診所職場事【寶豬趣聞】回佣|珍寶豬|經一專欄

診所職場事【寶豬趣聞】回佣|珍寶豬|經一專欄

有日一位小姐睇完醫生,拎藥時佢問我:「個價錢方面有冇得商量?」

撰文:珍寶豬funnyclinic)|圖片:電視截圖

病人竟然問我有無回佣

我:「我哋診金連藥費貼咗喺度啊,冇得平㗎~」
佢:「你係咪有得分㗎?」
我:「吓?我係有人工㗎,返工呀嘛」
佢:「花紅呢?」
關你咩事呢?
我:「唔好意思呀小姐,我哋診金係定價㗎啦,除非你係長者啦」
佢笑笑:「咁我有耐都未係長者」
我:「嗯,咁呢度三百蚊啊」
佢:「你係有花紅㗎嘛,你回返些少佣俾我囉」
回佣?傻的嗎~

回佣 診所職場事 珍寶豬 經一專欄
圖片:電視截圖

我:「我哋冇回佣㗎」
佢:「我自己平時都會回佣俾啲客,我袋少啲佢又平啲,何樂而不為呀,大家開心最緊要」
你咁鍾意何樂而不為嘅好應該唔收人工啊,你老闆都會好開心㗎,YEAH。

我:「我哋冇呢啲嘢~三百蚊啊」
佢:「你唔想做成單生意咩?」
而家好似唔係我要搵生意啊?不如你自己入去問醫生啦~
我:「如果你唔要藥嘅話,我哋都係要照收你診金啊,你係咪唔要藥?」
佢:「我係有誠意想你做得成呢單生意」
你不如返屋企覺覺豬啦~
我:「你係咪唔要藥啦小姐?如果係嘅我幫你同醫生講,不過診金醫生都係會照收,你要定唔要藥呢?」
佢怒目相向,定咗形咁,大概維持咗三十秒:「要!我真係有病先嚟睇醫生㗎嘛,就同我啲客一樣佢哋都係有需要先嚟搵我嘅啫,不過我就會諗多啲佢哋真心想幫輕吓佢哋嘅,唔係好似你咁㗎」