【凍鏈茶專欄】恒生林慧虹10月上場 問題貸款無得拖

呢步棋，短期內無疑會令恒生盈利受壓，甚至降低資本充足比率；因為資產需要打折出售，同時要額外增加撥備，但長遠嚟睇，丟低「包袱」之後，恒生嘅風險資產就會更有透明度。事關拖延下去，呢啲壞帳可能好似雪球咁越滾越大。其次，與其苦苦等待市況好轉、資產價格回升，不如果斷「認輸」，及早止血，避免問題拖累母公司滙控，係對投資者負責嘅舉措。

對整個滙控嚟講，將一個潛在嘅計時炸彈鎖定並移走，就可以減少「單一市場風險突然爆發而拖累全球業務」嘅隱憂。

到底滙豐與恒生會否最終「二合一」？

短期或者機會不大。更合理嘅發展路徑，係維持兩個獨立品牌，各自服務目標客群，但喺後勤支援、風險管理標準、甚至IT系統等「後台」層面就會逐步統一，令管理思維、營運方式越來越趨一致。

講到整合統一，無可避免要精簡架構，即係有機會裁員啦！到底縮減滙豐定係恒生員工? 就要睇新CEO 十月上任之後點發落。事實上，滙豐嘅優勢在於佢有強大嘅全球風險管理模型、嚴謹嘅合規框架；而恒生就同本地華資商家有幾代嘅深厚客戶關係，零售網絡亦深入社區。1965年恒生發生擠提導致要滙豐出手拯救，被迫將控股權相讓，不過滙豐當日尊重恒生嘅管理層並無插手經營運作，而恒生一直都恪盡本分，作為滙豐旗下一隻會生金蛋嘅鵝。

六十年過後，滙豐今次嘅舉動顯示對恒生處理問題貸款甚為不滿，唔知會唔會乘勢將恒生「滙豐化」呢？