診所職場事 【寶豬趣聞】Goodbye Mary | 珍寶豬 | 經一專欄

診所職場事 【寶豬趣聞】Goodbye Mary | 珍寶豬 | 經一專欄

診所職場事・ 經一專欄】電話響起~
我:「你好,乜乜診所~」

對方係一位女士:「喂?診所呀嘛?係咪條老人邨嗰間呀?」
我都唔知呢條邨原來有個咁嘅名~

撰文:珍寶豬|圖片:電視截圖、unsplash

我:「我哋嘅診所地址係乜乜乜乜乜」
佢:「係啦,咪老人邨囉」
我:「請問有咩事呢?」
佢:「一陣我有幾個人嚟睇醫生呀」
我:「哦~好呀,我哋今日收八點,八點前嚟到就可以㗎啦」
佢:「係呀,我知呀,咁你記住同我招呼佢哋啦喎」
嘟。佢cut咗我線…
招呼?點招呼呀?你想我喺診所俾咩招呼佢哋呀?

診所職場事 寶豬趣聞 Goodbye Mary 珍寶豬 經一專欄
【診所職場事・ 經一專欄】圖片:電視截圖

過咗大概兩個鐘,有幾位女士一齊傾住計咁走入嚟診所自己行埋去坐低。
我望住佢哋問:「請問係咪睇醫生呀?」

其中一位女士A回應:「係呀,登記咗㗎啦」
我望望電腦冇已登記嘅人:「登記咗?幾時登記㗎?我哋冇你哋嘅登記紀錄啊」
A同B講:「Mary唔係話登記咗㗎咩?係咪呢間呀?」
B同A講:「呢條邨係得呢間有玻璃咋嘛,唔係咩?」
A問我:「唔係咩?」
…間間都有玻璃。
我:「或者你哋打去問清楚你朋友先啦」

診所職場事 寶豬趣聞 Goodbye Mary 珍寶豬 經一專欄
【診所職場事・ 經一專欄】圖片:電視截圖

A拎起電話問『喂?你唔係同我哋登記咗㗎咩?個姑娘話冇喎,好似唔識我哋咁喎』
講完呢句,阿A收咗線同我講:「佢話搵你喎」
跟住…到我診所電話響起。
我拎起電話:「喂,乜乜診所」
電話中嘅女士相信係Mary了:「喂?我頭先咪嗌咗你招呼佢哋囉!咩嘢唔識佢哋呀?」

我:「我真係唔識佢哋嘛,而且你頭先冇同佢哋登記,佢哋以為你登記咗咋」
Mary:「咁你咪同佢哋登記囉,呢個唔係我問題呀嘛?你唔好咁白痴啦登記妹!你唔好得罪佢哋呀,我冇飯開嘅話,大家一鑊熟㗎咋!好好招呼佢哋呀!有茶就斟出去啦!知唔知呀?」
嘟,心急的Mary又cut咗我線。咦,Mary嘅生死存亡突然好似落喺我手上…

診所職場事 寶豬趣聞 Goodbye Mary 珍寶豬 經一專欄
【診所職場事・ 經一專欄】圖片:電視截圖

我望住出面嘅幾位女士,A見到我望住佢就問:「點呀,睇得未呀?」
我:「唔好意思呀小姐,你哋位朋友冇幫你哋登記任何個人資料,麻煩你哋睇醫生嘅俾身分證我呀」
B碌大對眼問:「咩話?」
A:「Mary話登記咗㗎喎!」

我:「冇呀,麻煩身分證呀~」
C同AB講:「Mary份人真係冇咩責任心…可以換啦」
我在心裡點頭點頭。
Mary究竟你係做啲工要咁樣睇佢哋面色呀?

診所職場事 寶豬趣聞 Goodbye Mary 珍寶豬 經一專欄
【診所職場事・ 經一專欄】圖片:電視截圖
診所職場事 寶豬趣聞 Goodbye Mary 珍寶豬 經一專欄
【診所職場事・ 經一專欄】圖片:電視截圖