完發現同Job Post 講嘅野唔一樣。「又係咁chur我公司架構 一講話係蚊型公司就得啖笑咁」

亦有今年Fresh grad指自己收到間細公司offer,14k digital marketing。但驚間公司太細,亦怕驚做完1年之後幫唔到我轉工加人工,唔知應唔應該唔理入咗行先算。

同樣係畢業生提到上個星期三去細公司見工,過程感覺幾好,最後亦有同講到人工同幾時返得工,呢幾日見到公司remove咗請人個post,但仲未有通知,表示極不安,唔知打唔打電話定send email問下好。

有自稱Grad咗好耐終於搵到份hr agency嘅recruiter工,人工ok因為計commission ,但係間公司得兩個人。同樣表示迷惘唔知搵唔搵過份好定攞下經驗先。

有網民擔心interview,亦認為等電話黎叫interview先慘。不過有得去面試至少都成功咗一大步。有17 grad提到自己失業中,cv又花曬,嚟緊又唔知搵咩工,感到灰心。亦有失業咗成個月嘅網民,見咗幾份大勝數都食白果。

「自從變左三個月通知期就再無interview。明明升職前好多人in 而家咩聲氣都無」

「除左第一份工做夠一年,第二同三都各自做得3個月,打算唔落cv話去working holiday 算」

同樣今年FG表示自己Sd 咗20幾份,有1x個interview ,不過好多都推咗。呢兩日分別見咗兩間公司,都有Offer。佢估計自己可能開得低啲 14-15 K」

不少人對香港經濟仍抱希望,覺得暫時唔算差,應該好快會搵到。

「唔算差,但班employer hold 起晒D工唔請住。而家同2017 年尾比真係無乜工」

「仲有兩個幾星期終於離開間公司,雖然都會有不安,但每年等間公司加幾舊水仲要好似恩賜比你先有得加咁,寧願走人好過」

網民精警留言:

「廿六歲搵緊萬三蚊,衰過拎綜援」

「今年fg就算啦岩先考完試」

「唉 2016ive 仔.5月無野撈
搵hr assistant 又無人請
有咩好做」