港鐵附例巧驚驚 隨時罰你$25,000

港鐵附例巧驚驚 隨時罰你$25,000

近排網上喺度講起遲啲港鐵會向喺站內留太耐嘅乘客罰錢,喺度想同大家分享小弟人生搭過最貴嘅一程車…

已經通頂咗三晚後,今日係第四晚,呢四日,我無沖過涼無刷過牙無洗過臉,當然連鬚都無剃過。成臉鬚根雙眼通紅嘅我,好比殺人犯入面嘅郭富城,但問題係,我眼耳口鼻身家技能以至車仔都同城城有啲啲唔同。佢揸幽靈之子,我就唔鍾意自己揸車又怕寂寞,所以出三萬幾畀個港鐵司機,仲日日搵幾千人同我搭車,大家都是殺人犯咁樣,不用分那麼細啦。

呢晚,我終於準備返屋企,無瞓過令我睇嘢都有啲緩慢又腳步浮浮,總站上車嘅好處係:成個車廂都無乜人,咁不如攤一攤。不過我呢一攤,仲貴過喺半島開房。

叫醒我嘅係一個黃衫人,「先生!先生!」佢掩住口鼻咁叫我,大聲極有限,矇矇矓矓見到有啲人喺我附近,問我係咪死咗,當堂火都嚟,一時衝動就衝口而出:「****!」唉,小弟緊係唔係想同大家講要做個斯文好寶寶啦,而係短短四個字後,嗰隻黃衫人就塞咗三張嘢畀我:一張罰$2,000、兩張罰$5,000。我心諗自己一定未瞓醒啦,搭港鐵都有便衣抄牌,個數仲咁鬼大。點知黃衫佬見我無反應,就話:「先生,你著成咁,又踩我哋啲櫈,同埋粗言穢語,犯咗…… 請你遲啲返嚟交罰款。」發夢都聽到啲鬼話,起身走算。

我要返屋企

點知原來我已經畀一大班人圍住,仲有一左一右嘅黃衫人嚟夾住我,去咗個有好多黃衫人嘅地方……

「先生,你神智好似唔多清醒,我哋有理由懷疑你服用咗過量酒或者不適當嘅藥物,為咗避免影響其他乘客同你嘅安全考慮,我哋已經報咗警,請你同我哋合作,喺度耐心等陣。」又一個黃衫人話,原來我見到嘅黃衫,係港鐵制服。

「我要返屋企。」

「先生,你咁嘅狀態入嚟我哋港鐵範圍,除咗頭先三項犯規,我哋懷疑你仲犯咗港鐵附例嘅神智不清項目。」講完佢又遞咗張「5,000蚊」畀我。

「你哋都癡線架!當我癡線呀依家?」我用成世都未試過咁快嘅速度衝咗出嗰間房、衝上樓梯、仲撞開嗰度關緊門嘅列車車門。我個腦,真係亂過打仗,我拎起手上枝水,飲咗啖再淋落自己度。透過塊玻璃,我見到有個港鐵職員O咗嘴咁望住我,一轉身,附近啲人即刻彈開幾呎遠,有人拎部電話出嚟影住我,有個女人仲尖叫添…… 我唔鍾意畀人影…… 咁以為自己發緊夢吖嘛。

好似一秒就到咗下一個站,車門一開,有三、四個黃衫人上車望住我。

「先生,請你同我哋合作,落一落車先。」

我都唔知點解會跟咗佢落車。

佢又同我重覆一次我做咗啲乜嘢,今次仲加咗我飲水同遊蕩兩樣嘢話又要罰我錢,真係好煩,煩到我又忍唔住跑。我以劉翔嘅姿態卡都唔拍就跨出咗個閘,係咁跑係咁跑,直至我上咗架的士,但同時我發現,我成個公事包唔見咗。

可能的士大佬見我衣衫不整又一陣味又喘晒氣,就兇吓我係咪無錢畀。我又唔知點解好想笑,結果笑完就發現自己入咗警署。

我嘅公事包同入面嘅銀包都喺港鐵職員手上。

計埋我衝門同埋跨過閘機,我搭咗程二萬五千蚊嘅港鐵……

埋單計數
不得將腳放在座位上(罰款$2,000)
衣着不恰當(罰款$5,000)
粗言穢語(罰款$5,000)
神智不清(罰款$5,000)
不當進入或離開列車(罰款$2,000)
不排隊(罰款$2,000)
不准飲食(罰款$2,000)
遊蕩 (罰款$2,000)
總共同$25,000
天呀~

伸延閱讀:
【網民熱話: 有無人諗住搵夠就離開香港?】
http://www.edigest.hk/Vip/detail?id=6968
【 2016財經大笑料回顧 】
http://www.edigest.hk/Vip/detail?id=6945

【想買車仔? 人工要幾多先好諗? 】
http://www.edigest.hk/Vip/detail?id=6823