分享至

    樓市最後嗰浸留俾人賺 咁我又賺乜

    朋友A: 「樓價指數又創新高,宜家買住宅投資真係冇肉食。」

    朋友B: 「睇個勢如果政府唔做嘢,仲有力升多浸喎。」

    朋友A: 「仲升得幾多丫,前輩教落,最後嗰浸留俾人賺啦。」

    朋友C: 「不如跟我去買柬埔寨樓啦。」

    朋友B: 「柬埔寨好咩?」

    朋友C: 「講英文、用美金、冇外匯管制,將來係一帶一路中心。」

    朋友A: 「唔係喎,上次睇泰國樓,代理話泰國先係中心喎。」

    朋友C: 「點解泰國係一帶一路中心呢?」

    朋友A: 「佢話地理位置好,政治相對穩定,做生意駐點首選。」

    朋友B: 「唔係喎,上次睇馬來西亞樓,代理話嗰度先係中心。」

    朋友C: 「又點解馬來西亞會係一帶一路中心呢?」

    朋友B: 「代理話當地人識講多國語言,又多大陸人去買樓。」

    朋友C: 「Anthony你俾啲意見,你覺得邊度發展好啲。」

    筆者: 「賣樓嘛,個個都話自己係一帶一路中心架啦!」

    朋友C: 「咁你覺得最有機會係邊度先係中心?」

    筆者: 「其實都係斷估,買番大陸最穩陣,哈哈!」

    朋友C: 「大陸貴丫嘛。」

    筆者: 「貴?你個柬埔寨盤幾錢呎?」

    朋友C: 「約港幣$3,000幾啦,$100萬可以買一房300幾呎。」

    朋友A: 「泰國都係咁上下,靚位都要去到港幣4,000幾架!」

    筆者: 「咪係囉,好多二線城市,計番呎價都係1,000幾咋!」

    朋友B: 「咁筍?邊度先?會唔會係山卡拉?」

    筆者: 「好多省會大城市都係,就算翻一倍都未到3000!」

    筆者自小受到傳媒及身邊朋友影響…

    覺得買大陸好危險,買樓好易中伏,於是就錯過很多賺錢機會。

    直至兩、三年前,見香港住宅樓價愈來愈貴,租金回報越來越低,上升水位越來越小,就決心要學習投資外地物業。到過不同國家,睇過很多樓盤,最終都係覺得大陸樓最抵、最有爆炸力,於是由珠海起步,跟前輩及投資兵團一起進軍國內多個城市。

    大陸樓…呎價極低水

    一線城市當然貴!深圳早兩年瘋顛時期,樓價簡直可以媲美香港,上海、北京、廣州等當然亦不便宜,然而很多很有實力、很有潛力的二線城市,其實很便宜。例如筆者有次去曼谷考察,與同事睇了逾20個盤,即使位置一般的樓盤,呎價都要$3,000、$4,000以上。後來再跟前輩到大陸各大城市考察,很多二線大城市,例如長沙、重慶、無鍚、合肥、瀋陽等等,呎價都只是$1,000元。

    入門…即是要多少錢?

    在大陸買樓,最常買的有住宅、公寓兩種。

    住宅面積一般比較大,最少約80~90平方米,以呎價$1,000元計算,總價約百多萬,最高可以做七成按揭,首期約$40萬、50萬左右就夠。當然每個城市價位不同,一線城市當然比較貴,但三線城市可能平到呎價$400、$500,要細心揀清楚,是搏差價之選。兩年前我們投資兵團買的珠海、惠州、東莞等都升,剛剛投資兵團在無鍚、合肥等買的單位,過去半年都升了兩、三成。

    公寓面積一般比較小,最少約30至40平方米,又以呎價$1,000算,$50萬、$60萬就有交易,可以做五成按揭。即是廿幾萬就可以做業主,而且租金回報較住宅為高,一般可以做到4、5厘。自從各地政府推出限買、限賣、限貸等政策之後,很多投資者公寓,因為公寓不限購、不限貸,將會是市場上一股潮流。

    作者為1%投資培訓中心課程總監,教授物業投資、上車及裝修等課程。暢銷書《上車又住又賺》及《樓轉命運》作者,網誌《第一桶金》總瀏覽逾300萬人次,並曾擔任TVB《有樓萬事足》顧問。
    Fan Page《第一桶金》: www.facebook.com/anthony.wealth