診所職場事 【寶豬趣聞】趕佢走好唔易|珍寶豬|經一專欄

診所職場事 【寶豬趣聞】趕佢走好唔易|珍寶豬|經一專欄

診所職場事. 經一專欄】有日診所好多人等緊睇醫生,一位先生行埋嚟登記處問:「仲有幾多個先到我呀?」我:「二十一個」,今次已經係佢第N次問…

撰文:珍寶豬funnyclinic)|圖片:電視截圖、unsplash

好多人喺診所等睇醫生

佢:「等咁耐先郁得十個人呀?」

我:「已經算快嘅啦,一個鐘睇咗十個,平均都係六分鐘一個」

佢:「使咩睇咁耐,談心咩?醫生係咪專登拖慢嚟做呀?我真係趕時間呀!你嗌佢快啲得唔得㗎?」

我:「呢啲我哋控制唔到㗎,入到醫生房醫生都需要問診同檢查嘅嘛」

佢一見到有人喺醫生房出嚟,即刻捉住個病人問:「你喺入面咁耐做咩呀?吓?就係因為你呢啲人拖慢晒呀!」

我立即叫停:「先生,你唔可以咁騷擾其他病人㗎,如果你係咁嘅話,我唯有請你離開診所㗎啦!」

診所 醫生 護士 檢查 珍寶豬 診所職場事 寶豬趣聞 經一專欄
有日診所好多人等緊睇醫生,一位先生行埋嚟登記處問:「仲有幾多個先到我呀?」圖片:unsplash

佢放開手又行埋嚟登記處,佢拍一拍張枱:「想趕我走?冇咁易?」

你拍緊戲嗎?我要唔要加啲風吹效果俾你呀?

我:「咁你坐低等啦」

佢好聽話咁行返去坐低。

診所 醫生 護士 檢查 珍寶豬 診所職場事 寶豬趣聞 經一專欄
佢:「使咩睇咁耐,談心咩?醫生係咪專登拖慢嚟做呀?我真係趕時間呀!你嗌佢快啲得唔得㗎?」圖片:電視截圖

係咁問仲有幾多人到佢

等等吓,佢又嚟搵我:「仲有幾多個先到我呀?」

我:「十九個…」

佢:「唔得啦!我真係等唔落去啦!唔等啦!」

好啦,咁好行夾唔送啦,門口嗰邊~請呀!

我:「我同你取消排隊啦咁」

佢:「咩取消呀?我有話唔等咩?」

…上三十秒嘅事,你忘記了嗎?

我:「你頭先…」

佢:「你諗計俾我蕉蕉聲咁睇完咪算囉」

蕉蕉聲咁睇即係點呀?拎條蕉出嚟嗎?

診所 醫生 護士 檢查 珍寶豬 診所職場事 寶豬趣聞 經一專欄
圖等等吓,佢又嚟搵我:「仲有幾多個先到我呀?」片:電視截圖

先生:想趕我走?冇咁易!

我:「先生,診所呢度個個都排緊隊㗎~我冇得俾你睇先㗎」

佢:「我而家死而家暈而家攤喺度,係咪都唔俾我睇先?」

你個次序好似調亂咗,應該係先攤後暈就死。

我:「如果係咁,醫生都應該會叫救護車送你去醫院…」

診所 醫生 護士 檢查 珍寶豬 診所職場事 寶豬趣聞 經一專欄
佢:「我而家死而家暈而家攤喺度,係咪都唔俾我睇先?」圖片:電視截圖

佢:「又想趕我走?冇咁易!」

我:「咁你坐低等啦」

佢又好聽話咁行返去坐低等。

如是者,等呀等,佢重覆咗十幾次以上咁嘅行為…每次結尾都係『趕我走?冇咁易!』『咁你坐低等啦』

或者佢係等到好悶好寂寞,志在郁吓…

診所 醫生 護士 檢查 珍寶豬 診所職場事 寶豬趣聞 經一專欄
如是者,等呀等,佢重覆咗十幾次以上咁嘅行為…圖片:電視截圖

相關文章