新地再創$6萬蚊呎「海璇II」神話｜凍鏈茶專欄
廣告
今個星期香港樓市頭條，係90後KOL小斯豪擲逾1.3億買咗新地(0016.HK）北角「海璇II」一個實用2100呎嘅高層平台特色戶！呎價HK$64,589，破盡海璇II紀錄！消息一出，網民唔係羨慕妒忌恨，而係個個變身「柯南」搵破綻，最後金睛火眼發現「案情」絕不簡單！
疑點一：KOL收入與支出不相稱？
用按揭計數機篤一篤：做五成按揭（即係佢要拎近 7千萬現金首期出嚟！），分30年供，月供超過30萬！網民即刻靈魂拷問：「KOL？賣衫？賣廣告？開班？邊度賺咁多呀？」小斯兄嘅財路，精髓唔係Hit Rate帶嚟嘅廣告費，而係傳說中嘅 「銀行回贈」！咩玩法？簡單講，就係幫銀行「跑數」，介紹客仔去申請信用卡，銀行回贈俾佢嘅佣金，分分鐘多過你同我十年糧！所以話，你睇到佢表面風光拍片帶貨，人哋可能 「悶聲發大財」。
疑點二：真成交定Marketing騷？
講到「豪客掃豪宅創天價」，資深嘅香港地產人士即刻諗起 2009年嗰單轟動全港嘅「天匯事件」！當年恒基(0012.HK）西半山天匯，單位呎價癲到7萬蚊，創晒亞洲紀錄，嚇到全港O嘴！最經典係，個「豪客」前DJ秦善文，掃咗6個單位總值11.6億！點知？結果撻晒訂！搞到全城懷疑係咪「做假市、托樓價」！之後仲傳出有買家涉洗黑錢被捕，牽涉越南富商、山西女富豪…！雖然已故「四叔」李兆基曾經開賭「1萬賠100萬」力證真成交，但隨著調查無疾而終，真相？早就石沉大海！
