貨幣貶值  邊個股市升最多?

貨幣貶值 邊個股市升最多?

最近人仔連續三日大幅貶值,個個都人心惶惶,驚內地走資,個市係咁跌,嚇到小編個心都離一離,唔知走唔走好。

其實,貶值又有咩好怕喎,過去嘅經驗話俾我地知,貨幣貶值,個市唔單止唔跌,反而升得仲多。睇返過去咁多次各國貨幣貶值嘅時候,個大市都係欣欣向榮,升幅十分之大,好似日本咁,日圓由2012年9月開始貶值,一直貶到而家,日經指數期間就升左127%咁多!

其他國家如英國、德國、美國等,貨幣貶值後個市通通上升,升幅由5%至三成不等。

再睇返人民幣,真係估佢唔到,雖然人仔呢三日前無啦啦插水,但其實人仔跌已經唔係呢一、兩日嘅事。自2014年初起,美元兌人民幣匯價由接近6算開始回落,不過個市上海綜合證券指數由當時至今都升左95%,如果用5月最高位去計,更最少升1.5倍。

但話說回來,大家都知大陸股市係在去年中先開始升,當中以今年初升得最急,主要是因為中央「放水」令A股升到失控所致,未必關人仔貶值事。但睇返上述國家表現之後,大家對於後市會唔會放心啲呢?

相關文章