返工手機響被同事恥笑「仲用鈴聲嘅?」 網民:20年前人人都用流行曲 返工較靜音先專業

返工手機響被同事恥笑「仲用鈴聲嘅?」 網民:20年前人人都用流行曲 返工較靜音先專業

隨著通訊軟體變得流行,愈來愈多人將手機調至靜音模式。日前,有網民於討論區發文,指返工期間手機響起,被同事嘲笑「以前小朋友先用鈴聲」,令樓主不禁懷疑今時今日仍使用手機鈴聲是否有問題。

撰文:經一編輯部|圖片:香港討論區、Unsplash

樓主:用鈴聲真係有問題?

日前,有人於香港討論區以「用手機鈴聲好怪?????」為題目發文,指自己因為怕漏接電話,向來不會將手機調至靜音模式,惟有天工作期間,手機突然響起,同事跑到其身邊圍觀,有人甚至出言嘲笑樓主為何仍要使用電話鈴聲。

返工手機響被同事笑「仲用鈴聲嘅?」 網民:記得20年前人人都用
圖片:香港討論區

網民:記得20年前 周街都用電話鈴聲

帖文一出,引起網民熱議,意見兩極。有人直言,手機鈴聲是上一代人的產物,今時今日大多數人都會較震機。

  • 「講真係有啲怪。」
  • 「十幾廿年前就興,家下鈴聲係歌曲的話,響嘅時候會有成村人望住你,當你係怪物咁。」
  • 「呢幾年冇聽過人用原裝鈴聲以外嘅嘢。」
  • 「係咪你用啲流行曲、粵劇做鈴聲,原廠鈴聲都仲有唔少人用嘅。」

部分網民看見樓主的帖文後,分享以前使用手機鈴聲的經驗,有人坦言現在已經甚少設置鈴聲。

「記得20年前,周街都用電話鈴聲。聽完陳奕迅唱幾句,之後另一部手機響,再聽容祖兒唱幾句。嗰陣我諗住特別啲用帝女花,點知都同個嬸嬸撞鈴聲。」

  • 「講起鈴聲五花八門,有啲阿媽阿爸,有啲叫救命都有。」
  • 「為咗唔想尷尬,同埋減低同人撞歌嘅機會,我用古典音樂做鈴聲。」
  • 「6年前我仲用緊《信心花舍》,家下無用啦。」
返工手機響被同事笑「仲用鈴聲嘅?」 網民:記得20年前人人都用
有人直言,手機鈴聲是上一代人的產物,今時今日大多數人都會較震機。(圖片:Unsplash)

有必要設手機鈴聲?

不過,部分網民卻認為設置手機鈴聲是必要,指樓主並無問題,直言「唔將電話較響機」的做法更奇怪。

「一個從來都唔將電話較響機嘅人,我覺得仲怪。照呢個邏輯,如果有廠商出咗一部唔識響嘅手機,咁佢哋一定會買?(唔識響嘅手機,講完我自己都笑,咁同「太陽能電筒」無咩分別)。」

  • 「唔用鈴聲,萬一部電話唔知放咗去邊點搵呀?你下次見佢用電話嘅時,你應該大聲笑佢仲用緊電話呀!!!而家新興用腦電波喇。」
  • 「你理得佢哋咁多,家陣啲人慣咗用Whatsapp、微信,慣咗打字唔說話,所以已經唔習慣聽鈴聲。但你仍然有用手機通話嘅習慣,當然可以繼續用你自己喜歡嘅電話鈴聲,好少事。」

網民:你啲同事有問題多啲

又有網民認為認為樓主同事的做法欠妥,認為使用手機鈴聲是個人自由,不應嘲笑。

「有咩問題?我都用緊,我間唔中會換下鈴聲,不過全部都係台語歌。原因就係以前通街都係用同一個鈴聲,一轉地鐵,一個車廂內響3次電話,鈴聲都係同一個(但唔同人聽),所以把心一橫就自己cut鈴聲。無人熟識、風真透,呢啲歌包無同人撞鈴聲,電話響嗰陣超正。」

  • 「雖然我自己係靜音,不過唔覺用鈴聲有咩問題,似係你啲同事有問題多啲……」
  • 「只要啱你自己需要,又理得人哋點睇你。」
  • 「用唔用鈴聲同用咩鈴聲係好個人嘅事,冇嘈到影響到人就得啦,使唔使申請啊?你同事都幾無聊。」
  • 「你班同事先有問題,電話響係正常事,用咩聲係個人喜好,除非辦公室規矩畀震唔畀響私人電話,否則理直氣壯咁講畀班同事知,唔好小事化大,扭曲正常事。」
  • 「其實無問題架,不過睇你用咩歌,用分飛燕一定夠成熟!」
返工手機響被同事笑「仲用鈴聲嘅?」 網民:記得20年前人人都用
有網民認為用手機鈴聲是個人自由,並無問題。(圖片:Unsplash)

返工應將鈴聲調至靜音?

不過,有網民指,無論使用手機鈴聲與否,工作期間理應將手機調至靜音模式,避免騷擾其他同事,有人甚至提議樓主應該將私人電話「飛線」至公司的座機電話。

「用鈴聲無問題,但係唔好較到咁大聲,試想像喺巴士上嘅場景,電話響本來無問題,但你又較到超大聲,啲人擰個頭望吓係邊個電話響,你又要好尷尬咁即刻接電話。」

「喺公眾場合騷擾到人哋就係有問題囉。所以我就好欣賞日本人在地鐵公交車,一定聽唔到電話鈴聲,無人大大聲講說話。」

  • 「應該係話你嘈到同事。」
  • 「講開靜音啦,鈴聲令自己好煩,自己10年前電話已經開靜音。」
  • 「公司正常都係熄電話鈴聲,開住鈴聲仲竟然覺得無問題呢個先至係重點。」
  • 「唔可以飛線去你嗰位部電話?」
返工手機響被同事笑「仲用鈴聲嘅?」 網民:記得20年前人人都用
有網民指,無論使用手機鈴聲與否,工作期間理應將手機調至靜音模式,避免騷擾其他同事。(圖片:Unsplash)

關鍵詞
網民熱話