港人最愛炒的五類物品 (股樓除外)

港人最愛炒的五類物品 (股樓除外)

「物以罕為貴」,正正因為市場供應不足,引起炒賣風氣。香港人出哂名鍾意炒,炒股、炒樓,連骨灰位都炒得,只要有價有市,港人就會蜂擁而上,乜都有可以炒一餐,撈返一筆。

可能有讀者問:「我未有能力炒得起股票同炒樓,咁可以炒乜?」,小編就總結香港人最常炒賣嘅「入門」產品,唔知你地又炒過邊幾樣?

炒iPhone
香港人年年炒iPhone,主要因內地對iPhone需求增加,每年新型號開賣都有一眾果迷或非果迷炒家部署網上搶購。而蘋果推出的其他產品,例如iWatch, iPad都有炒作,不過鋒頭就冇iPhone咁犀利。但要留意,今年的iPhone 6s因為內地同步首賣,似乎炒味開始下降!

炒波鞋
當然唔係咩波鞋都保值,香港人炒開係籃球鞋,仲要係Jordan系列,閒閒地比原價可炒高最少一至兩倍,如果係限量版或者特別版,炒價更難以估計,始終鞋款貨源少,大部分來自其他地區,即使本地有得開賣,都好快比專業炒家集團排隊搶購。

不過,波鞋最大敵人就係「時間」同「空氣」,無論佢炒到天價都好,鞋底氧化後,炒家實會見財化水,所以買返來後要好好保養。

炒黃牛飛(演唱會門券/ 球賽門券)
多數都係巨星級人馬演唱會飛會被炒到飛起,有啲出名韓國男團或女團演唱會賣至幾千元一張,簡係一票值「幾千金」!

至於球賽門券,大型賽事或是熱門球隊好似曼聯,入場券都會被人炒貴!炒家會係門口兜售,但亦有人在網上論壇或社交媒體放飛。

炒紀念鈔
過去香港人曾經炒到熱哄哄的紀念炒有滙豐銀行、中銀及渣打銀行,真係動員全家一齊去訂購架!價錢可以係原價幾倍,number愈靚,回收價仲愈可觀。

炒郵票
唔好睇小價值幾十蚊一張嘅紀念郵票,佢都會引來土豪垂青!舊年香港郵政出版一套名為「郵歷香江」的郵票,被內地人狂炒,升值百倍至2,000元一張,仲有具歷史價值的英女皇頭郵票。

炒玩具
玩具都有得炒?絕對有,好多模型、超合金Figure、特別版Figure都有價有市,經典例子有《鐵甲奇俠》系列內的Ironman,「身價」升值最少兩、三倍。

小編帶定頭盔補充一吓先,每樣產品炒賣都會有一定程度的風險,建議大家量力而為!