診所職場事【寶豬趣聞】安心去玩|珍寶豬|經一專欄

診所職場事【寶豬趣聞】安心去玩|珍寶豬|經一專欄

電話響起~我:「你好乜乜診所」對方係一位女士:「你最近有冇睇新聞呀?」

撰文:珍寶豬funnyclinic)|圖片:電視截圖、Unsplash

麻疹爆發 去日本安唔安全?

我:「請問咩事呢?」
佢:「新聞咪話麻疹爆發嘅,你知唔知而家去日本仲安唔安全呀?仲去唔去好呀我哋?」
我:「我諗呢啲你要自己衡量啦~我答你唔到」
佢:「咁都答唔到你做咩要聽我電話呀?」
如果有得揀,我都想唔聽你電話。
我:「…」
佢:「有冇啲咩藥可以俾我哋拎去食打底呀?我哋一家大細去,有事起上嚟好麻煩囉」
我:「唔好意思呀,麻疹係冇藥食嘅,係得針打~」
佢:「我哋唔打啲咩針㗎,你唔好諗住借啲意sell我哋打針,我知你想點㗎,我淨係要藥㗎啫,打咗個底可以避開啲麻疹就得㗎啦,你唔好講打針!」

圖片:電視截圖
圖片:電視截圖

有咩藥可以預防麻疹

我:「真係冇藥係可以避開啲麻疹,一係你哋配定啲平安藥啦」
佢:「你九唔搭八㗎喎,我同你講東你就講西嘅?我唔係打嚟聽你sell嘢㗎,你可唔可以似返個人咁答我嘢呀?」
我唔係用緊人channel同你講嘢咩?我頭先唔小心吠咗你幾聲呀?
我:「麻疹係冇口服藥去避免」
佢:「板藍根得唔得呀?」
不如你話食鹽呀?你唔好咁九唔搭八又得唔得呀?
我:「唔得㗎…」
佢:「咩藥都冇嘅即係好小事啦?即係去得啦!」
嘟。
其實你都係想聽人講一句『冇事嘅,安心去玩啦』,你不如自己講一百次說服自己算啦,唔駛打嚟問我嘅…