【網上熱話】泊街車塞住過路位 街坊：起碼留條生路俾人

香港車多錶位少，不少車主都會周街泊，但都要顧己及人，如果將架車泊到又阻街又阻人，就真係罪大惡極！
有網民日前在Facebook群組「深水埗街坊會」貼相，顯示一輛黑色私家車在東京街近元州邨違例泊車，半架車更泊出「讓線」，樓主貼文好無奈：「個個街坊要兜路行過馬路，推住bb車又要行出馬路，先再入到行人路，麻煩車主下次留多少少位畀(俾)人過馬路」。
貼文引起網民熱議，有留言指當日不少現場街坊已咒罵車主；有網民指該處平日雖然多違泊，「但泊到咁衰都係第一次見」；另有網民說，「根本無位俾佢，夾硬泊係到，人又阻，車又阻，遲早出意外！」
有人認為應打999報警、致電1823投訴、或叫拖車拖走該輛私家車，不應縱容；不少留言亦公審車主，認為樓主毋須遮車牌，「做得出，就要俾大家認」。
有網民則較理性，「留條生路都唔留，起碼留條生路比(俾)人」；另有街坊指東京街及元洲街常有違泊，更甚是double park，令大家好唔方便；
有網民分享他的處理方法，指若目睹司機這樣泊車，會向對方說會令坐輪椅人士無法過路，「試過送貨既(嘅)知衰，識講句唔好意思好快走」，他希望大家也為人著想，否則「架車好易花」。