鼎爺由武師到廚師創事業高峰「賺幾多錢?唔係好多,未夠一億。」|跳出ComfortZone

鼎爺由武師到廚師創事業高峰「賺幾多錢?唔係好多,未夠一億。」|跳出ComfortZone

跳出ComfortZone】鼎爺李家鼎又開新餐廳,今次與另一品牌聯乘,走大眾化路線,讓更多顧客可以品嘗到他的手藝。年屆七十,很多人都已經退休,鼎爺卻憑上乘廚藝,再次踏上事業高峰。人氣勁升,工作接踵而至,曝光程度不比一線小生弱。鼎爺認為他的轉型全是天意安排,當然他的個人努力,以及在煮食方面累積的豐富知識及經驗也是原因,當機會到來,才能展現人前。

撰文:Smart ED編輯部  | 圖片:新傳媒資料室

鼎爺有份投資的餐飲業務愈做愈大,繼「鼎爺私房菜」、「鼎•會館」後,最近在戲曲中心開設「鼎尚棋哥燒鵝湯館」,與另一間餐室聯乘,走大眾化路線。 「Rick(鼎爺私房菜創辦人及行政總裁譚思略)試過棋哥嘅燒鵝,而我哋啲湯有口皆碑,所以建議大家一齊試吓,做大眾化,俾顧客容易食到。」

鼎爺, 李家鼎, 餐廳, 跳出ComfortZone

父親從未稱讚好食

鼎爺私房菜開業已有兩年多,仍然其門如市,顧客需提前一星期預約,雖然不及新張時哄動,但已累積了一班捧場客定期光顧。 「托賴,生意真係唔錯,感謝上天眷顧。賺幾多錢?唔係好多,未夠一億。」

多了一間店,鼎爺更加分身不暇,他笑言以「Do Re Mi」形式到各間分店,有時一日走兩場,日間到鼎尚棋哥燒鵝湯館,夜晚返鼎爺私房菜,後者是品牌的重點,不時有顧客指名要他在場。 「Rick仲有其他構思,我話你唔好開呀,我連剪綵都唔去,一定要睇清睇楚,人唔到的話好似對人唔住,搵個名去呃人,呢啲我唔想。」

鼎爺, 李家鼎, 餐廳, 跳出ComfortZone

一向硬橋硬馬的鼎爺,沒有人想到他年屆七十,在螢光幕前拿起鑊鏟竟大受歡迎,令他事業再攀高峰,進而投資飲食生意。 鼎爺的父親是廣州大地主,擁有酒家、唐麵廠、醬園及銀舖,自己喜歡食,去跟師傅學,學盡各式真功夫,然後傳授給妻子及鼎爺。

「我其實無咁大興趣做廚師,只係為了應酬咀刁的『老竇』,佢只會教三成,留返七成你自己摸,咁樣先會一世記得。佢經常買嘢返嚟,睇住我做,切嘢煮嘢步驟錯咗唔理,一句『下次煮過』就行咗去。」

鼎爺, 李家鼎, 餐廳, 跳出ComfortZone

摸不著頭腦的鼎爺,因為好勝心不斷鑽研,慢慢累積起超凡的廚藝,但每次煮東西給父親吃,對方從未讚過他一句,頂多只會說:「都可以食得嘅!」免得他得意忘形。 當年內地土改,鼎爺父親的資產被充公,一夜之間化為烏有,一家人逃難來港,寄住姑母家中,家境急轉直下,年紀輕輕的鼎爺便要幫忙養家。

鼎爺, 李家鼎, 餐廳, 跳出ComfortZone

兒時的李家鼎相當百厭,十足馬騮一樣,看見別人打筋斗,凌空轉身,非常有趣,於是跟科班師傅學打筋斗,而師傅本身做電影,他便跟著入行。 「我正式出身時,武打進入鑽石年代,邵氏11間廠24小時川流不息,大明星凌波、Lily要為武師改期三次,你諗吓武師搵幾多錢?我哋要求個天落雨,等我哋可以抖吓。」

李家鼎在電影《過江龍》、《大丈夫興騷寡婦》中擔任男主角,嘉禾想簽他做小生,月薪800至1,200元;但做武打,每天兩組武師、一組替身,每日賺400至500元,三日已賺到小生一個月的收入,為了家庭,他放棄做小生。 「70年代,我每個月普普通通都搵6,000蚊,71至73年『卡啦卡啦』咁去台灣,兼做演員、替身、助手、武指,一個月搵成萬銀,當時10幾萬就可以買到一層樓,我都買咗幾層,不過俾『老竇』輸埋。」

鼎爺, 李家鼎, 餐廳, 跳出ComfortZone

鼎爺出來工作後,便少了下廚,加上父親離世,而他於90年代與前妻離婚,自此「孤身走我路」,前後差不多30年沒有正式入廚。 開飲食節目三度被拒 2013年,李家鼎應黃淑儀之邀,擔任飲食節目《吾淑吾食》第一輯的嘉賓,當時他提吓意見,應該這樣那樣,工作人員見他頭頭是道,便向上頭建議開個節目由他教煮,但當時的男監製不相信他會煮,前後三次拒絕這個建議。

鼎爺, 李家鼎, 餐廳, 鼎爺私房菜 鼎會館, 鼎尚棋哥燒鵝湯館, 跳出ComfortZone

「以前公司唔夠五個人知道我識煮嘢,珍姐(香港電視廣播有限公司助理總經理曾勵珍)係其中一個,之後佢想開節目,叫我教煮餸,個個都無信心,起初都reject,珍姐話俾佢哋知,我老竇以前開卜卜齋,之乎者也熟過你,又知道我有口水,識得講呢啲嗰啲,先至開得成。」

但當無綫正式找鼎爺洽談,他卻表示要先停一停,因始終多年沒有入廚,需要時間慢慢組織每個菜式,弄清楚步驟,才敢正式做節目。 「正式開拍前試咗三次,因為驚我做緊講唔到,講緊又做唔到,原來我一路講一路做都無問題,其實三次都pass,第三次佢哋話我聲硬、眼惡,叫我溫柔啲、慈祥啲,似阿爺或阿叔咁,我話咁咋吓嘛。」

鼎爺, 李家鼎, 餐廳, 鼎爺私房菜 鼎會館, 鼎尚棋哥燒鵝湯館, 跳出ComfortZone

節目正式出街,首兩集也有觀眾抗拒,至第三集,鏡頭清楚拍到其刀工,連大廚都讚,才慢慢建立說服力,令節目大收旺場。 《阿爺廚房》正在籌備第四輯, 鼎爺剛從南海回來,還要去順德、番禺,上月又去過澳門,介紹多個菜式的起源,預期於12月播映。

雖然現時大家的目光都集中注意鼎爺的廚藝,其實他仍然在無綫做演員兼替身,飛車、開槍親身上陣,滾、踢、打都難不到他,替身人工4,000多元,他一併兼做,替公司省錢。 「武打同煮嘢各有各辛苦,各有各舒服,以前做武師,日接夜、夜接日咁拍,完全係非人生活;依家煮食節目唔會咁拍,而且咩都預備好晒。

鼎爺, 李家鼎, 餐廳, 鼎爺私房菜 鼎會館, 鼎尚棋哥燒鵝湯館, 跳出ComfortZone

做武打發噏風打兩吓嗰啲咪舒服,要出嚟效果好梗係辛苦啲;依家做生意出啲餸唔好真係好大壓力,點同客交代?我身上嘅壓力真係無人知。」 瞓身投入生意壓力大 鼎爺對生意的參與程度很高,入貨出貨,了解顧客口味,還要兼顧營業額,經常到店中打點,睇唔過眼就講,講唔明就落手落腳做,「日日企到抽筋、腳板底痛」。

私房菜10個菜式當中,李家鼎煮其中四個,還有兩個即場表現,早前以三斤半重的生鐵鑊做20多人份量的炒飯,以臂力拋鑊,全部真功夫。 「最緊要顧客食得開心,對得住自己,賺錢都係其次,唔係要求個個讚,食過表面話唔滿意,原來心裏面係服你嘅,咁就夠啦!」

鼎爺, 李家鼎, 餐廳, 鼎爺私房菜 鼎會館, 鼎尚棋哥燒鵝湯館, 跳出ComfortZone

 

「我成日都覺得有得做就做,但殺人放火賣白粉啲我唔會做,正路嘅就做。」 「人哋讚固然開心,人哋彈我都開心,因為有機會改進。」 「有啲人搵到錢就成棵聖誕樹咁,咩都掛上身,我仲揸緊14年嘅舊車,著恤衫牛仔褲或者西裝褲,無咩好炫耀。

喺花弗年代我都唔花弗,可能自己性格,同埋見得太多,無謂俾物質限制自己,咁會好辛苦。口臭啲講句,我依家即時買架Rolls都得,但唔代表好威。」 「有人話李家鼎依家慈祥咗,問我依家會唔會嬲,梗係會,唔會係痴線,但係嬲三個多鐘頭就放開佢,自己嬲到撼頭埋牆,dump到腳爆都無用。」

鼎爺, 李家鼎, 餐廳, 跳出ComfortZone

「有咩勸勉年輕人?做咩都要用心做,人哋讚好,都未必好得晒,世事無完美,我做節目、生意跟到足,唔合格就倒咗佢,一定要對得住顧客,你去食嘢人哋俾行貨你,你有咩感覺?將心比己,真係要用心、用腦去做。」

專家之言:不妨鑽研興趣

「職場女王」、竣鈞集團有限公司董事總經理張慧敏(Son姐)說:「嚴格來說,鼎爺並不算是轉型,他原本已經識煮識食,剛好當時流行烹飪、私房菜,而他拍了無綫《阿爺廚房》,結果『食正大浪』,『剛剛遇著啱啱』,令他不經意地呈現出另一面。」

李家鼎難得一身好本領,遇上可一不可再的機會,加上年事已高,nothing to loss(沒有東西可以輸),少了年輕人的一份顧忌,令他在煮食領域也能取得成功。 「鼎爺深明獻醜不如藏拙這個道理,但他願意接受挑戰,證明他對自己的手藝充滿信心;不過他也未必知道這門手藝可以『搵食』,否則一早做了。」

鼎爺, 李家鼎, 餐廳, 鼎爺私房菜 鼎會館, 鼎尚棋哥燒鵝湯館, 跳出ComfortZone

72歲的李家鼎,所謂「食鹽多過你食米」,加上原本出身於大戶人家,即使是家常便飯,菜式也較一般人多及考究,而他對這方面充滿興趣,自行鑽研,慢慢累積成為寶庫,時機一到,便能夠駕輕就熟地表現出來。

「鼎爺原本是龍虎武師,一介武夫,原來也可以『洗手作湯羹』,一剛一柔的落差,令人留下深刻印象,加上他能夠以淺白方式講解複雜的做法,而且為人謙厚,切合廚師形象。」 Son姐認為,李家鼎對自己的要求,高於別人對他的要求,這樣才能夠對得起別人的欣賞,認真、勤力往往是成功人士的指標。

鼎爺, 李家鼎, 餐廳, 鼎爺私房菜 鼎會館, 鼎尚棋哥燒鵝湯館, 跳出ComfortZone

「興趣有時可以發展成事業,但並非每個人都可以做到,別因為別人的成功,所以自己就去跟著做,期望有朝一日憑籍興趣而成功。」 年輕人應該忠於自己的興趣,慢慢鑽研及累積相關知識,自己先享受當中的樂趣,至少可以減壓,不要覺得興趣「唔等洗」,因為機會隨時到臨。

相關文章