分享至
    唔怕買唔返 3大原因 宜家要 賣樓

    唔怕買唔返 3大原因 宜家要 賣樓

    朋友A: 「最近樓市升到顛喎,你哋點睇?買唔買好呢?

    筆者: 「咁高位仲買?如果唔係自住樓應該賣添啦。」

    朋友A: 「賣樓?…個個都話應該買樓投資喎!

    筆者: 「投資唔一定買架,靚價梗係賣啦,唔通跌先賣咩?」

    朋友B: 「講開又講,最近唔少代理打嚟問我賣唔賣樓。」

    筆者: 「好唔好價?」

    朋友B: 「好價呀,呎價去到成1.4萬呀!」

    朋友A: 「你好似係東九已補地價居屋,咁都賣1.4萬?」

    朋友B: 「係呀,賣咗套番幾百萬,搞到我心思思。」

    筆者: 「呢期唔少戰友賣樓,幾乎個個創新高。」

    朋友B: 「咁你呢?」

    筆者: 「我同屋企人都賣咗幾間呀!」

    朋友B: 「又創新高?」

    筆者: 「必然啦!」

    朋友A: 「你唔驚賣咗買唔番咩?不如分享吓點解賣樓丫…

     

    文:1%Anthony

     

    今時今日,個個講買樓,日日講創新高。

    老老實實,呢個時候,好多戰友都賣樓!

    點解賣樓?係咪睇唔好後市?驚唔驚賣咗買唔番?

    身邊的朋友都有好多類似問題,其實每個人情況不同,分享一下。

     

     

    賣樓…為首置名額

    自從政府推出第二套房15%印花稅,已經有樓的朋友,再買唔到,舉例筆者今年其中兩單Deal,都係幫家人賣的,他們名下都有一個物業,是2013年跌市的時候買回來,實用面積只有200多呎,當年200多萬買回來,現在已經升到迫近400萬了,還可再升多少?過了400萬,做唔到9成按揭,還有何優勢?繼續持有嗎?等500萬?等1000萬?陰司紙咩?一來上望空間不多,二來繼續持有,買唔到其他樓,點解唔趁高出售,騰出首置名額?

     

     

    賣樓為套現

    以前筆者與前輩投資物業,毋須賣樓,不斷加按、再買、加按、再買就可以,幾年時間就財務自由。今時今日按揭越收越緊,壓力測試下,一般打工仔只能一間起、兩間止,如果唔賣樓,想再買?想再借按揭?只能概歎…好難過!即使加按亦不容易…

     

    。例如你的單位400萬買入,做了9成按揭,即是借了360萬

    。現在升到700萬,只能做6成按揭,即是借420萬,

    。套現420萬 – 360萬 = 60萬,有鬼用咩?買車都唔夠!

    。賣樓呢?700萬 – 360萬 = 340萬,購買力大大釋放!

     

    細換大又好,一開二又好,都需要資本!

    既然現在的買家盲目追價,輕輕鬆鬆創新高,何不趁高賣樓?

     

     

    賣樓…唔驚買唔番咩?

    有機會的,其實買樓、賣樓,都要克服心理障礙,買樓的時候,你一定會驚「買咗之後如果跌點算」,賣樓的時候,你又一定會驚「賣咗之後如果繼續升點算」,船頭驚鬼,船尾驚賊,乜都做唔成!世界沒完美,總不可能最低位入,最高位出,要解決這個問題,最重要是要有部署…

     

     

    賣樓之後,賺到的錢,你會如何投資?

    老老實實,如果你不擅理財,沒有其他投資方向,不如唔好賣。

    如果有更好的投資,那就不妨趁高套現。

     

    例如上述例子,繼續持有,最多升到400頭,賺多幾十萬而已,如果套現之後,這筆錢可以賺番幾十萬,甚至更多,何樂而不為呢?當然每個單位都不同,有些單位仍有上升空間,當然不賣,有些單位你感覺差不多了,就該賣,需要經驗與知識。

     

     

    不要讓你的資金停下來,不要放在銀行等跌!

    筆者與戰友套現後,多數會買住宅、工商廈或大陸樓!

     

    例如筆者的工商廈投資,過去幾年都有15~25%的穩定回報,就算跑輸瘋顛住宅亦不會輸太多,至於大陸樓,過去兩三年,不少物業例如珠海、深圳週邊城市的樓價已經倍翻了,即使我們去年進軍的長江三角,樓價都升了兩、三成,遠遠跑贏繼續持有原有住宅。

    作者為1%投資培訓的地產課程總監,著有《買樓上車防中伏》、《上車又住又賺》、《樓。轉命運》、《工商舖小本投資入門》、《50 萬上車》、《投資買樓賺錢筆記》等等,其博客《第一桶金》總瀏覽量逾300萬人次,曾接受多間傳媒專訪及出任電台地產節目嘉賓主持,並擔任TVB節目「有樓萬事足」顧問。2000年科網股爆破,曾欠下近一年薪金卡數。經債務重組後,2004年股樓雙線出擊,短短四年由滿身卡數打工仔,變出六層樓。其後與投資兵團大舉出擊投資物業,並進軍商鋪、工廈市場,以穩健投資策略,成功變出雙位數物業。

    facebook專頁:www.facebook.com/anthony.wealth

    關鍵詞
    經一專欄