虛App

「虛App神棍」 5招氹你入局要小心!

經一分享
有邊個唔想盡快達至財務自由? 喺社交媒體成日有人吹噓自己係投資大師,識咗你之後向你推介投資App,佢話自己知道晒啲升跌規律,仲唔介意share 貼士俾你,總之就「零風險高回報」、「跟佢買賺硬」!  其實,呢個世界邊有零風險一定賺嘅投資㗎?有內幕消息點解要講你知呢? 莫非同你有親? 其實,所有嘢都係騙徒氹你落叠嘅糖衣陷阱,我地一齊拆解呢班「虛App神棍」嘅5招行騙伎倆。

第1招:騙術迴戰

使出掩眼騙術,喺網上平台扮晒投資專家,以低風險、高回報作招徠,吸引你參與投資。

第2招:疑幻似真

引你主動聯絡騙徒,再氹你安裝真假難分嘅投資App,之後假「客服」會叫你先入錢去個人銀行賬戶,就可以開戶及進行買賣。

虛App

第3招:勝利幻象

製造假象,初時會先俾少少甜頭你,等你套現少量回報,令你誤以為之後都會有豐厚利潤,繼而加碼投資。

虛App

第4招:已Lock不回

當你想連本帶利拎錢走,假「客服」會聲稱系統故障拖延付款,或者要繳交高昂保證金、稅金等等,總之就諸多藉口唔俾你拎錢走!

虛App

第5招:一鋪清零

最後,你成副身家被清零,甚至搞到家破人亡!

虛App

唔想財產一夜蒸發,即登入「防騙季」專頁:https://www.adcc.gov.hk/zh-hk/anti-deception-month.html

想接收更多防騙資訊,請瀏覽反詐騙協調中心網站 https://www.adcc.gov.hk

(Presented by 反詐騙協調中心)