Staycation半夜聽到怪聲 驚足一晚！第二日發現烏龍真相

撰文：CY｜圖片來源：事主授權使用｜原文刊於：GOtrip

最近有港人在Facebook群組「香港Staycation酒店交流谷」分享酒店入住經歷，表示自己近期入住佐敦一間熱門酒店，深夜睡覺時徹夜難眠，皆因廁所不斷傳出沖廁聲響，相當嚇人！

事主一開始聽到水流聲響時，本以為是酒店太舊，聽到隔離沖廁聲亦算能夠理解。誰知道越聽越不對路，廁所竟然每隔1分鐘就響起一次沖廁聲，事主驚恐表示：「心諗隔離唔會咁神心計好時間玩水掛」。

聽到水聲已經心驚膽跳，而且房間又實在太凍，事主以為自己巧遇「朋友仔」，一度覺得「弊傢伙喇……真係撞鬼喇……」，唯有不斷催眠自己，逼使自己趕快入睡，想藉此逃過一劫。

誰料到第二日清晨，事主友人早一步起床，一入廁所就「嘩」一聲高聲呼叫，嚇到事主即刻彈起身，一瞬間以為「朋友仔」竟然在早上才出現，恐怖至極。

誰料原來友人終於發現水聲來源——原來房間廁所的沖廁按鈕比較實淨，事主在入住當日去廁所後，因為用力過猛而導致沖水制卡在下方無法回彈，導致每逢水箱儲夠水會沖廁，才會導致每隔1分鐘就傳出一陣水聲。

事主得知真相後，表示自己「真係反咗個白眼」，好多網民都留言表示自己都跟住嚇一嚇，好彩是虛驚一場！亦有網民話「咁都瞓得著，睇嚟好累」，事主都即刻詼諧回應「窗口咁啱對住循道衛理嘅十字架」，想話有個十字架對住自己先瞓得著！