國際知名腸道微生物專家 黃秀娟教授放棄高職 來港零開始 克服人生難題 成功揭開便便奧秘
腸道疾病和微生物醫學臨床醫生科學家黃秀娟教授，從英國搬到香港生活已15年。她2010年加入香港中文大學醫學院，現為香港中文大學內科及藥物治療學系裘槎醫學科學教授及中大醫學院副院長（研究）、香港微生物菌群創新中心（Microbiota I-Center, MagIC）總監，以及腸道微生物群研究中心副主任。
作為一位國際知名的優秀學者，在做出成績、成功為大眾健康帶來改善之前，黃教授人生中亦經歷過不少艱難時刻。
她出生於馬來西亞檳城、在英國倫敦大學獲得內外全科醫學士，後於倫敦帝國學院取得博士學位。留學英國前的她，成長期從家庭兩代中學懂了何謂堅毅。
「我公公係福建人，好細個從中國大陸移民去檳城，20歲同我婆婆結婚，生咗七個小朋友，六個係仔，得我媽咪一個女。公公二戰時代開古董店養家，佢好錫我媽咪，但婆婆比較錫啲仔、會認為我媽咪有責任照顧哥哥同細佬。公公尊重人、有愛心、唔怕辛苦。佢係一個好榜樣，我媽媽深受公公影響。」
她的舅父們很多都是醫生，只有媽媽一人中學畢業後犧牲上大學，「所以我媽咪好重視我哋嘅教育、飲食同健康。」她說。
房間小．啟發大
黃教授想成為醫生，馬來西亞的升學機會卻不多；當有機會到英國留學，她當然十級興奮，可是對父母親而言，則是一大挑戰。
「讀醫要讀五年，嗰時英鎊兌馬來西亞令吉係一乘十一，好高！媽咪要計劃一下我嘅學費，所以我壓力好大。我要同人合租，間屋有兩個房，一個好大，一個好細，我揀咗平嘅細房，間房不足30平方呎，只足夠放床同枱，根本都活動唔到。我見到間房嗰一刻真係喊，唔知點算好。」
我：「我覺得嗰間30平方呎嘅細房，為你人生帶嚟好正面、好大嘅影響。」
黃教授：「影響大到都已經係20、30年前嘅事，呢一刻我重有visual memory！好記得我喺間房望出去係個back yard，我好喜歡大自然，好喜歡green；反觀面積大嗰間房望出去係馬路，所以凡事都要自己心態調節，但過程唔容易，因為人好容易睇嘢half empty，要將自己變成一個half full嘅人，要時間去克服。」
她會否希望子女於30平方呎房間內感受人生？
「作為家長，我雖然modern但亦都傳統，可能受到我祖父母嘅影響，我覺得家庭嘅bonding
好重要，我感覺佢哋缺乏咗呢樣嘢。另外，有啲嘢係要自己去爭取嘅，現在物質太豐富啦，我認為佢哋要經歷自己搭巴士、搭港鐵。小朋友開心、健康最重要。我相信nature and nurture，我自己經歷過好多，覺得後天嘅健康最緊要。」
失敗其實很正常
黃教授笑言自己機遇不少，當中驚喜、驚嚇兼備。今天的她，和小時候的自己分別可大？後天際遇又有否改變她的先天？
「我諗我有完美主義，當事情超出我嘅控制範圍，就會無安全感。原來凡事都可以後天鍛煉，然而過程非常辛苦，所以我鍾意study psychology，探討人性到底係點。其實好多人都有好多機會，但未必個個想跳出舒適圈。人人都參考別人嘅成功故事，我就覺得應該share一啲失敗例子，有失敗經驗其實好正常。」
黃教授坦誠地分享她的一次珍貴失敗經驗。
「我做學生時，人生第一次講talk。面對一千觀眾，我做足功課，背熟晒每一個細節。好多時喺你最ready嘅時候，最意想不到嘅事就會發生，呢個就係人生。有一位教授走出嚟，批評我做嘅研究係垃圾，嗰一刻我其實唔知點反應，我重講thank you very much，成個會堂靜晒。好多時，我哋需要有咁嘅經歷，但作為一個學生，我當時唔明白個道理，我係可以變得自暴自棄，但往後回想番，你只會笑一笑，而嗰位教授都唔記得咗呢件事（笑）。」
黃教授認為人生是從錯誤中學習，我們不會因為獎項、獎金、獎品而上到一課。她的挫敗經歷豈止這一件，「最大挫折，由搬嚟香港嘅第一日開始（大笑）。我平均16、17年就換一個居住地，我人生有三個階段：15、16歲離開屋企去讀書；跟住有好嘅工作offer，又喺英國住咗16、17年，諗住會settle down嘅，但後來遇到我丈夫，佢喺香港出世，然後移民澳洲，我再喺英國認識做律師嘅佢，同一時間我遇到沈祖堯教授，佢offer我嚟香港工作，從新開始。我喺英國工作至高級職位，要由重要嘅人變成nobody其實好難，我人生三個好大嘅決定： 第一，搬過嚟結婚，開始新工作；第二，要放棄英國嘅高職；第三，我啱啱讀完PhD。」
「你丈夫係你當時做決定嘅主要因素，愛情支持你。」我說。
「我覺得係，愛情有時係blind嘅，根本無用邏輯去考慮。其實我係一個幾情緒化嘅人，我相信直覺。香港比較近馬來西亞，我另外一個考慮就係家人。」
要是她的丈夫不給予來港的支持，事情不會發展至此。
「嗰一年好難過，係我人生中最差嘅。」她續道：「我係福建人，真係一句廣東話都唔識。身為一個喺病房睇症嘅醫生，我曾經係局外人。由局外人變成體系一份子，歷時15年，性格自我啲都可能放棄咗。第一，我一搬到香港，我丈夫就被調到上海工作，係我人生中最worst嘅消息，我點可以自己喺香港生活呢？雖然佢第二年返番香港，但第一年對我最重要，我要適應新生活，重要每個週末飛上海。不過，當你經歷過最壞，其他嘢就會變得更好，我情願先苦後甜！另一個消息係沈祖堯教授做中大校長，請我嘅人走咗，上司變成陳家亮教授（前中大醫學院院長），我要同新嘅上司合作。而家look back先知道係blessing，但嗰一刻你唔會咁諗。」
40萬億好奇
筆者近月飽受腸胃不適困擾，動輒肚瀉。跟黃教授這位醫學權威見面，又怎能不「腸談」。
她說：「我做醫生幫病人睇症，我覺得有滿足感，因為我幫到個病人，但一日可以睇幾多病呢？當英國嘅教授介紹我做科研、讀PhD嘅時候，就開啟咗我嘅心。我細個好鍾意睇星星，去探索一啲人哋唔知嘅嘢。有一位教授話，我哋腸入面有40萬億細菌，而好多細菌都未知係乜，嘩！原來咁神秘，刺激起我嘅好奇心。最初我無諗過研究細菌嘅，直到我嚟咗香港，我有機會去探索炎症性腸病。你喺適當嘅時間，碰上適當嘅地點、人物，把握機會你就可以起飛！陳家亮教授支持我去研究，當時我想聯同外國人一齊去做research。佢教咗我一樣嘢，佢話點解你唔獨立做第一個亞洲嘅研究？於是我從零開始，one man band走訪大概20個國家、地方，邀請學者合作研究，成功建立呢件事，令到香港喺炎症性腸病研究中，列入亞洲重要之位。」
黃教授經多年研究，在便便中發現了炎症性腸病和自閉症的新微生物特徵，成功開發精準工具，以非入侵性方法快速和準確診斷自閉症及炎症性腸病。在過去，這兩種疾病的診斷既複雜且廢時，現在能更早發現，同時也減少了高昂的醫療費用。
「我已經見到便便同細菌可以改變世界，我希望有一日令香港成為領導。我嚟咗15年，香港係我家、我小朋友嘅家，我好感恩，亦無後悔做過嘅所有決定。但我重有目標未達到。Innovation and technology不斷進步，做任何嘢都一定要創造價值，最好有一日我小朋友嘅小朋友會話你媽咪發明嘅嘢，我哋而家用緊呀，全球都用緊。我嘅目標就係將便便裡面啲細菌，變成例如藥物，或者可以去診斷自閉症、認知障礙症、同年齡有關嘅疾病等等。」
變成一盤生意又是另一種毅力，在繁忙的科研工作以外，黃教授的營運力度從何而來？
「唔同人有唔同性格，有啲人鍾意日日做同一件事，但我怕悶，我發現日日學一啲新嘢，同新嘅人合作，all the language is very different。我覺得做生意有少少似過山車，有時好刺激、好high，例如有投資者對我哋有興趣，嘩！原來我哋咁勁，但之後又跌番落嚟，我哋今次唔投資喇，我們搵咗另一間公司。我覺得要做企業家，適應力要好強。」
人生很難，要成為自己喜歡、別人接受的自己，加上工作順利、身心健康，其實絕對不易。黃教授寄語大家：「If you are bitter，it’s fine to be bitter，有一件事我學到——接受。同自己講我今日唔開心、我今日身體唔舒服，無問題，你今日唔開心，聽日唔好keep住唔開心，跟住就要問自己：『我點先至會開心呢？』有啲嘢你控制唔到，但你可以控制你自己點樣去面對。喺一個機構工作，男性、女性每個人都有自己嘅強項，先問問自己有何貢獻，你擁有男同事無嘅專項，你已經贏咗。」
我問：「未必事事稱心如意，你容許自己唔開心幾耐？」
她說：「你愈成功，你唔開心嘅時間愈長，因為你對自己、對身邊嘅人要求愈嚟愈高，所以要保持意識，要不停提醒自己。我會去跑步，因為我個腦無時停、每秒都諗緊工作，跑步時我會聽音樂，聽自己嘅腳步聲，好放鬆。滑雪同跑步令到我完全relax，滑雪時我唔想跌倒，就會好conscious，而跑步就係我嘅me time。」
