窮遊香港過聖誕之文青篇

窮遊香港過聖誕之文青篇

之前,小編介紹咗幾個地方畀大家聖誕嗰陣去賞紅葉(詳見:http://www.edigest.hk/Vip/detail?id=1693),依家紅葉都已經開哂,開始人山人海。唔想同人迫,其實香港仲有隱世美景。小編繼續同大家窮遊香港過聖誕啦!

馬灣公園

平時大家講起馬灣,都係諗起挪亞方舟,但其實小編覺得馬灣公園最靚係意中園!意中園是馬灣公園內的一個花園,入面有一條用花築成的迥廊,又有一個好vintage的亭同大閘,好適合同伴侶一齊去relax下。

平日都有唔少couple去影pre-wedding,大家可以同伴侶去影相、談心,過一個偽文青浪漫聖誕。行完意中園,仲可以行埋隔離沙灘,影日出!

影完相可以考慮在沙灘附近餐廳食晚飯,或搭返巴士出旺角食飯,車程只是20分鐘左右,偽文青唔一定要去到山旮旯的地方影相嘅!

迪欣湖

迪士尼夠哂童話,但樂園年年加價,唔適合我地窮遊精神。但迪欣湖就唔同,係免費、免費、免費架!(因為很重要,所以要說三次。)

迪欣湖中心有一個噴泉,射出來的水有18米咁高,好彩的話遇正陽光照到落噴泉時,仲會見到彩虹。此外,當然唔少得呃like必備的大草地,加埋條小瀑布,簡直會爆like呀!

將軍澳茅湖仔廢堡

偽文青,真行山。係將軍澳魔鬼山,有一個清朝軍事遺蹟茅湖仔觀測台,還有軍事炮台及古堡。古堡行歐洲式路線,雖然日久日修,天花火山岩磚石全部倒塌,只剩地下塔身、藍藍地色的外牆及半截樓梯。

大家可以坐在古堡中間大石上欣賞港島、將軍澳景色。重點係唔遠,由將軍澳靈實醫院南路上,只需20分鐘就到,唔洗辛苦又可以自我陶醉一翻,偽文青就是如此鍊成的。