分享至
    【診所職場事|寶豬趣聞】想驗吓啲大便嘅先生|珍寶豬

    【診所職場事|寶豬趣聞】想驗吓啲大便嘅先生|珍寶豬

    有日一位先生嚟到診所。
    佢一入到嚟我已經聞到有陣味…

    佢將個紙袋擺咗上登記處:「姑娘呀,我想睇醫生呀,有嘢要問醫生呀我」
    我望望個紙袋,四四正正乾乾淨淨又好似冇咩特別,但係陣味真係好勁…

    撰文:珍寶豬funnyclinic)|圖片:電視截圖

    「我想check返呢啲大便係咪真係我身體排出」

    我:「你俾身份證我登記呀,要唔要探熱呀?」
    佢:「唔駛探熱,我嚟check少少嘢啫」
    我:「想做身體檢查係咪?之前有冇嚟拎過啲單張睇過呀?」
    佢:「我冇嚟過呀,我想check呢袋嘢(指紙袋)」
    噢,點解又要係我呀?
    我:「你呢袋…咩嚟呀?」
    佢將手伸紙袋中拎起入面嘅嘢:「我想check返呢啲大便係咪真係我身體排出」

    …邊個去屙咪邊個嘅囉,咁都要check?
    我:「我哋冇得驗呢啲呀,你自己去咗廁所你唔知嘅咩?」
    佢:「我係有去呀,但係我唔覺得我身體入面可以儲到咁多大便,我感覺係冇可能,我要去邊先check到呀?」
    咁係你去嘅就係喺你度出啦,唔通有人趁你屙屙吓偷偷放第二啲便去你度呀?
    我:「或者我同你照登記,你入去問醫生呀」
    佢拎起紙袋內的紅色膠袋:「咁多喎,你望吓有冇可能啦?」
    我立即退後些少。
    佢見到我咁就講:「唔駛咁驚呀?我包咗好多個膠袋啦,唔會漏出嚟啦,你望吓我咁嘅樣有冇可能排到咁多大便出嚟啦」
    你又唔係靚仔,屙咁多屎有幾奇啫~

    我:「你入去問醫生呀,你俾身份證我先呀,其實你都唔駛拎埋啲大便嚟嘅,同醫生講就得㗎啦」
    佢單手拎住袋屎,單手喺褲袋拎出身分證:「唔拎埋嚟醫生點知我排咗幾多呀,唔通同佢講幾多個飯碗湯碗咁咩,個概念唔係人人理解,梗係見到真嘢好啦」
    我已經嘗試閉氣,我想死:「嗯」
    你屙咗隻大笨象定雀仔出嚟都好,醫生都係會轉介你去專科…

    延伸閱讀:自備儀器做大腸鏡嘅女士|珍寶豬

    延伸閱讀:佢有貨我冇貨|珍寶豬

    診所職場事 寶豬趣聞 想驗吓啲大便嘅先生 珍寶豬
    圖片:電視截圖