港匯轉弱  唱定外幣去旅行?

港匯轉弱 唱定外幣去旅行?

仲有兩個星期就到農曆新年,如果你未結婚,恭喜你,你又可以開心逗利是,輕鬆賺筆外快。如果你已結婚,都恭喜你,因為你可以派利是,造福人群。不過如果你唔滿足於造福本地人群,而想振興環球經濟,可以考慮去旅行避年兼促進當地消費。

不過近排匯市好波動,呢邊箱人民幣跌緊,但那邊廂又話YEN有機會升返。咁究竟依家唱定先好,定等遲少少再唱著數呢?

日圓:唱定少少過新年

對香港人嚟講,去日本就好似回鄉一樣,上年跌到差不多6算,真係唔去都對唔住自己。

不過打算去日本過年的話,可能要早少少兌定円。上年年尾円匯率已經回升,衝破6.5水平,今年已升返至每百日圓對6.6港元,更有預測會升至7算。

日圓愈升愈有,主要原因是日本經常帳盈餘擴大,單睇上年首十個月,日本經常帳盈餘達13.3萬億日圓,較2014年的2.6萬億日圓多超過四倍。加上日圓被視為傳統避險自己,依家環市股市笠笠亂,個個都避險為上,分析師又睇死美國唔敢係3月加息,所以短期睇円走勢都好難轉弱,升過七算真係唔出奇。

不過又咁睇,安倍晉三好辛苦先將日圓貶值,經濟先似返少少樣,如果円升得太快,咪又打回原形?市場到時又會估佢會加大量化寬鬆推返抵個匯價,所以如果係諗住下半年先去旅行的朋友,就唔洗咁急唱住。

題外話,2017年起大阪市政府將向所有旅客徵收「宿泊稅」,所以,要去日本好快啲去。


(每百日圓兌港元,湯森路透)

韓圜:再等一會

寵寵寵寵,睇睇埋咁多韓劇,唔少香港人都心思思想過去搵返個真‧Oppa。依家韓圜咁抵,真係最好機會。

去年8月,港元兌韓圜曾升至156水平,雖然後來回一回,但個價又慢慢上返來。呢排不斷衝擊緊156呢個位,如果升穿,真係又有排貶。

其實南韓經濟好靠出口,其GDP有一半便是出口貢獻,其中四分一出口又係輸往中國。但依家中國經濟增長放緩,南韓經濟想有起色都難,睇黎156呢個位遲早升穿。所以想去韓國的朋友,不妨多等一會。


(港元兌韓圜,湯森路透)

新台幣:台灣唱最抵

台北都係唔少港人嘅心水旅遊點。一來近,由香港飛去台北仲快過放工時間過海;二來平,以1港元對約4.3新台幣嚟講,可以話相當好洗,豪飲豪食豪掃街都抵喇。

去日本就話要早啲兌定円,去台灣就可以睇定啲喇。今年1月內地熔斷自己熔斷機制,都順手熔埋新台幣對美元匯價,新台幣對美元曾觸及33.667元,仲創下七年新低。

港元兌台幣升穿4.3水平後就一直係高位,似乎唔打算有回落跡象。即係話依家唱同遲D唱都冇乜分別。不過根據小編經驗,點都係去到當地兌新台幣最抵囉。


(港元兌新台幣,湯森路透)

泰銖:貶值勢頭仍在

新年咁凍,一眾怕凍嘅香港人可以選擇到泰國避寒。當地一年四季都好似夏天咁,仲有陽光與海灘。而且仲有大量shopping好去處,根本就係為最愛濕平嘅港人而設。

講返泰銖走勢,之前1港元曾經可以兌4.7泰銖,雖然依家回返落4.6,但睇到個趨勢泰銖都係貶值緊。依家大市氣氛咁亂,環球市場走資,新興市場通常都係走資高危,唔排除泰銖會繼續貶。所以去泰國的朋友,真係唔洗心急唱定泰銖。

之不過,泰國消費咁平,以香港人最著緊嘅飲飲食食為例,最平可以200泰銖就四餐,冇錯,包埋下午茶。當然,呢個係平民價,但食豪啲都係1,000泰銖就四餐,都唔洗太計較匯率係幾多既。


(港元兌泰銖,湯森路透)

人民幣:需要先唱

都知香港人以事業為重,返工重要過食飯,唔想/唔敢請假但又想來個小旅行,中國大陸都係唔錯選擇。加上近排人仔係咁跌,早前每百港元可以兌約87元人民幣,北上消費又變返抵。

之不過,近呢幾個月人仔貶值速度真係嚇親大家,雖然阿爺話冇大貶值空間,最近仲將匯價(每百港元兌人民幣)托返上84至85附近水平,但見識過舊年阿爺的「暴力貶值」,有10萬人仔的話,三日間就唔見4,000幾,都咪話唔肉痛。

由於阿爺政策都係估你唔到,依家個個又爭住將人仔唱返港元轉頭,所以都係無謂唱定,真係要北上消費事,係咁易係找換店唱幾千蚊傍身就算啦。


(港元兌離岸人民幣,湯森路透)