診所職場事 【寶豬趣聞】派利是｜珍寶豬｜經一專欄

撰文：珍寶豬（funnyclinic）｜圖片：電視截圖

太太嚟診所派利是？

佢喺手袋入面拎出兩封利是遞俾醫生：「新年快樂呀！恭喜發財呀！生意興隆呀！」
…你多啲嚟醫生咪生意興隆嘅概念嗎？
醫生尷尬：「唔駛啦唔駛啦，都過咗十五」

佢：「未過正月呀嘛，利利是是，你有個女㗎嘛，點都要嘅！明知你有個女都唔俾嘅話好唔吉利㗎！」
醫生尷尬收咗嗰兩封利是：「多謝啦」
太太繼續坐喺度，望住醫生。
醫生：「你可以出去等㗎啦，一陣姑娘會出藥俾你，你出去坐吓先」

太太幫仔女逗利是

太太輕輕拍打自己心口：「醫生，我都有細路，你唔記得啦？」
醫生望望排版：「係，你有呀」
太太：「係囉，你知呀可？我有三個㗎嘛，大仔叫XX，細仔叫XX，仲有個女XX呀」
醫生點點頭。我感覺到太太係嚟追債…
我開聲同太太講：「你可以出返去㗎啦，醫生會開藥俾你，你出去等呀，我去開門俾你」
太太怒睥我：「我有嘢未做完呀！」
好強嘅氣呀！你個『有嘢未做完』會唔會就係要幫三個仔女逗埋利是呀？

逗唔到利是就遷怒於我

太太望住醫生：「係囉，我嗰三個你都由佢哋細細個睇到而家咁大啦」
醫生：「係呀係呀…」
太太望住醫生展現笑容。
…好恐怖。
醫生鼓起勇氣，決定唔再逃避：「我派到十五」

太太唔知做咩將怒氣遷怒於我，突然擰個頭嚟怒睥我。
我：「…係咪出得去？幫你開門？」
太太激氣到彈起身：「開啦！咁多嘢講！都唔得醒目！」
俾完利是仲要俾診金，真係蝕到入肉嚕，陰公～