冥通銀行藍海拓展大計

冥通銀行藍海拓展大計

沒有最騎呢,只有更騎呢。早前小編就數左幾隻係香港上市的騎呢業務新股(詳見:http://www.edigest.hk/Vip/detail?id=1610),但點知呢幾日就有隻更騎呢的新股,就係「冥通銀行」啦。

冇聽錯,係「冥通銀行」。呢隻專營冥幣、祭祖產品既「廣東翊翔民俗文化」,近日申請係內地「新三板」上市,真係名副其實「印銀紙」。招股資料上面寫,公司業績單係今年首三季盈利達498.49萬元(係陽間既人民幣呀),仲有發展大計添,打算開拓「互聯網+」業務。

你咁進取,真係前途無可限量呀。咁又啱既,祭品業務都做到爛哂,你睇香港連紙紮iPhone都出埋,要搞就緊係開拓藍海,一係唔做,一係就去盡啲,話哂炒股都係講概念,大膽啲講出嚟就得架啦。小編今日好高興請來冥商界的屍sir,幫翊翔手諗多幾個藍大計略啦。

大計一:陰間投資

陽間投資成日講「陰陽燭」,個名咁鬼玄,其實可以順勢將投資概念開拓去陰間,例如成立冥界基金。後人可以幫先人月供基金,第時先人的回報可以升值,仲定期有股息收(當然係收冥幣啦)。一旦隔幾代後,D孫的孫的孫唔記得拜祖先,祖先都有定期收入嘛。醒個貼士過你,冥界科技基金應該會有錢途,因為有喬布斯(Steve Jobs)係度嘛,一定好多人認購。

大計二:地府地產

唔少孝子賢孫都會燒豪宅、花園、別墅俾先人,陰間祖先其實通通都收到架。之不過,地府咁多鬼民,邊有咁多地起大屋呀?所以翊翔可以諗計搞地府地產,幫幫先人買地起樓,又可以供地,仲可以諗諗賣埋遠期樓花地花添,唔知行唔行得通呢?

大計三:通靈e-Banking

燒左咁多冥錢俾先人,唔通下下都拎住一大疊冥鈔咩。所謂冥通銀行屍屍關心,發展「互聯網+」絕對係王道,所以好贊成翊翔搞架。小編覺得除咗可以推出「帛金卡」儲「冥賞錢」,仲可以搞個通靈e-Banking,等子孫網上交易冥錢、祭品,一click個制就收到,方便又快捷,陽間又環保,可以慳返唔少紙,應該可以得到中央政策大力支持,隨時仲可以有大筆補貼,前途係咪無可限量呢?﹗

大計四:陰間節日狂歡

陽間好鐘意慶祝節日,好似聖誕節咁,就刺激世界各地消費。陰間節日都唔少,清明節、萬聖節、孟蘭節、重陽節……一於就仿效陽間,係呢啲日子推出優惠,「清明冥錢香燭套裝」、「往生錢孟蘭優惠包」、「萬聖節扮鬼扮馬土地衣」,陽間大賣,陰間大喜,一舉兩得!

大計五:仙遊紀念鈔

陽間好鍾意每隔十年五年就出紀念鈔,個個就排哂長龍買嚟炒。其實冥通銀行都可以推出,例如仙遊十年紀念鈔咁,等各位孝子賢孫可以做個紀念,仙遊紀念鈔仲隨時會升值,先人揸住都會笑呀。