新派紙紮師傅教做傳統燈籠   成本20蚊搞掂

新派紙紮師傅教做傳統燈籠 成本20蚊搞掂


星期日就係中秋節,唔少人都會買燈籠應節。不過,依家市場面大部分都係電燈籠,反而傳統燈籠買少見少。記得以前細個有飛機、飛馬同白兔仔燈籠,但而家好似得返白兔仔,仲要係made in China,冇哂師傅人手製個種,小編覺得冇乜味道!有冇諗過自己DIY整燈籠?既獨特,又平又環保。

小編最近發現有一間開左63年的紙紮鋪寶華札作,坐陣的師傅歐陽秉志會親手整傳統燈籠,由楊桃、白免仔等傳統燈籠,至新潮的聾貓燈籠都識整,大家除咗可以去到鋪頭買現成外,還可以訂造,價錢由幾廿蚊到三百幾蚊不等,視乎複雜程度而定。

歐陽師傅仲會開班教學,咪以為做紙紮一定上年紀,老老土土,其實歐陽師傅只係80後,今年都係30幾歲,仲讀過設計學校,為人風趣幽默。大家學識左,自己做返一個獨有燈籠畀自己,獨特得來,成本又唔貴。

小編即場跟歐陽師傅學整燈籠,原來一啲都唔易。師傅九個字整好,小編起碼要做三個鐘,仲要整到歪歪斜斜,連在一旁的老師傅都忍唔住笑。以小編整嘅普通燈籠為例,其實只得三個步驟,第一個要折啲方框,然後將方框紮埋一齊,最後貼玻璃紙就可以了。其實慢慢整都幾好玩,仲平、靚、正!材料只係竹枝兩條(一條三元)、玻璃紙一張、白膠漿適量。加埋成本廿蚊有找,係百物騰貴的環境下,真係幾划算。

不過錢都係其次,最重要係當中有無數心機,手工錢更是無價。

講開又講,其實大家知唔知咩係傳統燈籠?依家市面上有啲人自己紮卡通燈籠,歐陽師傅就話外面自己紮的卡通燈籠唔係最傳統,因為最傳統要用竹紮,但坊間卡通燈籠都係用藤紮,紮口位容易爆。而且傳統燈籠通常用紗紙製造,坊間會用的唔算太多。

歐陽師傅自己都間唔中有做卡通燈籠,除左聾貓之外,亦會有史迪仔及Melody,但因為版權問題,所以製作品只會送畀親友,絕不會出售。(師傅真係好有原則又好老實,採訪期間,有客人來買燈籠,想要師傅人手整,但師傅覺得有個製成品唔靚,所以冇賣,仲話整得唔靚,都唔知應該開咩價!)

寶華紮作位於深水渉福榮街,其實唔算易搵。依家鋪租愈來愈貴,而且師傅又冇收徒弟,呢啲傳統手藝可能真係會失傳,大家想有一個傳統燈籠,真係要把握機會啦。