兩公婆月入6萬 猶豫應否棄居屋換將軍澳私樓 網民:必換因為層次不同 VS 唔換可以去旅行

兩公婆月入6萬 猶豫應否棄居屋換將軍澳私樓 網民:必換因為層次不同 VS 唔換可以去旅行

香港樓價高企,不少人上車會先考慮居屋,到收入改善後再換私樓。近日,有居屋業主想換私樓,但又怕供樓困難,於是就應否換樓一事在討論區尋求意見,結果引來網民兩極意見。

撰文:經一編輯部| 圖片:香港討論區、iStock、中新社

想換將軍澳私樓但怕供樓困難

日前,有網民在討論區以「賣唔賣居屋換私樓好」為題發文,指自己有間未補地價的447呎2房居屋,如果賣出去會有200萬左右資金回籠,兩公婆月入約6萬,剛剛有小朋友,想換將軍澳私樓,但怕供樓困難,於是尋求網民意見。

兩公婆月入6萬 居屋換私樓等於向上流?網民:唔換可以去旅行 VS 必換因為層次唔同
樓主想換將軍澳私樓

網民:兩個層次 有能力一定換

帖文一出,引起網民兩極回應,有人力撐樓主應該換樓,因為認為私樓與居屋層次不同,換了私樓才有向上流機會,而且有小朋友想改善環境很正常:

  • 「換,向上流當然係靠私樓啦。」
  • 「必換…居屋同私樓係兩個不同(層次),所以換,向上流。」
  • 「樓換樓,居屋換私樓,階層向上流,完全係兩個層次,有能力一定換。」
  • 「換吧,居屋同私樓嘅居住質素,真係好大分別㗎。」
  • 「有小朋友想改善環境好正常,換唔算乜大風險。」
  • 「樓主還年輕,可加長樓按年期,長遠睇私樓比居屋比較有優勢。」
網民:兩個層次 有能力一定換
有網民認為居屋與私樓是兩個層次,有能力一定換

網民:唔換可以去旅行

不過,亦有大量網民勸樓主三思,因為樓主個案只是剛剛好有能力換樓,但換了之後壓力會好大,供樓及管理費開支等很龐大,反而如果不換樓,可以去旅行,到55歲前已經可以自由自在周圍玩:

  • 「唔換,可以去旅行,冇壓力。」
  • 「6皮嘢,2m將軍澳私樓好似唔係好夠錢,又稅又佣又裝修。」
  • 「唔好唔記得私樓管理費差晌地租交多過居屋好多。」
  • 「你講得驚供唔掂,即係都係掹車邊啦,而家經濟咁差,樓價還是在頂峰,我建議你睇定啲,儲定彈藥先再換樓。」

「點解啲人成日覺得私樓威啲?係咪已經被潛移默化洗腦咗?而家輕鬆月供8000,邊供邊儲,55歲前就可以自由自在周圍玩。成日覺得私樓係因為冇屋住既人焗住用貴價買,但係你已經有,點解傻下傻下陪跳火坑?」

網民:冇理由大換細 賣咗買唔返

由於以樓主的預算,換私樓的代價是居住空間反而細了,有網民從實際角度上出發,有小朋友的話不應該這樣做,不如把錢投入孩子的未來,或花錢裝修間屋:

  • 「過來人想講3房抵住過細兩房,而你無理由大換細咁傻。」
  • 「無理由多個小朋友走去大換細。」
  • 「換樓如只為虛榮,唔值,把錢儲下投入孩子的未來更實際。」

「其實我想講,樓主已經擁有一間好多人發夢都想要既447呎居屋,月供才8,000。放棄咗係買唔返架。而家新嘅居屋,447呎係極難抽到,機會同中六合彩無分別。如果因為有小朋友想換下環境,其實花錢豪裝間屋都係一個選擇。」

兩公婆月入6萬 居屋換私樓等於向上流?網民:唔換可以去旅行 VS 必換因為層次唔同
網民認為樓主籌到居屋是贏咗條起跑線

真正向上流:儲錢買多層

亦有心水清的網民認為,純粹居屋換私樓不算是向上流,反而應該利用居屋供樓輕鬆的優點,儲錢買多間收租,才是真正的向上流:

「唔換,已經贏咗條起跑線,比其他人用6折價錢解決住屋問題,點解無端端放棄去補地價換間私樓?有錢買多間收租租就真係向上流啦!」

  • 「重點係有能力就買到多層!並不是換樓!你那種想法是自尋煩惱!」
  • 「最好當然係住居屋,再存錢買多層私樓。私樓放租一段時間再去住。」
  • 「因你換樓嘅動機係乜先?如果純粹為咗虛榮心,我就覺得唔好換。再儲下錢買間樓/車位嚟收租好過。」
  • 「已經有層2房居屋,收入也不算低。咪存首期買層私樓放租。我覺得佢咁做會比換私樓,更加令人羨慕。」