求婚洗乜40萬   1400蚊搞掂

求婚洗乜40萬 1400蚊搞掂

自從Facebook興起,生活就唔再純粹滿足自己。食飯要po相,旅行要check in,拍拖要share,連去急診室都要俾人知。以往爭論做事應該求過程定求結果,而家?要吓吓望實like數做人。

所以求婚呢D咁重要的事,點可以收收埋埋。早前就有港男,用鑽戒、直升機、攝製隊、海景套房加傳媒,埋單40萬元。用一個首期嚟求婚值唔值,見人見智,但可以肯定,呢個舉動,已經觸動唔少人神經:

40萬元求婚套餐:

鑽戒=20萬元
直升機=15萬元
攝製隊=1.5萬元
海景套房=2.6萬元

求婚哥既誠意,路人皆見,只係大嗱嗱40萬元唔係個個有,就算俾得起,都未必會用黎book直升機。一黎就托到個市咁高,好似小編呢D打工仔情何以堪?

其實要做到好似求婚哥咁的浪漫場面,都唔洗咁大手筆,慳慳地900元就可以搞掂。

1400元求婚套餐

鑽戒>>>200元 (淘寶好多,咩牌子咩款式都有,兩舊水好多選擇!雖然粒鑽石唔係真,但可以畀佢憧憬佢,話第日儲夠首期上車,等佢有機會做業主,聽到呢個OPTION,應該都會肯代住先。)

氦氣球掛banner>>>450元 (氣球,要打氦氣先升得起架,依家一樽細的要380元,再去買大量氣加卡紙自製BANNER,場面隨時壯觀過用直升機拉BANNER,仲分分鐘飛得高過直升機喎!話說小編望住求婚哥幅野,我就諗起警察支紅旗,搞到有少少不安…唉,其實都洗開,唔爭在俾多少少搵人design啦。)

攝製隊>>>500蚊 (搵兩個朋友,一人拎一部電話拍啦,一個影相一個拍片岩岩好。想要電影效果?用iPhone啦,家陣大把電影apps呀。影完之後俾番少少車馬費兼請老友食番餐慰勞吓啦。)

海景套房>>>250蚊 (買個帳幕去海邊紮營啦,要山有山,要水有水,玩幾耐都得之餘,又可以隨時轉地方,睇完日出睇日落。)

如果SCMP唔理你?搵經一大笑鳥都得架,最多收平少少同唔駛你講英文啦!