做夕陽製造業 目標買五千萬嘅樓 「香港畸形逼到我好想賺好多錢」|網民熱話

熱話

【夕陽製造業・網民熱話】今時今日,香港嘅樓價已經達到了瘋癲嘅程度。不少打工仔只求有個安樂蝸,夠住已經心滿意足。最近有從事夕陽製造業者,表示自己想十年內搵到五千萬,住到自己想住嘅地方,並喺討論區上發表自己嘅奮鬥日記。

撰文:麗爾|圖片:unsplash、電視截圖

想住近海新起嘅樓

樓主表示自己想買一間五千萬嘅樓,喺討論區寫低的原因,有目標可以用好多方法去達到。亦同時希望讀者可以有少少得著,可以為生命作出少少改變。

樓主表示自己並非富二代,無父幹無母幹,屋村出身,公立學校畢業,係香港非三大既BBA畢業。樓主今年三十,已婚未有小朋友。有一層供左兩年既樓,市值五百萬左右。

當年買樓同結婚,屋企俾咗十萬樓主自己決定點用,結果花光所有積蓄,結完婚,樓主戶口仲差緊銀行十萬循環貸款。

樓主現時做一種比較傳統,甚至係被喻為夕陽嘅行業。有一間自己既公司,幾個員工,自己做為主。

樓主嘅夢想就住到近海新起嘅樓。「每日返公司去地鐵站我都會經過,一梯兩伙,每一伙有二千呎,管理費七個半,淨係管理費都已經比得上我供樓既錢。每次經過我都會諗,究竟係咩人先可以住係呢度?」

搵錢始終靠實業好

樓主睇中嘅樓依家值5000萬,希望十年後可以住到。樓主計過十年時間其實唔需要搵足5000萬。假設首期約四成,即係2000萬,每年要搵200萬,當扣埋稅同洗費,每個月要搵到接近20萬。假如十年後樓價唔升太多,跟通漲睇,估計將儲蓄買返少少收息股應該可以睇齊。

樓主表示:「我唔主張投資致富,我只求唔貶值,搵錢始終靠實業好」

現時樓主一個月最多都係收入十萬,平均只係四五萬,如果自然提升的話,每個月多3-5%都有排唔到數,仲未計有時候會甩客之類嘅嘢。

 

有人提到五千萬樓做唔到六成按揭,只係五成。另外亦唔認同有二千萬要用來買樓。「放入private banking 再借錢再買基金一年都有一百萬收入啦,是咪真係愚人節笑話?」

「好似過千萬嘅樓要5成首期,再加銀行只會借100個月糧俾你,即係除首期外,你到時要月入穩定250k以上先過到壓測」

「btw 如果你剩係收息 係一世都上唔到5000萬 聽我講 唔好借錢 用老本買升跌好過」

有網民表示支持樓主有夢想,但認為香港唔適合人生活,「希望你四十歲搵到二千萬嘅時候望返轉頭知道乜野叫開心」。曾有相同夢想者表示,怕自己達到夢想嘅一日,身體已經殘曬。

同時亦有人忠告樓主要諗下五千萬樓以外有冇其他追求嘅嘢,唔好為咗五千萬而錯過太多,例如家庭、健康、朋友。

「覺得五千萬可以等同財富自由,但係如果係樓黎計 可以考量下其他五千萬等值既事物」

有同路人表示都係想40 歲前買到元朗過千尺大屋, 預600-700 萬首期(如果唔點通賬),該名網民表示自己係專業人士,同老婆年收入岩岩一百萬。現時都供緊一個自住物業,但唔諗住賣之下再儲一份首期,希望40 歲前買到心目中單位。

夕陽製造業對手愈來愈少

網民提到夕陽製造業有一定競爭,好多龍頭公司,但亦少人入行,對手應該愈來愈少,而後生係一種優勢。

持相反意見者亦提到自己做過紙,不過人工唔太理想。

「世界各地日日講環保,紙呢樣嘢咁唔環保,好快被淘汰」。奉勸樓主早日轉工,「驚你唔止樓供唔起,家用俾唔到,連自己日常生活都有問題。」

有網民亦提出喺香港要搵大錢,都係要做返sale ,認為行技術死硬。「咁多年接觸到既人入面 得一個比鬼佬買左佢個技術先發達 其他收曬皮」