分享至

    今日唔買樓將來買唔番? 千祈咪恐慌性高追 

    朋友: 「好耐冇見,想請教吓,XXX三房單位抵唔抵買?」
    筆者: 「好貴喎,我覺得唔抵。」

    朋友: 「咁買邊度好呀?」
    筆者: 「識你咁多年,都冇聽見你話想買樓,乜咁突然?」
    朋友: 「業主話要收番層樓,租約滿咗之後唔租啦。」
    筆者: 「咁咪租過第二個單位囉,你都唔係第一次搬架啦。」
    朋友: 「你覺得唔好買呀?」
    筆者: 「而家個市咁顛,新樓開價仲狠,遲啲個市靜啲先買啦。」
    朋友: 「我驚買唔到呀!」
    筆者: 「點會買唔到?」
    朋友: 「個個代理都話個市冇可能會回,會升到你唔信。」
    筆者: 「佢哋賣樓梗係咁講架啦,如果話會調整仲邊有人買?」
    朋友: 「個個朋友都係咁講,話而家唔買遲啲買唔到!」

    筆者: 「市場一定有旺有靜嘅,定喎!」
    朋友: 「好多專家都話樓市泡沫喎。」
    筆者: 「你睇番舊年報導先啦,舊年個個都話跌架。」
    朋友: 「但係…如果真係繼續升咁點算?」
    筆者: 「好驚咩?」
    朋友: 「驚呀!」

    其實大家都知道,今天樓價很貴!
    二手屢創新高,一手開價更狠,愈貴愈多人買。
    散戶總是這樣…
    去年樓市調整,就驚樓價繼續跌,唔敢買!
    今年樓市發高燒,就驚樓價繼續升,幾貴都追!

    其實以前筆者都試過…
    2008年初,樓市氣氛熾熱,筆者同樣試過鬼揞眼,不但沒有趁高位減持,反而在代理的游說下,再買多兩個單位,完全超出自己的能力負擔,幾乎捱不過金融海嘯,自此就知道不要太相信氣氛。之後幾年,樓市經歷了多次起起跌跌,逐漸掌握市場節奏。

    那次寶貴經驗,來自貪婪,抵死!
    然而今次這一浪,來自恐慌,慘慘豬!
    以朋友的情況為例,其實他沒有急切需要,過去多年都是租樓住,租多一年半載也沒甚麼大不了,為甚麼忽然想買樓呢?原因是驚將來樓價愈來愈貴,買唔到!這股力量比貪婪更大!

    筆者今年趁高位賣了幾個單位,每個單位都創新高。
    代理: 「賣咗幾個單位,有冇買番呀?有個新盤好抵…」
    筆者: 「咁都話抵?唔係吓話?!」
    代理: 「而家個市升到唔停,賺梗喎。」
    筆者: 「唔買住啦,等個市靜啲先啦,我唔慣升市買嘢。」
    代理: 「點會靜呀?個個新盤都排到開巷!」

    筆者: 「到時想買話你知啦。」
    代理: 「你唔驚到時買唔番咩?銀紙貶值喎!」
    筆者: 「唔驚!我賣樓套現嘅資金,買晒工廈。」
    代理: 「工廈好咩?」
    筆者: 「最少唔貴,增值後每年回報15~20%,幾好呀。」

    恐慌…是因為今日唔買,將來買唔番!
    恐慌…是因為不擅於投資,沒有選擇!於是幾貴都追!
    筆者並不擔心,因為投資於其他物業的回報,不會比住宅差,例如住宅樓價未來一年再升10%,只要你在其他投資的回報超過10%,理論上你就沒有損失。如果回報高過住宅樓價升幅,基本上有賺,如果住宅樓價真的調整,購買力更大幅提升,有乜好驚?

    要尅服恐慌,最重要是拓闊視野,讓自己有更多選擇!
    當然前提是你要熟悉、有把握,千萬不要自以為是,胡亂進行高風險的投資,例如瞓身投資細價股等,否則不如買樓好過。