月入$52,000 唔買彩虹居屋有乜揀？

朋友： 「今年未必抽啦。」

筆者： 「點解呀？」

朋友： 「今年有乜選擇，得彩虹好啲，另外兩個响梅窩。」

筆者： 「彩虹唔好咩？」

朋友： 「梗係好啦，不過肯定全世界都爭，邊有我份丫。」

筆者： 「咁梅窩囉，超平喎。」

朋友： 「咪玩啦！點返工呀？」

筆者： 「咁唯有等出年啦。」

新居屋家庭入息上限由4.9萬調升至5.2萬，單身人士折半。

聽聞最快下個月就有得抽啦，唔少朋友問…抽唔抽好？首先要睇吓今次幾個居屋項目的位置啱唔啱你心水，其中一個在彩虹，在東九龍上班的朋友應該金晴火眼，至於另外兩個在梅窩，睇落真係啱退休多啲，就算返機場都未必啱啦，梅窩去東涌坐巴士都唔近架！

如果位置啱，下一步就要諗吓有冇更好選擇。

月入5.2萬可以供幾錢樓？

1) 如果借80%按揭…

壓力測試後供款不可超過入息60%，即是供款不可以超過3.12萬；以30年期，壓力測試按息5.15%計算，最高貸款額約559萬，以80%樓價計算，最多可買699萬的物業，不過首期就要139萬。

2) 如果借90%按揭…

壓力測試後供款不可超過入息55%，即是供款不可以超過2.81萬；以30年期，壓力測試按息5.15%計算，照計數，最高貸款額約493萬，以此為90%樓價計算，可買548萬的物業。然而這個樓價超出了90%按揭的上限，仍以400萬為準。

月入5.2萬，如果唔買居屋可以買咩呢？

1) 如果做80%按揭，可以買近700萬物業…

這個銀碼選擇可多了，留守東九龍的話，將軍澳除了天晉之外，大部份屋苑，例如維景灣畔、蔚藍灣畔、將軍澳中心、將軍澳廣場、新都城，東港城等，買一個兩房單位不難。去到啟德發展區，譽港灣、現崇山等有點Out Budget，傲雲峰還有少量選擇，至於翔龍灣因為開則比較細，買兩房冇難度。上述講到的，都是會所配套設施齊備的新式屋苑，質素肯定比居屋高。如果不介意樓齡稍大，會所設施不多的，還可以考慮九龍灣淘大花園、德福花園，買一個兩房單位，600萬以下的選擇不少。

2) 如果做90%按揭，只能夠買400萬以下的物業…

去年這個時候還好，到了今天選擇不多，九龍灣可以買的就只有得寶花園及旁邊的一些舊樓、居屋。得寶花園的面積相對較細，旁邊的舊樓樓齡相對較高。另外黃大仙、鑽石山、土瓜灣等亦有不少單幢樓、小屋苑可以尋寶，但要多花點時間，質素方面與新居屋亦未必會相差很遠，空間方面或會有點分別，如果首期預算不多，新居屋可能會是一個不錯的選擇。